Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakanamo Zofar, "Tenaka nanipiali anjo bicara kosonga? Appaka musti nipattojengi anjo tau jaia je’ne’ bawana?
2 (11:1)
3 Ayub, nukanaka takkulleai ikambe ampialiko? Nukapangi angkana lammakkangi ikambe lanri pacau-caunu?
4 Turu’ ri panggappanu, tena nasala anjo kana-kanannu; turu’ ri pikkirannu, tangkasakko ri dallekanNa Allata’ala.
5 Mingka, dasi-dasi naKalenNa Allata’ala a’bicara!
6 Siagang dasi-dasi nanipauangko ri Ia, angkanaya anjo kacara’dekanga jai lampa-lampana, siagang takkulleai napahang rupataua. Mingka angngu’rangiko angkana tena nasiapa pa’risi’nu, punna nipasitimbangi hukkungang siratanga nutarima.
7 Masakang akkullei nuselangngi bone mailalanNa Allata’ala? Masakang akkulleko ampahangi koasaNa?
8 KoasaNa la’bi tinggi na langika; takkulleai nurapi’ siagang nukayao. KoasaNa la’bi lantangi na linona tau matea, takkulleai nupahang ngaseng.
9 KoasaNa Allata’ala la’bi luaraki na linoa, la’bi la’baki na tamparang lompoa.
10 Punna Najakkalakko siagang Naerangko mange ri pangadelanNa, inai maka labarani anrompai eroka Nagaukang?
11 Naassengi Allata’ala tau nangaia a’balle-balle; kaja’dallanna ke’nanga tena natassala ri matanNa.
12 Punna anrong keledai liara’ allassukang keledai annaba, nampami akkulle tau toloa a’jari cara’de’.
13 Ayub, tangkasi pa’mai’nu, nampa assesse’ lalang! Appala’ doangko mae ri Allata’ala!
14 Pelaki dosaya battu lalang ri atinnu siagang pakabellai kaja’dallanga battu ri balla’nu!
15 Nanukkulle andallekangi tallasaka siagang sa’bara’ na barani; lammenteng kassakko siagang tena nuparallu lussa’,
16 ba’lalo pa’risi’nu tenamo nanuu’rangi; sanrapang a’ba naungamo, nikaluppaimi ri taua.
17 Lasingarangngammi tallasa’nu na singara’na alloa, na wattu-wattu sassanga lalang tallasa’nu lasingara’ kammami singara’ bari’basaka.
18 Lamajarrekko siagang jai panrannuannu; laNajagaiko Allata’ala sa’gennu amang.
19 Tena nulamalla’ mae ri musua; jai tau lappala’ tulung mae ri kau.
20 Mingka tau ja’dalaka lalingui paccini’na, saba’ tena pannulunna ke’nanga. Se’reji bawang panrannuanna ke’nanga iamintu a’jala’na labattu linta’."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA