Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Saellana jareya Zofar ngoca’, "Apa oreng se bannya’ caca ta’ parlo esaodi? Apa oreng se bannya’ colo’ ta’ parlo esala’agi?
2 (11:1)
3 Ayyub, apa bi’ ba’na sengko’ sakanca esangka ta’ tao nyaot? Neng-enneng esanggu polana eca’-koca’e ba’na?
4 Menorot pekkeranna ba’na sabarang se ekoca’agi ba’na jareya ta’ sala; menorot anggebbanna ba’na, ba’na reya berse e ajunanna Allah.
5 Tape, moga Allah dibi’ adhabuwa ka ba’na!
6 Moga ba’na eparengngana oneng bi’ Salerana, ja’ hekmat reya bannya’ macemma ban tadha’ manossa se ngarteya. Sopaja ba’na ngarteya ja’ kasangsara’an se etanggung ba’na jareya sanyatana ta’ sabarampa mon ebandhing ban kasala’anna ba’na, se sabagiyan e antarana ta’ ebitong bi’ Guste Allah.
7 E dhimma ba’na se pahama parkara hakekadda Allah? E dhimma ba’na se ngarteya parkara kobasana?
8 Kobasana atenggiyan dhari langnge’, ta’ kera ekenneng jangngo bi’ ba’na. Kobasana adhalemman dhari dunnyana oreng mate, ba’na ta’ kera ngarte maske sakone’a.
9 Kobasana Allah araja’an dhari bume, alebaran dhari tase’ raja.
10 Mon Allah nangkep ba’na sarta abakta ba’na ka pangadilanna, sapa se bisa’a lang-ngalange Salerana?
11 Allah ngagali ka oreng se dujan lecegan saneyap kajahadanna ta’ lopot dhari pangoladanna.
12 Mon hemar alas abudhu’ hemar se notot, buru oreng budhu daddi penter.
13 Ayyub, mara ba’na paberse atena, atobat dhari sa-dusana! Adu’a nyo’on ka Allah!
14 Buwang dusa dhari atena, pajau kajahadan dhari bengkona.
15 Daddi ba’na olle ngadhebbi odhi’ reya kalaban ate sabbar ban bangal; koko ban ta’ mangmang pekkerra.
16 La’-mala’ ba’na ta’ kera enga’ ka kasossa’anna, akantha banjir se asat ta’ ekaenga’e oreng settonga.
17 Odhi’na ba’na bakal lebbiya terrang dhari are seyang, ban odhi’na ba’na se calemodan bakal padha’a ban tera’na pajjar.
18 Ba’na bakal kokowa ban andhi’ pangarebban se kowat; ban ba’na arassa aman sabab elindhunge Allah.
19 Ba’na ta’ kera tako’ ka moso; ban bannya’ oreng entar ka ba’na menta’a tolong.
20 Tape oreng se jahat bakal ngabasa kabingongan, sabab ta’ nemmo jalan ban partolongan. Se daddi pangarebbanna coma anante’ bila se mateya."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA