Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 On ma parbagianan bani marga Manase mangihutkon ruji-ruji, -- ai ia do bunga tubuh ni si Josep: -- Bani si Makir, bunga tubuh ni si Manase, bapa ni si Gilead, ibere Gilead pakon Basan, halani dalahi siimbang munsuh ia.
2 Anak ni si Manase na legan pe dapotan do mar sasapangku, ai ma anak ni si Abieser, anak ni si Helek, anak ni Asriel, anak ni si Sekam, anak ni si Heper pakon anak ni si Semida. Ai ma anak ni si Manase, anak ni si Josep, mar sasapangku.
3 Tapi anggo si Zelofehad anak ni si Heper, anak ni si Gilead, anak ni si Makir, anak ni si Manase, seng dong bani anak, tapi pitah boru do; anjaha on ma goran ni boruni: Si Mahla, Noa, Hogla, Milka pakon Tirza.
4 Dob ai laho ma sidea mangadap hu lobei ni Malim Eleasar, pakon hu lobei ni si Josua, anak ni si Nun, pakon hu lobei ni sagala kopala, nini ma, “Itonahkon Jahowa do hubani si Musa, bereon-Ni bennami parbagianan i tongah-tongah ni botounami.” Jadi ibere ma hubani sidea sada parbagianan i tongah-tongah ni sanina ni bapa ni sidea, romban hubani hata ni Jahowa.
5 Tapi anggo si Manase dapotan sapuluh parbagianan, sobali tanoh Gilead pakon Basan, na i dipar ni Jordan,
6 halani dapotan parbagianan do boru ni si Manase i tongah-tongah ni anakni; anggo tanoh Gilead bani anak ni si Manase na legan do ibere.
7 Ia parbalogan ni si Manase ai ma hun Asser das hu Mikmetat, na i hapoltakan ni Sikem; dob ai laho ma parbalogan ai dompak dangsina hu pangisi ni En-Tapuah.
8 Masuk hubani si Manase do tanoh Tapuah, tapi anggo Tapuah na bani parbalogan ni Manase masuk bagian ni anak ni si Efraim do.
9 Dob ai tuad ma parbalogan ai hu bah Kana, hampit dangsina ni bah ai. Huta-huta na ijai ai, na i tongah-tongah ni huta ni si Manase, masuk hubani Efraim do. Tapi parbalogan ni si Manase mamontas hampit utara ni bah ai anjaha marujung i laut.
10 Tanoh na hampit dangsina masuk hubani Efraim, anjaha na hampit utara masuk hubani Manase, anjaha laut ai parbaloganni, das hu Asser i utara anjaha hu Isasar i hapoltakan.
11 Masuk hubani si Manase do homa Isasar pakon i Asser: Bet-Sean pakon dusunni, Jibleam pakon dusunni, pangisi ni Dor pakon dusunni, pangisi ni Endor pakon dusunni, pangisi ni Taanak pakon dusunni, pangisi ni Megiddo pakon dusunni; na patoluhon ai tanoh dolog do ai.
12 Tapi seng tarsoluk halak Manase huta-huta ai, gabe boi torus marianan halak Kanaan i tanoh ai.
13 Tapi dob lambin markuasa halak Israel, gabe siparrodi ma ibahen halak Kanaan ai, tapi lang iusir sidea.
14 Dob ai nini ginompar ni si Josep ma dompak si Josua, “Mase ma pitah sada parbagianan mangihutkon ruji-ruji bereonmu bennami bahen rupeinami, age pe sada bangsa na buei ahu, ai ipasu-pasu Jahowa do hanami ronsi nuan?”
15 Nini si Josua ma, “Anggo bangsa na buei do nasiam tangkog ma nasiam hu harangan, imas ma bani nasiam ijai, i tanoh ni halak Peresi pakon Refai, anggo masompittu bani nasiam Dolog Efraim.”
16 Jadi nini ginompar ni si Josep ma, “Seng sungkup tanoh dolog ai bennami; tapi margareta bosi do haganup halak Kanaan, na marianan i tanoh hornop, ai ma na i Bet-Sean pakon dusunni age na i pamah Jesreel.”
17 Nini si Josua ma dompak ginompar ni si Josep, hubani Efraim pakon Manase, “Bangsa na buei do ham, anjaha na banggal do kuasamu, seng dapotan sada parbagianan tumang ham,
18 tapi dolog ai ma bamu, ai age pe harangan ai, maningon imasonmu do ai, anjaha bamu ma ai das hu pispis sidaohanni. Ai maningon usironmu do sidea, age pe margareta bosi sidea anjaha gogoh.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA