Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dob ai nini si Sopar, halak Naama ai ma mambalosi,

² “Mintor lang ma balosan halak sibuei sahap, anjaha tumaram ma pintor halak sihertep bibir?

³ Mintor boi ma sahap-sahapmin pasip halak, anjaha manrehei hape seng dong na pabador ho?

⁴ Nim do, ʻPitah do podahku, anjaha bujur do ahu i lobei-lobei-Mu.ʼ

⁵ Tapi tene, ambit marsahap ma namin Naibata, ibuha namin pamangan-Ni dompak ho,

⁶ anjaha ipatugah bam rusia ni hapentaran-Ni, ai ipaganda ai do pangarusion. Botoh ma, na marpangulaki ope uhur ni Naibata bam pasal hajahatonmu.

⁷ Mintor tardadap ho ma rusia ni Naibata? Mintor tararusi ho ma hagokdearon ni Pargogoh Na So Tarimbang in?

⁸ Gijangan do ai ase langit, aha ma boi ibahen ho? Bagasan do ai ase nagori toruh, aha ma ibotoh ho?

⁹ Ganjangan do sibar-sibar-Ni humbani tanoh on, anjaha bolagan humbani laut.

¹⁰ Anggo montas Ia laho manrantei, anjaha idilo hu paruhuman, ise ma na boi manlanglangi-Si?

¹¹ Ai itandai do halak sipakulah-kulah, ididah hajahaton, seng pala lobei ipareksa.

¹² Ai boi do halak na lontong dapotan uhur, atap anak ni halode salih gabe jolma?

¹³ Anggo ipasirsir ho uhurmu, anjaha ipaherbang ho tanganmu dompak-Si

¹⁴ (anggo adong hajahaton ibagas tanganmu, padaoh ma ai, anjaha ulang paturut hagedukon marianan ibagas lampolampomu),

¹⁵ ijai ma tarbahen ho padirgak bohimu, seng pala bador; totap ma uhurmu, anjaha seng marhabiaran.

¹⁶ Lupa ma ho bani sitarononmu; songon bah na dob salpu mabaor, pardingatmu ijai.

¹⁷ Jadi siangan ma goluhmu humbani tongah ari, hagolapanni ai, songon golap sogod-sogod hansa.

¹⁸ Martenger ni uhur ma ho, ai adong do pangarapanmu; dob mangkawah ho inggot, sonang ma ho modom.

¹⁹ Patibalonmu ma dirimu, seng dong na mambibiari; anjaha buei ma halak na mangindahi holong ni atei bam.

²⁰ Tapi horlom do mata ni halak parjahat, seng dong haporusanni; sada mando pangarapanni, ai ma rotap ni hosahni.