Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini si Job ma mambalosi,
2 “Ah, ambit tangkas ma namin itimbang pusok ni uhurhu, anjaha ganup sitarononku itibalhon bani timbangan!
3 Ra boratan ma ai nuan humbani horsik na i topi ni laut, halani ai do ase lepak-lepak parsahapku.
4 Ai marpantikan do bangku panah ni Pargogoh Na So Tarimbang in, ionsop tonduyhu do bisani; songgot-songgot ni Jahowa marodor manunsahi ahu.
5 Tumaram ma marlingik halode harangan anggo sungkup do poyon-poyon sampalonni? Barang marumboh lombu anggo sungkup do gagatonni?
6 Mintor tarpangan ma na so mardai lang pala margaram? barang mardai do silopak ni tolur?
7 Magigi do ahu manjamah ai; songon sipanganon na maginei do ai bangku.
8 Ah, sai jumpah ma namin na hupindo, anjaha ibere Naibata ma namin sura-surangku.
9 Ambit marosuh ma namin uhur ni Naibata manropuki ahu, anjaha idurdurhon tangan-Ni manrotapkon hosahku!
10 Na boi gabe apoh-apoh bangku, anjaha marolob-olob ope ahu ibagas na maborit na so maralang-alang, ai ma, halani seng huparnalang hata ni Na Mapansing in.
11 Ai aha ope gogohku, ase mangarap ope ahu? Anjaha aha ope siarapkononku, ase boi marsabar ni uhur ahu?
12 Ai doskon gogoh ni batu gogohku, barang tombaga angkulangku?
13 Tongon, seng dong be pangurupion bangku, anjaha na boi haluahon bangku domma mandaoh humbangku.
14 Halak na lang padalan holong atei bani hasomanni, ai ma na manalduskon biar dompak Pargogoh Na So Tarimbang in.
15 Seng hatengeran saninangku, ai songon bah etek, songon bah na marbanggal do sidea,
16 bah na gombur ibahen es, anjaha salju mabaor malala hubagas;
17 na marsik sanggah logo ni ari, anjaha anggo milas ari horah do iananni.
18 Marlegot-legot do pardalanni, laho hu halimisan, lanjar magou.
19 Manatap-natap do kafilah na hun Tema dompak jai, anjaha saudagar na hun Seba mangarap hunjai.
20 Hiranan do sidea bani pangarapan ni sidea ai, roh sidea hujai, gabe tarbador do sidea.
21 Usih hujai do hanima nuan bangku, ididah hanimahonsi otik na majangin mabiar ma hanima.
22 Ongga huhatahon, ʻBere otik bangku?ʼ Barang, ʻBoan hanima siluah bangku humbani artanima?ʼ
23 Barang, ʻPaluah ma ahu humbani tangan ni sipanunsahi?ʼ Barang, ʻTobus ma ahu humbani tangan ni sipangunsagahkon gogoh?ʼ
24 Ajari hanima ma ahu, ase sip ahu; patugah hanima bangku, ija ahu kahou.
25 Margogoh tumang do hata hasintongan. Tapi aha ma arti ni hutuk-hutuknima in?
26 Ai na sihol maminsang parsahapan do uhurnima? Doskon logou do hiraon sahap ni sada halak na marpandoleian?
27 Dakdanak na tading maetek pe ra do hanima marruji-rujihon, sonai homa manjualhon hasomannima pe.
28 Ai pe, dompakkon hanima ma ahu; ai seng ra ahu marladung i lobeinima.
29 Parimbagaskon hanima ma, ulang masa na so pintor. Nai ma, parimbagaskon hanima ma, totap do hapintoronku.
30 Ai adong na lepak bani dilahku? Mintor seng ma nani ibotoh pamanganku mangahap na ija na salah?”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA