Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri nia’na ngasemmo anjo bansaya ba’leang, Nakanamo Batara ri Yosua,
2 "Pilei sampulo anrua tau, tasse’rei tau battu ri massing sukua.
3 Parentakangi mae ri ke’nanga nangngalle sampulo anrua batu battu ri tangngana Binanga Yordan, ri tampa’na le’ba’ anjo sikamma imanga ammenteng. Suroi ke’nanga ampisangi anjo batu-batua sa’genna mae ri tampa’nu ngaseng akkema punna bangngi sinampe’."
4 Jari nakio’mi Yosua anjo sampuloa anrua tau nipile,
5 nampa nakana, "A’lampako mange ri tangngana Binanga Yordan, ri dallekanna Patti ParjanjianNa Karaeng Allata’alanu. Massing angngalleko se’re batu battu anjoreng, iamintu sampulo anrua batu jaina situru’ jaina suku-suku niaka lalang ri bansa Israel.
6 Anjo batu-batua lampiu’rangiangi anne bansaya mae ri apa le’baka Nagaukang Batara. Ri bokoangallo punna akkuta’nang ana’-ana’nu angkana apa battuanna anjo batu-batua mae ri kau,
7 parallui nupauang ke’nanga angkanaya ammantangi a’lo’loro’ je’ne’na Binanga Yordan ri wattunna nierang a’limbang Patti ParjanjianNa Batara ri anjo binangaya. Anjo batu-batua latuli ampiu’rangiangi bansa Israel mae ri apa kajarianga anrinni."
8 Nagaukammi anjo sampuloa anrua tau anjo apa naparentakanga Yosua. Situru’ pangngunju’Na Batara mae ri Yosua, angngallemi ke’nanga sampulo anrua batu battu ri tangnga-tangana Binanga Yordan, sangkammaya jaina siagang suku-suku niaka lalang ri bansa Israel. Nampa naerang ke’nanga anjo batua mange ri tampa’ pakkemaanna ke’nanga.
9 Anjoreng ri tangnga-tangngana anjo Binanga Yordan, nasusummi Yosua anjo sampuloa anrua batu, ri tampa’ pammentenganna le’ba’ sikamma imang ambulekai anjo Patti Parjanjianga. (Anjo batu-batua nia’ iji anjoreng sa’genna kamma-kamma anne.)
10 Sikamma imanga ammenteng tulusuki ri tangnga-tangngana Binanga Yordan sa’genna le’ba’ ngaseng nagaukang anjo taua sikontu apa Naparentakanga Batara mae ri ke’nanga tete ri Yosua. Anjo kammaya sicocoki siagang pangngunju’-pangngunju’ battua ri Musa mae ri Yosua. Akkaro-karomi umma’ Israel a’limbang ri Binanga Yordan.
11 Ri wattunna battu ngasemmo ke’nanga anta’leang, nabule’mi sikamma imanga anjo Patti Parjanjianga a’jappa ri dallekanna ke’nanga.
12 Situru’ siagang apa naparentakanga Musa, nipariolomi a’limbang tantarana suku Ruben, Gad siagang bageruanna suku Manasye.
13 Yangasenna niaki 40.000 tu bura’ne angngerang ngaseng sanjata siagang sadiaya untu’ a’bundu’. Ri dallekanNa Batara, alimbangi ke’nanga nampa mange ri lappara’ rawaya ri ampi’na Yerikho.
14 Anjo alloa Nagaukangi Batara sikamma gau’ malompoa sa’genna anjo bansa Israel napakalompomi Yosua salaku tau malompo. Nipakalompomi Yosua ri ke’nanga lalang sikontu tallasa’na, sangkamma nipakalompona Musa ri ke’nanga.
15 Nampa Nasuro Batara anjo Yosua
16 amparentakangi mae ri sikamma imang ambulekai anjo Patti Parjanjianga sollanna assulu’mo ke’nanga battu ri Yordan.
17 Nagaukammi Yosua anjo apa Naparentakanga Batara mae ri ia.
18 Ia battuna ngaseng anjo sikamma imanga ri birinna binangaya, appakkaramulami a’lo’loro’ ammotere’ siagang allumpa kamma riolo je’ne’na anjo binangaya.
19 Tanggala’ sampulo bulang makase’re nabattu umma’ Israel ri ba’leanna Binanga Yordan. Nampa akkema ke’nanga ri Gilgal, irayanganna Yerikho.
20 Anjoreng nasusummi Yosua anjo sampuloa anrua batu nialle battu lalang ri Binanga Yordan.
21 Nampa nakana Yosua mae ri umma’ Israel, "Ri bokoangallo, punna akkuta’nang ana’-ana’nu angkanaya apa battuanna anne batu-batua,
22 pauangi ke’nanga angkanaya a’limbangi umma’ Israel ri anne Binanga Yordan irate ri butta kalotoroka.
23 Caritakangi ke’nanga angkanaya Karaeng Allata’alanu ampa’jari kalotoroki je’ne’na anjo Binanga Yordan untu’ ikau ngaseng sa’gennu akkulle a’limbang ngaseng anta’leang, sangkamma Napa’jari kalotoro’na Tamparang Alara’ untu’ ikambe,
24 sollanna naasseng ngaseng sikontu taua ri lino antekamma lompona kakoasanNa Batara. Siagang lanri kammana minjo nalanupakala’biri’ Karaeng Allata’alanu sa’genna satunggu-tungguna."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA