¹ Yahudi mo yakla yala Pentakostanak kim zauk, dekam tingare Yesussu de taibliblan wenya aha-erenak lowe heꞌak.
² Mumuk ennak zep ngli nakore asese yala nasal gubluk. Gola men zewe lowe heꞌak, zao zep hendep til zika. Man ze wal-wale gweka.
³ Dekam zep zi mahal makare syauk hitin beyam-byana hla nulidak. Syauknu in hendep zeno mae mo nol bol tahannak zep mawa mo kim ezauk ine gweꞌanzak.
⁴ Alap mo Enhona dekam zep ing gwe hebiridaka, dekam zep Alap zere onakore sosonkam owas ola donbiꞌik– zere mae mo tame gun srem olkam.
⁵ Dekam Yahudi zini, dawemkam de Alapsa betek gwe-gweblan wenya, zen mes tingare lang nakon yakla yala in hap Yerusalemk etagal gwesik.
⁶ 9 Lang bosem-sena in dekore zi etagal gwek– Partia, Media, Elam, Mesopotamia, Kapadokia, Pontus, Asia, 10 Prigia, Pamfilia, Mesir, hen langna Libia mo e yala Kirene mo irik gin e-e nakon, hen e yala Roma kon. 11a Ahakon hen lang tekna Kreta kon, hen langna Arab kon. Ahakon Yahudi mo ausu nakorena, hen ahakon men zen aha zi ausu nakore zini Yahudi hon biti gwekke. 6 Zini in kim asese aukuna insa esak, dekam zep anakare hap ehlu-hluk gwezak, “An ba owas ze lwaꞌan?” Zen dekam zep auna ehlozak: Sap zen zere mae mo e-e nakore olkam de etorannak Alap mo Enho nabare wenya insa sane dabiꞌinzak. 7 Ëtenggwaran hap zep hendep zenaka nenbiridak, “Zini an zen etonꞌan, zen sap tingan Galilea kore zi. 8 Nen hwena ba habe nere mae mo olkam de tonbinnik sane labiꞌin? 11b Zen hwena owas tangan hap am neno mae mo olkam Alap mo owas syal gwe-gwibinni donbiꞌin!”
⁷ (2:6)
⁸ (2:6)
⁹ (2:6)
¹⁰ (2:6)
¹¹ (2:6)
¹² Zen man tangan serkam de tenggwanbiridan hap enlala nik topse neibiridaꞌak, “An ba hap ki ze lwaꞌan?”
¹³ Ahakon hwena man swre dabik. Man nenbiridak, “In ho mamaksa de mamkam otdebin hip ki egwer.”
¹⁴ Petrus ki zep seblaskam de wal bose wal zem in han goleluk taka, zena ki zep ol mam-mamkam zi trana insa tonbiridaka: “Aha lang nakore aya-wal oso-wal, hen tingare Yerusalemk awe de lowehe gwen wenya, ee anik srip gulsuzimk. Dawemkam esane gwek.
¹⁵ Zini an ho mamakna hom notdebir. Em bap kirekam kil libir! Sap an nama kaknak– yakla nwena sembilannak. Kire jamnak ho mamakna hom notde gwibirin.
¹⁶ Hwena an Alap mo ol ayang gul gwen zini Yoel Bak mo ol gu-gun sun ki lwanan. Zen a kirekam mo gu-gukuye:
¹⁷ ‘Alap man gu-gubiridaꞌara, “Aumwa hap de yaklanak, Ëe asa ere mo Enhosa tingare zi hip hle ta sonezim. Eno mae mo zi walasna hen wenam tol-tola hamal hap de olsa sa donbirida gwer. Eno mae mo wal sei-siwiri nwena sa elirisin gwe-gwizim. Hen eno mae mo bong-bongna abe hap dena eisirkim sa kara nul gwer.
¹⁸ Hen sap bose srem wenya men zen zi nik ebabu gwe-gwenan, Ëe asa zebe mae hap hen ere mo Enhosa hle ta sonezim– sap wekam dena, hen sap zikim dena. Zen hen dekam sa hamal hap de ola donbirida gwer.
¹⁹ Ëe asa owas-owassa syal gwe-gwibir– nglinak hen kamanak, kalkam dena, syaukkum dena, hen ahakon butkam denaka.
²⁰ Yakla nwena sa kawesik gwera, hen benna zi kal mo kim sa kal-kal gwe-gwer. Bian mo hatan yakla yala in de golek de gwenkam, kirekam sa lwa gwer.
²¹ Dekam men zen de Biansa anakan dakenblaꞌak, ‘Asa Emki ngaya tan,’ zen zen sa engaya gwer.”’”
²² Petrus ki zep etan ayang gulzimki, “Israelk de zi, asa sane lak. Ena tawana: Nazaret walya Yesus hup Alap man owas-owasna syal gwe-gwibir-blika– em dikim anakan tame tan hap, ‘An Zen tangan– Alap zere mo zer sonen Zi niye.’
²³ Hwena Alap, zere mo hamal hap de enlala gwibin sin ki kirekam ebe mae hap tapbla tazimki. Hendep em dekam zebe karek gol gwen zi niban apdenak te-lidak sonnak de makan ta irinkim lak.
²⁴ Hwena juwen zi mo langnak kim sap ati gwe ineka, hwena Alap dekon etan zeser soneka, dekam zep etan luwen taka. Sap Alap mo Tanena in, Zen bejen hendep denaban zewe gwe gwen.
²⁵ Yesus hup dena Daud Bak mes ki hen anakarekam guku, ‘Ëe ama Biansa anakan tame tak, Zen sa asa zergwe gwera. Zen man asa dam taha nakon zerzauk sone gweꞌara, ee zep asa tatem zauk gwer.
²⁶ Ano enhona in zep sam gwesik gwenda, hen mipkam terkam asa Alapsa isrip-sri gwe-gweblal. Ëe hen ama ere mo tim hip dena anakan taibli gweblaꞌan, “Zen sa ano timni tin hyanak ap ese gulblula.”
²⁷ Sap asa men zao ner dwanuꞌak, Alap, Em molye ze asa da tasiki. Ere mo lalak Zini ano timni zewe molya batrek.
²⁸ Sap em mese ngaya gwen hap de orana abe hap zertreblaka. Zep ee kime eno dang gwennak hataꞌak, serkam tangan asa isrip-sri gwe-gwer.’”
²⁹ Petrus ki zep ayang gulzimki, “Aya-wal oso-wal, ee damnak emsa nere mae mo auyanna Daud Bak hap denaka gubiridaꞌan: Zen mes tilki, ki zep ner dwanuk. Men zao ner dwanuk, zen nama hendep angkam nere mae mo ngirinnik lwaꞌan. Zep Daud mo ola in, batren srem hap dena, zen zere hap hom ki guku. Zen hwena Auyan-tane zem Yesus hup ki gu-guku.
³⁰ Daud in hen Alap mo olsa de ayang gul gwen hap de zi, hen Alap mes ki desa anakan gu-guk gweblaka, ‘Eno irik ginni ere mo auyan-tane hap asa golblal.’
³¹ Zen ngein sin dep nesa de ngaya tabin hip de Zi hip dena mes tame gulku, zep zebe hap dena anakan hamal hap gu-guku, ‘Alap molya Desa dre nwanunnak da tasiki, hen zeno timni molya zewe batreblak.’
³² Zep eiwa mes tangan dam gwesinin: Yesus Zen Zen! Alap mes Desa tin nikon etan ngaya taka. Aena mese kitak hla lak.
³³ Zen angkam Alap mo dam taha nakon teipsinkim nikinꞌira, hen Alap mes zere mo Enhona zebe hap zerblaka. Zen in zep hen Desa abe mae hap namen an hle ta sonezimnira– in kirekam ena asa kara labiꞌin hen sane labiꞌinye.
