Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai ipagirah si Josua ma patarni ai puho, jadi bingkat ma sidea hun Sittim das hu Jordan, ia pakon ganup halak Israel, lanjar marborngin ma sidea ijai, sanggah seng ope mandipar sidea.
2 Jadi dob salpu tolu ari, ibontas pambobai ai ma tongah-tongah ni parsaranan ai,
3 anjaha iparentahkon ma bani sidea, “Anggo iidah nasiam poti parpadanan ni Jahowa Naibata nasiam, iusung malim, halak Levi ai, bingkat ma nasiam humbani ianan nasiam laho mangirikkon ai.
4 Tapi maningon dong hira-hira dua ribu asta holang-holang nasiam hunjai. Seng bulih nasiam hundohor hunjai, ase ibotoh nasiam dalan sidalan nasiam, ai seng ongga ope ibontas nasiam dalan ai na saindokahni.”
5 Dob ai nini si Josua ma dompak bangsa ai, “Manguras ma nasiam, ai patar ma bahenon ni Jahowa halongangan i tongah-tongah nasiam.”
6 Anjaha nini si Josua ma dompak malim ai, “Usung nasiam ma poti parpadanan in, anjaha mandipar ma nasiam mambobahon bangsa in.” Jadi iusung sidea ma poti parpadanan in i lobei ni bangsa ai.
7 Dob ai nini Jahowa ma dompak si Josua, “Sadari on pungkahon-Ku ma patimbul ho i lobei ni ganup Israel, ase ibotoh sidea, ia sonin pangkasomaning-Ku bani si Musa, lanjar sonai do pangkasomaning-Ku bam.
8 Anjaha parentahkon ma hubani malim na mangusung poti parpadanan ai, sonon, ʻAnggo das ma hanima hu topi ni Bah Jordan ai, soh ma hanima jongjong i Jordan ai.ʼ”
9 Dob ai nini si Josua ma dompak halak Israel, “Padohor nasiam ma hujon, anjaha tangihon nasiam ma hata ni Jahowa Naibata nasiam.”
10 Ambahni ai nini si Josua ma, “Hunjon ma botohon nasiam, paboa Naibata na manggoluh in do i tongah-tongah nasiam, paboa na usiron-Ni do hun lobei nasiam halak Kanaan, Het, Hewi, Peresi, Girgasi, Amori pakon Jebusi.
11 Tonggor ma, poti parpadanan ni Tuhan ni sagala tanoh on mandipar i Jordan mambobahon nasiam.
12 On pe buat nasiam ma bani nasiam sapuluh dua halak humbani marga Israel, sahalak bei humbani ganup marga.
13 Anjaha anggo marsaran ma tapak-tapak ni nahei ni malim siusung poti ni Jahowa, Tuhan ni sagala tanoh on, ibagas Bah Jordan ai, suntong ma bah ni Jordan ai, anjaha bah na mabaor hun huluan soh ma gabe songon sada tembok.”
14 Jadi sanggah na bingkat bangsa ai hun lampolampo ni sidea laho mandipari Jordan, rap pakon malim siusung poti parpadanan ai i lobei ni bangsa ai,
15 anjaha dob das siusung poti parpadanan ai hu Jordan, anjaha dob dais nahei ni malim siusung poti ai hubani bah ai -- tapi sampur do pasir ni Jordan ai sadokah musim pariama --
16 jadi soh ma bah ai, na mabaor hun huluan, naik gabe sada timbunan, daoh tumang ronsi huta Adam, na i lambung ni Sartan; tapi anggo bah na mabaor hu laut Arabah, laut Garam ai, lambin horah ma. Jadi mandipar ma bangsa ai tontang ni Jeriko.
17 Jadi sanggah na mandipar ai ganup halak Israel bani na horah ai, jongjong ma malim siusung poti parpadanan ni Jahowa bani na horah i parsitongahan ni Jordan ai, paima salpu idipari ganup bangsa ai Jordan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA