¹ Pandehan te Saulus harajur kea handak mampikeh tuntang mampatei kare murid Tuhan Yesus. Ie haguet manalih imam hai,
² tuntang balaku surat kuasa uka manalih kare pamimpin huma sombayang ain oloh Yehudi hong Damaskus, mangat amon ie sondau kare oloh je percaya dengan Yesus intu hete, ie tau manawan ewen tuntang mimbit ewen akan Yerusalem.
³ Metoh ie manalih Damaskus, katika jari tokep dengan lewu te, maka salenga ije kalawa bara langit mamancar mangaliling Saulus.
⁴ Ie balongkang akan petak palus mahining ije auh hamauh dengae, "Saulus, Saulus! En sababe ikau mangapehe aku?"
⁵ "Eweh ikau, Tuan?" koan Saulus misek. Auh te tombah, "Aku toh Yesus, je ingapehem.
⁶ Tapi toh keleh ikau hingkat tuntang tame akan lewu. Intu hete kareh insanan oloh akam taloh je patut iawim."
⁷ Kare oloh je omba haya-hayak dengan Saulus tarewen sampai dia olih hamauh; basa ewen mahining auh te tapi ije biti oloh mahin jaton ewen mitee.
⁸ Balalu Saulus mendeng tuntang mamparenang matae tapi matae jari jaton olih mite taloh en-en hindai. Jadi ewen mimbing lengee tuntang oloh mangagalan ie tame akan Damaskus.
⁹ Telo andau katahie ie jaton tau mite tuntang katahin te ie jaton kuman atawa mihop samasinde.
¹⁰ Hong Damaskus aton ije biti murid Tuhan Yesus bagare Ananias. Huang ije taloh paite, Tuhan hakotak dengae. Tuhan hamauh, "Ananias!" Ananias tombah, "Aku, Tuhan."
¹¹ Palus Tuhan hamauh, "Ayo haguet metoh toh. Talih human Yudas hong Jalan Bujur. Isek intu hete oloh je arae Saulus asale bara lewu Tarsus. Oloh te metohe balakudoa,
¹² tuntang huang ije taloh paite ie mite ije biti oloh hatue, arae Ananias, dumah manalih ie tuntang mina lengee hunjun ie mangat ie tau mite taloh tinai."
¹³ Ananias tombah, "Tuhan, are taloh je jari ihiningku tahiu oloh toh bara oloh beken, je mambatang tahiu kare kapehe je iawie akan ungkup Ayum hong Yerusalem.
¹⁴ Tuntang toh ie jari dumah akan hetoh mahapan kuasa bara kare imam kapala uka manawan kakare oloh je percaya Dengam."
¹⁵ Tapi Tuhan hamauh dengan Ananias, "Haguet ih! Basa Aku jari mintih ie uka mandohop Aku, mangat ie mambarita tahiu Aku akan kare bangsa beken je dia baagama Yehudi tuntang akan kare raja tuntang akan ungkup Israel kea.
¹⁶ Tuntang Aku kabuat kareh mamparahan akae kare kapehe je musti ingkemee tagal Aku."
¹⁷ Maka Ananias balalu haguet akan huma te tuntang mina lengee intu hunjun Saulus. "Pahari Saulus," koan Ananias, "Tuhan Yesus je gitan pahari hong benteng jalan katika pahari miar akan hetoh, Ie te je manyoho aku dumah mangat pahari tau mite tinai tuntang inguasa awi Roh Hatalla."
¹⁸ Hemben te kea taloh je kilau tisik lauk balekak bara matan Saulus tuntang ie tau mite tinai. Maka ie palus hingkat, balalu impandoi.
¹⁹ Tuntang limbah kuman, ie manjadi barigas haluli. Saulus melai hong Damaskus dengan kare murid Yesus pire-pire andau katahie.
²⁰ Ie balalu haguet akan kare huma sombayang tuntang nampara mambarita je Yesus te Anak Hatalla.
²¹ Kakare oloh hengan mahining Saulus. Ewen hamauh, "En dia ie toh je jari mampatei kare oloh je percaya intu Yesus hong Yerusalem? Ie dumah akan hetoh puna tantai manawan tuntang mimbit ewen akan kare imam kapala!"
²² Tapi Saulus sasar hai pangaruhe. Kare bukti je insanan tahiu Yesus mandehen oloh mangat toto percaya je Yesus te Raja Panyalamat, sampai kare oloh Yehudi je melai intu Damaskus dia olih hindai malawae.
²³ Limbah mahalau pire-pire katika katahie kare oloh Yehudi pakat uka mampatei Saulus.
²⁴ Tapi rencana ewen te ingatawan sampai ie. Handau hamalem ewen mentai hong bauntonggang lewu uka mampatei ie.
²⁵ Tapi hong sinde alem, kare murid Saulus manduan Saulus, palus mampamohon ie huang karanjang mahalau dinding lewu.
²⁶ Saulus haguet akan Yerusalem, tuntang intu hete ie manggau jalan uka tau hinje dengan kare murid Yesus. Tapi ewen mikeh dengae, basa ewen dia percaya je ie jari toto-toto manjadi murid Yesus.
²⁷ Rahian tinai Barnabas dumah manalih ie, palus mimbit ie akan kare rasul. Barnabas manyarita akan ewen tahiu ampin Saulus mite Tuhan hong benteng jalan tuntang kilen ampie Tuhan hakotak dengae. Barnabas mansanan kea tahiu ampin kahanyin Saulus majar hong Damaskus mahapan aran Yesus.
²⁸ Tagal te Saulus melai dengan ewen tuntang bahotbah dengan kahanyie hong hapus Yerusalem mahapan aran Tuhan.
²⁹ Ie hakotak tuntang hagalagai kea dengan kare oloh Yehudi je hakotak mahapan basa Yunani. Tapi ewen manggau akal handak mampatei ie.
³⁰ Katika kare oloh percaya je beken te katawan tahiu hal te, ewen mimbit Saulus akan Kaisarea, limbah te mangirim ie akan Tarsus.
³¹ Maka ungkup hong hapus Yuda, Galilea tuntang Samaria manjadi damai. Tuntang mahapan pandohop bara Roh Hatalla, kare ungkup te sasar dehen tuntang sasar are, awi ewen belom huang kikeh dengan Tuhan.
³² Petrus haguet akan hete-hete maja kare ungkup. Hong sinde andau ie maja ungkup Tuhan je melai hong Lida.
³³ Intu hete ie hasondau dengan ije biti oloh hatue bagare Eneas, je lumpuh tuntang jari hanya nyelo katahie jaton hingka-hingkat bara ekae batiroh.
³⁴ Petrus hamauh dengan Eneas, "Eneas, Yesus Kristus mampakeleh ikau. Hingkat tuntang rasih ekam batiroh." Hemben te kea Eneas hingkat.
³⁵ Kakare oloh lewu Lida tuntang Saron mite Eneas, palus ewen samandiai percaya dengan Tuhan.
³⁶ Intu Yope aton ije biti oloh bawi je bagare Tabita. Ie te oloh Yunani je percaya dengan Yesus. (Arae huang basa Yunani iete Dorkas rimae bajang.) Ie harajur malalus kare taloh bahalap tuntang mandohop kare oloh je belom susah.
³⁷ Hong katika te ie haban palus malihi kalunen. Limbah hantue impandoi, ie iingkes oloh intu kamar hunjun.
³⁸ Yope te dia pire kakejaue bara Lida. Jadi katika kare murid Yesus hong Yope mahining Petrus aton intu Lida, ewen manyoho due biti oloh haguet manalih Petrus dengan peteh toh, "Jele-jeleng ih dumah akan hetoh."
³⁹ Petrus balalu hingkat palus omba ewen. Sana sampai hete ie iimbit akan kamar je hunjun. Kakare balo je aton hete mangarimbong Petrus sambil manangis tuntang mamparahan akae kare baju tuntang kare jubah je injahit awi Dorkas akan ewen metoh ie magon belom.
⁴⁰ Petrus manyoho ewen uras balua, palus ie sontop mandeko utute balakudoa. Limbah te ie manaharep hantun Dorkas tuntang hamauh, "Tabita, misik!" Maka Dorkas marenang matae, tuntang katika ie mite Petrus, ie mondok.
⁴¹ Palus Petrus mimbing lengee tuntang madohop mampendeng ie. Rahian tinai Petrus mantehau kare oloh percaya intu hete haya-hayak dengan kare balo te, palus manyarah Dorkas je belom te akan ewen.
⁴² Kabar tahiu kajadian te tayap akan hapus lewu Yope, sampai are oloh percaya dengan Yesus kilau Raja Panyalamat ewen.
⁴³ Petrus melai intu hete pire-pire andau tinai hong human ije biti tukang upak meto je bagare Simon.