³⁴ Sap Daud Bak zena hom ngatan zi mo lang san dep sewe seka. Hwena zen man Teipsin nika dan ake seka. Zep anakan guku, ‘Bian Alap ano Teipsinni man gubluka, “Ëre mo dam taha nakon emki nikirin– dekon de hen teipsinkim irik gin hip. Ki asa hwena ebe hap de jal zini ere mo tana iltikinnik sisik gulin.”’
³⁵ (2:34)
³⁶ Zen in zep, Israelk de zi, emki dam taha nakon de nikirin Zini insa tame tan. Yesussu, men Desa ena te-lidak sonnak makan la inkke, Zen Desa Alap teipsinkim dre neka. Zen in Zen– nesa de ngaya tabin hip de Zi niye!”
³⁷ Petrussu in kim kirekam sane daꞌak, zeno ola in man tangan zeno mae mo enhonak tisik. Dekam zep Petrussu zere mo wal bose walya in han dakensibiridak, “Aya-wal oso-wal, ee ki basa asa syal eibir? – Alap dikim etan asa sam gwesibiridan hapye.”
³⁸ Petrus ki zep ding gulzimki, “Em ehalek! Dekam ee asa emsa kitak Kristus Yesus mo bosekam baptis labir. Dekam sa Alap eno mae mo karek-karekna tap gulsuzimdi. Zen dekam sa hen zere mo Enhona ebe mae hap hle ta sonezimdi.
³⁹ Zere mo Enhosa de hle ta sonezimdin hip dena mensa Alap gu-gubiridaka, zen hwena nebe mae en hap hom. Hwena tingan men desa Alap Kristussu de taibliblan hap dam tasibiꞌinka, zen hen zebe mae hap– sap eno mae mo walas, aza-tane wal, hen sap langanak de zi ausu, hendep lang topse gwennak dena.”
⁴⁰ Kirekam-kirekam ol zim-zimkim ze tonbirida gweꞌanka. Hen dekam de ehalen hap anakan titi ta gwibiꞌinka, “Ëngaya gwen hap de edwam gwenna, karek-karek gulin hana gwen zi nikon emki ewet so gwen.”
⁴¹ Men zen Petrus mo ola in kon ehalek, desa dekam zep baptis dabik. Yaklana inkam in zen Yesussu daibliblak, beyana san ha tiga ribu enkam mes yap.
⁴² Men zen Yesussu daibliblak, dekam dua-blaskam de zini in mo tawa tabinnik isrip-sri naban etagal gwe-gwek. Zen gol-gol san aha-ere enlala naban hen tagal gwenda gwek– dekon de Alapsa abe ta gwen hap, hen Bian Yesussu de enlala gweblan hap de rotisa twenblanda gwen hap, hen zep de anggursu otde gwibin hip.
⁴³ Dekam dua-blaskam de dam tasibin zini in owas-owasna beya tangankam syal neibirida gwek, zep dekam kitak man denggwanbirida gwek.
⁴⁴ Zen kitak aha-erenak lowehe gwek, hen zere mae mo kire-kirena apdekam bi neblanda gwek.
⁴⁵ Ahakon zere mae mo kamana hen kire-kirena te-ala hap lirak da gwibik. Te-alana desa tahalha wenya kip kap da gwizimk.
⁴⁶ Hen dekam Alap mo golak mwin-mwankam etagal gwe-gwek– dekon de Alapsa gu sone gweblan hap. Zere mae mo gol-gol san hen apdekam isrip-sri naban tembane tanda gwek. Zeno mae mo enlalana dekam Alap en mo bosesa de
⁴⁷ teip gulsublun en hap lwa gwizimki. Dekam tingare zini man sam neisibirida gwek. Hen Bian mwin-mwankam zini zebon mae de biti gwen hap mas-mas gul gweka– Zena men desa engaya gwen hap dam tasibirkike.