Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dhari parkemahan e Sitim Yusak ngotos ta-mata kadhuwa, epakon tek-ngetek nalektegi nagara Kana’an, bi-lebbi kottha Yerikho. Se kadhuwa jareya pas mangkat, sanapa’na ka kottha jareya laju ngenep e bengkona sondel se anyama Rahab.
2 Rato Yerikho meyarsa kabar ja’ badha reng-oreng Isra’il se ata-matae nagarana,
3 daddi laju ngerem otosan ka Rahab, epakon ngoca’ kantha reya, "Pakalowar reng-oreng se badha e bengkona ba’na jareya. Sabab jareya ta-mata se nalektegana dhaera Yerikho reya!"
4 "Pajat badha reng-oreng se entar ka’anto’," saodda Rahab ka otosan jareya, "tape kaula ta’ oneng dhari ka’imma asalla. Reng-oreng ganeka ampon kalowar dhari ka’iya, gella’ e bakto compet are, sabellunna labangnga kottha etotop. Kaula ta’ atanya entara ka’amma, tape mon bi’ sampeyan duli eserser, tanto ecapo’." (Sanyatana ta-mata jareya bi’ Rahab eerrep e ata’na bengkona, etotobi bungkana rame se badha e jadhiya.)
5 (2:4)
6 (2:4)
7 Otosanna rato gella’ pas mangkat dhari kottha jareya. Sanapa’na ka lowarra kottha, labangnga kottha jareya pas etotop. Reng-oreng jareya nyare’e ta-mata gella’ sampe’ napa’ ka Songay Yordan e bagiyan se egabay kennengnganna oreng mon alengka’a songay.
8 E malem jareya, sabellunna ta-mata se kadhuwa gella’ tedhung, Rahab ongga ka attas ata’na bengkona,
9 pas ngoca’ ka se kadhuwa jareya, "Kaula oneng ja’ nagara paneka sareng PANGERAN ampon eparengngagi ka sampeyan. Oreng e ka’dhinto padha tako’ ka sampeyan.
10 Bangsa kaula ampon mereng kadi ponapa PANGERAN makerreng Tase’ Galagas se elebadana sampeyan e bakto kalowara dhari Messer. Bangsa kaula jugan mereng kadi ponapa bangsana sampeyan se mate’e Sihon sareng Og, ratona bangsa Amori e temorra Songay Yordan.
11 Gi’ buru mereng kabar ganeka saos bangsa kaula ampon padha tako’. Oreng ka’iya padha ta’ gadhuwan kabangalan polana bangsana sampeyan. GUSTE Allahna sampeyan lerres Allah Se Mahakobasa e langnge’ sareng e bume.
12 Samangken tore sampeyan asompa kalaban asmana PANGERANna ja’ sampeyan becce’a ka kaula sabala akadi kaula se becce’ ka sampeyan samangken paneka. Ngereng ajanji ja’ sampeyan ta’ mateyana eppa’ sareng ebu kaula, tan-taretan kaula sareng saessena bengkona. Ngereng kaula parenge tandha menangka tanggungan ja’ sampeyan kengeng eparcaja!"
13 (2:12)
14 Ca’na oreng se kadhuwa jareya, "Kaula ajanji manabi PANGERAN ampon massra’agi nagara paneka ka bangsa kaula, kaula becce’a ka sampeyan, sokor sampeyan ta’ ala-bala ka oreng parkara kaula ban kanca kaula paneka. Mon kaula ta’ neptebbi janji, mandar kaula eparengngana ta’ salamet sareng PANGERAN."
15 Sarrena bengkona Rahab jareya nalpe’ ka pagar alassa kottha, daddi oreng se kadhuwa jareya epatoron ngangguy tale epalebat candhelana bengkona.
16 "Sampeyan terros ka tana pagunongan," ca’na Rahab, "me’ olle ta’ ekenneng pega’ sareng otosanna rato. Ngetek e ka’issa’ sampe’ tello are, sampe’ otosanna rato abali ka dhalem kottha. Saamponna ganeka, sampeyan kengeng nerrossagi parjalananna."
17 Ta-mata se kadhuwa jareya ngoca’ ka Rahab, "Enggi, sae, kaula bi’ kanca kaula paneka neptebbana janji se epenta sampeyan.
18 Pera’ paneka’ se kodu ejalannagi sampeyan. Mon bangsa kaula molae nyerrang nagarana sampeyan, tale se mera paneka taleyagi ka candhela se bi’ sampeyan egabay palebadanna matoron kaula bi’ kanca kaula paneka. Rama ebu ban tan-taretanna sampeyan, sarta sadajana la-balana eppa’na sampeyan, pakompol e bengko paneka.
19 Mon antarana reng-oreng ganeka badha se kalowar dhari bengko paneka, mon sampe’ epate’e oreng, ganeka salana dibi’, banne salana kaula ban kanca kaula paneka. Tape mon badha se calaka’ e dhalem compo’ paneka, ganeka tanggunganna kaula ban kanca kaula paneka.
20 Sabaligga, mon kaula ban kanca kaula paneka bi’ sampeyan ekacaca ka oreng, kaula padha ta’ wajib pole neptebbi janji se epenta sampeyan ganeka."
21 Rahab narema parjanjiyan jareya sarta reng-oreng se kadhuwa jareya pas esoro mangkat. Saellana jareya tale se mera gella’ pas etaleyagi ka candhelana.
22 Ta-mata se kadhuwa jareya pas mangkat ka dhaera pagunongan sarta ngetek e jadhiya. Sampe’ tello are abidda reng-oreng otosanna rato nyare’e ta-mata se kadhuwa jareya neng e man-dhimman e sabingkerra dhaera jareya, tape ta’ etemmo. Dhi-budhina otosan jareya padha abali ka Yerikho.
23 Ta-mata Isra’il se kadhuwa gella’ toron dhari pagunongan, pas alengka songay, terros abali ka kennengnganna Yusak. Pangalamanna ecareta’agi kabbi.
24 Saellana jareya se kadhuwa buru mator, "Tantona nagara gapaneka sareng PANGERAN eparengngagi sadaja ka bangsa kaula; sadajana oreng e ka’dhissa’ padha tako’ ka bangsa kaula."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA