Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Appialimi Ayub ri Batara, angkana "Kuassengi o, Batara, angkana iKattemi Kaminang Koasa; manna apa akkulleji Kigaukang.
2 (42:1)
3 Kikuta’nanga’ angkana angngapa kubarani ranggasela ri kacara’dekanTa nampa inakke kalengku tena apa-apa kuasseng. Kupaui apa-apa tenaya nakupahangi, apa-apa sannaka appakalannasa’na ri kalengku anne.
4 Kisuroa’ appilangngeri ri wattunTa a’bicara, siagang appiali punna akkuta’nangKi’.
5 Riolo, pangngassengangku mae ri Katte apa kulangngere’ji battu ri taua, mingka kamma-kamma anne kuassengKi’ lanri assidallekangKi’.
6 Lanri kammana anjo, tu’guru’ siri’-sirika’ punna kuu’rangi sikamma kana-kanangku na kusassala’ kalengku ammempoma’ lalang ri limbu’buka siagang aua."
7 Le’ba’na a’bicara Batara mae ri Ayub, Nakanamo Batara mae ri Elifas, "LarroA’ ri kau siagang ruaya agannu, lanri teai apa sitojennaya nupau ri KalengKu. Mingka atangKu Ayub tena nakamma anjo.
8 Jari, angngalleko kamma-kamma anne tuju kayunna sapi laki siagang tuju kayunna bembe laki, nampa a’lampako mange ri Ayub. Passareang ngasengi anjo sikammaya, a’jari koro’bang untu’ kalennu. Lappala’ doangi Ayub untu’ ikau ngaseng, nampa laKupilangngeri pappala’ doanna. Tena nalaKupakasirikko, manna nusiratang annarima hukkungang. Teai kammatojenga nupau ri passala’na KalengKu, mingka Ayub napaui kammatojenga."
9 Nagaukammi Elifas, Bildad siagang Zofar, anjo apa Napassuroanga Batara, siagang Natarimami Batara pappala’ doanna Ayub.
10 Nampa, ri le’ba’namo Ayub appala’ doang untu’ anjo tallua aganna, nipa’jari kalumanynyammi ammotere’ ri Batara; a’lappi ruami kakalumanynyanganna na rioloa.
11 Sikontu daenna siagang sari’battang bainena Ayub, sikontu passiassengang sallona, battumi angkunjungi, nampa assua’-suara’ siagang ia ri balla’na. Massing napaumi ke’nanga angkana turu’ tongi susa ke’nanga lanri sikontu susa le’baka Napabattu Batara mae ri kalenna, nampa nasaleori Ayub. Massing assaremi ke’nanga ri Ayub siapa are jaina doe’ siagang tasse’rena cincing bulaeng.
12 Nibarakkakimi Ayub ri Allata’ala la’bi-la’biangngang pole lalang sesa tallasa’na, na ri tenanapa nale’ba’ nituju ri bala. Nia’ napatang Ayub barang-barang: 14.000 kayu gimbala’, 6.000 kayu unta, 2.000 kayu sapi, siagang 1.000 kayu keledai.
13 Anggappai tuju ana’ bura’ne na tallu ana’ baine.
14 Ana’ baine toana niarengi Yemima, makaruaya niarengi Kezia, siagang bungkoa niarengi Kerenhapukh.
15 Ri sikontu anjo pa’rasanganga tenamo sangkammanna ga’gana anjo tallua ana’ bainena Ayub. Nisaremi ke’nanga pambageang battu ri warisi’na manggena, sangkamma sari’battang bura’nena ke’nanga.
16 Le’baki anjo attallasa’ iji Ayub sibilangngang patampulo taung sallona, sa’genna narapi’ iji nacini’ sikamma cucu-cucunna siagang massing ana’-ana’na anjo cucu-cucunna.
17 Nampa matemo Ayub lalang ri toa dudunamo umuru’na.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA