Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 [Kenca bage erjabap ka Elipas nina,] "Cakapndu ena Jop, cakap si sea-sea kap.
2 (Ayb 15:1)
3 Labo lit kalak pentar i ja pe si ngerana bagi kam e. Labo ia nggit mbela dirina.
4 Adi iikutken katandu ena, lanai lit kalak erkemalangen tah ertoto man Dibata.
5 Arah cakapndu tangkas maka kam ersalah tuhu-tuhu, tapi alu kebeluhen ngerana lepakndu ibunikenndu.
6 La perlu kam kuukum, sabap kata-katandu jine ngukum kam.
7 Akapndu kin kam manusia si pemena? Nggo kin kam lit ope deleng-deleng itepa?
8 Idengkehndu kin kai rencana Dibata? Kam kin ngenca si mada kepentaren manusia?
9 Pemetehndu labo lebih asa pemeteh kami; pengertinndu pe labo ngelebihi kami.
10 Kepentaren kami idat kami i bas tua-tua si nggo ubanen, janah ope bapandu tubuh, nggo ia lit leben.
11 Kurang meherga kin akapndu ndia maka itulakndu pengapul Dibata? Nggo ibelasken kami bekas KataNa jine, alu manjar-anjar dingen medale.
12 Tapi ngkai maka pusuhndu gara dingen matandu merlang?
13 Merawa kam kempak Dibata dingen alu katandu ndai ilawanndu Ia.
14 Adi manusia, banci kin la lit sitik pe dosana? Banci kin ia benar i adep-adepen Dibata?
15 Nandangi MalekatNa pe la tek Dibata la lit sada pe bersih i bas PengadilenNa;
16 apai ka nandangi manusia si meluat dingen ilat, si bali akapna ras minem lau ngelakoken si jahat?
17 Begiken, Jop, enda kuturiken si nggo kuidah man bandu,
18 bage pe si nggo iajarken kalak pentar man bangku. Kepentaren e idatca i bas nini-ninina nari, si la sitik pe ngahanken pemetehna terbuni.
19 Sanga si e langa lit bangsa si deban i bas negerina, la lit si mabai ia papak nandangi Dibata.
20 Kalak jahat si merawa nipu, kidekah geluhna tetap mbiar dingen aru.
21 Sora si mejin ibegina la erngadi-ngadi, i tengah-tengah kesenangenna ia irampuki.
22 La lit arapenna pulah i bas kegelapen nari, sabap pedang si nampul ia nggo nimai,
23 perik-perik pe sangana tertima-tima, gelah bangkena ipanganina. Genduari nggo itehna, matawari si pagi gelap man bana.
24 Desken sekalak raja si mbisa, mara nggo sikap nggempangisa.
25 Bage me kalak si ngelawan Dibata, si pang nimbang si Mada Kuasa.
26 Alu megombang ilawanna Dibata; perban mekapal ampang-ampangna, akapna banci ngeligeni ia.
27 Tuhu nggo senang gia akapna nggo melala ipepulungna erta;
28 kota-kota pe ikuasaina dingen irampasina rumah-rumah si nggo itadingken empuna. Tapi kota-kota ras rumah-rumah si bage, nandangi kernep dingen bene.
29 Kebayaken masap la tahan ndekah, bekasna ndube pe lanai teridah.
30 I bas kegelapen nari la banci ia pulah. Desken kayu kap ia, tunasna kerah ibahan api si gara. Reh ka pe angin si rembus, bungana nartar jenari melus.
31 Adi ernalem ia kempak kejahaten si sia-sia, e nipu bana me kap gelarna; ngalo upah me ia dungna, upah kejahaten si la erguna.
32 Mate me ia ope paksana seh, lanai mulihi meratah desken dahan kerah.
33 Ia bali ras batang anggur, langa pe tasak, buahna nggo nartar. Desken batang saitun, bungana keri ndabuhen.
34 Kalak si la erdibata, la lit kesusurenna. Janah keri ipan api rumah si nipajekken arah duit penipun.
35 Bage me kalak si ngerancang ras ndalanken kejahaten, perukurenna dem alu pertakin."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA