Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Embus terompet, embus tanduk i datas Deleng Sion, deleng si Badia nu Dibata. Gentarlah, o kalak Juda! Wari TUHAN nggo ndeher.
2 Wari kegelapen dingen gelap mesangat, wari si geltem dingen meremang. Sada bala labang nggo reh huyak ras megegeh, desken kegelapen nutupi deleng-deleng. Ndiganai pe langa pernah lit bage, janah ndigan pe lanai pernah jadi bage.
3 Desken api ipanganina sinuan-sinuan. Idapetina negeri desken Peken Pardis tapi itadingkenna bali ras gurun pasir. La lit si pulah ibahanna.
4 Tempasna bali ras kuda; perkiamna bali ras kuda perang.
5 Lompat-lompat i datas deleng-deleng erderik-derik desken gereta perang; erderak sorana desken dukut kerah ipan api. Erbaris ia desken tentera si nterem si ersikap lawes erperang.
6 Adi reh deherna ia, nggirgir kalak kerina; kerina ayo sambar jadi mbulan.
7 Ia nerang desken serdadu si mbisa, inangkihina tembok desken tentera. Pinter perdalanna ku lebe, la ia nilah i bas dalanna nari,
8 la ia si jemba-jemban, iderpana kerina kasa kai si ngolangi, janah ise pe la ngasup pengadisa.
9 Radu ras ia kerina nerang kota e, kiam ia arah babo tembok. Inangkihina rumah, jenari bengket ia arah jendela desken pinangko.
10 Doni enda mundu-undu langit nggirgir tupung reh ia erdalan. Matawari ras bulan jadi gelap, janah bintang-bintang pe lanai ersinalsal.
11 TUHAN erlenggur merentahken TenteraNa. Serdadu si ngikutken PedahNa nterem dingen seh kal gegehna. Andiko mejinna wari TUHAN e! Ise kin ngasup nahankenca?
12 Nina TUHAN, "Genduari jeralah kam dahilah Aku alu erpuasa dingen tangis janah erceda ate.
13 Bahan maka pusuhndu si getem encidahken atendu ceda. Adi uisndu saja nge icaingkenndu la kap bias." Jeralah kempak TUHAN Dibatandu. Ia melias dingen dem perkuah ate. Ia persabar janah tetap IcikepNa PadanNa. Tetap Ia nggit ngalemi dosandu, jenari la kam IukumNa.
14 Mbera-mbera erkusur ukur TUHAN Dibatandu, jenari ipasu-PasuNa kam alu pangan riba-iba. Kenca bage banci ipersembahkenndu, pangan ras inemen man BaNa.
15 Embuslah terompet i datas Deleng Sion; suruh kalak erpuasa lebuhlah perpulungen!
16 Pepulung jelma si nterem kerina; sikapken ia guna perjumpan si badia, baba kalak si nggo metua, pepulunglah danak-danak ras anak gara-gara pe. Kalak si mbaru erjabu pe arus ikut reh nadingken bilikna.
17 Imam-imam si ngelai TUHAN, kelang-kelang batar-batar ras dalan bengket ku Rumah Pertoton, arus maka tangis janah ertoto nina, "O TUHAN cidahken min perkuah AteNdu man BangsaNdu." Ula pelepas bangsa si deban megombang dingen nguru-nguru kami alu ngataken, "I ja kin Dibatandu?"
18 Emaka iperdiateken TUHAN ka NegeriNa, nggo mekuah AteNa kempak BangsaNa.
19 Nina ngaloi bangsa e, "Genduari Kubereken ateKu man bandu gandum, anggur ras minak saitun, emaka besur me kam. Bangsa-bangsa si deban lanai nggombangi kam.
20 Kupelawes bala labang si rehna i Utara nari. Kupelawes ia deba ku bas gurun pasir, barisenna si arah lebe Kugera ku Lawit Merah, barisenna si arah pudi ku Lawit Tengah. Bangkena jadi mbau. Kukernepken ia kerina erkiteken si nggo ibahanna man bandu.
21 O juma-juma, ula mbiar, tapi ersurak janah meriahlah erkiteken kerina si ibahan TUHAN man bandu,
22 O rubia-rubia, ula mbiar. Mbalmbal inganndu nggagat meratah, batang kayu erbuah ka, batang ara ras batang anggur meramis buahna.
23 O kalak Sion ersuraklah meriahlah atendu i bas TUHAN Dibatandu, sabap IberekenNa man bandu paksa perudan rikutken payona nggo IkusekenNa man bandu paksa udan, IberekenNa man bandu sumbul udan bagi si nggona.
24 Ingan pengeriken dem alu gandum; lubang-lubang deher ingan mereh sampur lau anggur ras minak saitun.
25 Kuulihken man bandu kai si nggo bene, i bas tahun-tahun tupung labang mangani gandumndu. Aku kap si nuruh bala labang e ngelawan kam.
26 Emaka nggo melala me si man panganndu, seh maka riba-iba kam. Ipujindu me TUHAN Dibatandu, si ngelakoken perkara si mejin man bandu. BangsangKu ndigan pe lanai igombangi kalak.
27 Kenca bage makana, o Israel, IetehNdu maka Aku kap i tengah-tengahndu, maka la lit kap si deban seakatan Aku kap ngenca TUHAN Dibatandu. BangsangKu ndigan pe lanai igombangi kalak.
28 Kenca si e Kukuseken me kesahKu man kerina kalak; anak-anakndu si dilaki ras si diberu meritaken katangKu; pertua-pertuandu ernipi, anak-anak peranandu ngidah pengenehenen.
29 I bas paksa e Kukuseken KesahKu subuk man suruh-suruhen si dilaki ntah si diberu."
30 I bas wari e Kubahan tanda-tanda i langit ras i doni eme: dareh, api, ras cimber bagi embun.
31 Matawari jadi gelap bulan salih jadi megara bagi dareh, ope denga -- reh wari TUHAN si mbelin dingen mejin e.
32 Tapi kerina kalak si mindo penampat man TUHAN terkelin kap. Bagi si ikataken TUHAN, "Kalak si i Jerusalem terkelin kap deba. Kasa kai kalak si Kupilih tetap nggeluh."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA