Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E nagara Us badha oreng lalake’ nyamana Ayyub. Oreng jareya abakte ka Allah sarta esto ka Salerana; becce’ atena ban ta’ tao alampa’agi barang se juba’.
2 Pottrana lalake’ kapetto ban babine’ katello.
3 Dunorra bannya’, dumbana pettong ebu meggi’, ontana tello ebu meggi’, sapena saebu meggi’ ban hemarra lema ratos meggi’. Pandha’na, Ayyub jareya oreng se paleng sogi e antarana pandhudhu’ dhaera Temor.
4 Pottra lalake’anna se kapetto jareya andhi’ kabiyasa’an te-ganteyan mabadha pesta e bengkona bang-sebang. Mon teppa’ apesta, tra-pottra babine’anna eonjang keya, kabbi pas padha adhadha’aran areng-bareng.
5 Sabban badha pottrana se mare apesta, kalagguwanna Ayyub tanto abungo gu-laggu, ngatorragi kurban ka PANGERAN sopaja tra-pottrana esapora. Ca’na panggaliyanna olle daddi tra-pottrana agabay dusa ban ya-nyeya Allah maske ta’ etengnget.
6 E settong are lok-mahlok sowarga ngadhep ka PANGERAN. Se Panggudha noro’ ngadhep keya.
7 Dhabuna PANGERAN ka Se Panggudha jareya, "Dhari dhimma ba’na?" Saodda Se Panggudha jareya, "Abdidalem buru dhateng alengleng saantero bume."
8 Dhabuna PANGERAN, "Ba’na apa ngabassagi Ayyub Tang abdi rowa? E saantero bume tadha’ oreng se talebat estona ban becce’ atena akantha Ayyub jareya. Salanjangnga abakte ka Sengko’ ban ta’ tao alako jahat sakale."
9 Se Panggudha nyaot, "Tanto saos Ayyub abakte ka Junandalem sabab Ayyub narema opana.
10 Aba’epon sareng ana’ binena sareng sadajana dhi’-andhi’na ejaga terros sareng Junandalem. Ponapa se elakone eberkadi sareng Junandalem; sareng Junandalem jugan eparenge ebin, cokop mossa’e saantero nagara.
11 Namong, saompamaepon dhi’-andhi’epon sareng Junandalem epondhut, tanto Ayyub gapaneka abasto ka Junandalem."
12 Dhabuna PANGERAN ka Se Panggudha, "Iya, mara, sateya soka’na ba’na, epabaramma’a bai dhi’-andhi’na Ayyub jareya, poko’na ja’ sampe’ sake’e orengnga!" Se Panggudha jareya laju nyengla dhari jadhiya.
13 Ta’ saapa abidda dhari jareya tra-pottrana Ayyub teppa’na apesta e bengkona pottrana se sareyang.
14 O-tao badha otosan ka’-berka’ ka compo’na Ayyub, atotoran kantha reya, "Towan, abdina sareng la-kabula se laen eserrang oreng Syeba e bakto pe-sape kalerressan nyalaga teggal, sareng mar-hemar kalerressan ngamba e seddi’annepon teggal gapaneka. Sadajana keban gapaneka erampas, sadajana kabulaepon panjennengngan se badha e ka’issa’ epate’e. Namong abdina kasorang se salamet, daddi kengeng ngatore oneng ka panjennengngan."
15 (1:14)
16 Teppa’na oreng jareya gi’ acaca, pas dhateng kabula laenna ka jadhiya, oca’na, "Ba-dumbaepon panjennengngan sareng sadajana oreng ngowanna padha mate etappor kelap. Namong abdina kasorang se salamet, daddi kengeng ngatore oneng ka panjennengngan."
17 Oreng jareya gi’ ta’ mare acaca, pas badha kabulana se nomer tello’ dhateng abala kantha reya, "Badha tello pasukan bigal Kasdim arampok ta-ontaepon panjennengngan; la-kabulaepon panjennengngan epate’e sadaja. Namong abdina kasorang se salamet, daddi kengeng ngatore oneng ka panjennengngan."
18 Teppa’na kabula jareya gi’ acaca, pas badha kabula laenna, ngoca’ kantha reya, "Tra-pottraepon panjennengngan kalerressan apesta e compo’na pottrana se sareyang.
19 Neng-oneng badha angen barat dhari tase’ beddhi; compo’epon pottrana panjennengngan gujur, tra-pottrana panjennengngan adinggal dunnya sadaja. Namong abdina kasorang se salamet, daddi kengeng ngatore oneng ka panjennengngan."
20 Ayyub ngadek, pas nyebbit rasoganna menangka tandha sossa. Rambudda ecokor, pas asojud sambi adhabu,
21 "Sengko’ lahir ta’ ngeba pa-apa, sengko’ mateya ta’ ngeba’a pa-apa keya. PANGERAN se apareng, PANGERAN keya se mondhut. Molja’agi asmana!"
22 Daddi, maske ngadhebbi mosiba se acem-macem jareya, Ayyub ta’ agabay dusa ban ta’ nyala’agi Allah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA