Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Enda me kata si ibereken Dibata man bangku kerna kota Babil ras kalak si ringan i je:
2 "Momokenlah berita enda man bangsa-bangsa! Bereken tandana jenari momokenlah berita enda! Ula buniken! Babil nggo ndabuh! Merodak dewana nggo meripuk! Berhala-berhala Babil nggo juru! Gana-gana si mbau e nggo idedehi!
3 Sada bangsa i Utara nari nggo reh nerang Babilon. Ijadikenna negeri e jadi gurun pasir. Jelma ras rubia-rubia kiamen. Lanai lit kai pe si nggeluh i je."
4 Nina TUHAN, "Tupung paksa e reh me kalak Israel ras Juda iherna tangis ndarami Aku Dibatana.
5 Isungkunina me dalan ku Sion emaka idalanina arah dalan e. Ibahanna me sada perjanjin ras Aku janah ndigan pe lanai ilanggarna.
6 BangsangKu bali kap ras biri-biri si ipelepas permakanna bene i datas deleng-deleng. Nggo papak ia i datas deleng-deleng janah lanai ingetca dalan mulih ku kutana.
7 Asa kalak si jumpa rassa ngerigepsa. Nina imbang-imbangna: 'Kalak enda erdosa kempak TUHAN. Emaka kai si ibahan kita man bana labo kita salah. Nini-ninina ernalem man TUHAN, emaka ia pe jine arus tetap tek man TUHAN.'
8 O kalak Israel kiamlah i Babilon nari! Tadingken negeri e! Jadilah kam si pemenana lawes.
9 Kuaturken ateKu sada terpuk bangsa-bangsa si megegeh i Utara nari. Kubahan maka iserangna Babilon. Erbaris ia i peperangen ngelawan negeri e, jenari irebutna negeri e. Si mbisana manahken anak panahna alu kebeluhen si lanai tanggung-tanggung la pernah la kena ku sasarenna.
10 Babilon jadi rampasen perang dingen kalak si ngerampassa muati kai atena si ibuatna. Aku TUHAN kap si nggo melasken ranan enda."
11 Nina TUHAN, "O kalak Babilon, irampukindu bangsangKu. Meriah dingen senang iakapndu, erdalan desken lembu si ngerik gandum, desken kuda si erngih-ngih.
12 Tapi kotandu si mbelin e ihina dingen ijuruken. Babilon me pagi si meterukna i bas kerina bangsa-bangsa. Ia jadi taneh tenggiring dingen gurun pasir si kerah.
13 Erkiteken rawangKu si gara, lanai banci lit sekalak pe enggeluh i Babil. Jadi runtuh-runtuhen si ergun-gun me ia. Kerina kalak si mentas arah e sengget dingen mamang atena.
14 Kalak pemanah, erbarislah guna erperang ngelawan Babil dingen kepunglah. Pulahi anak panahndu kempak Babil, sabap nggo erdosa ia kempak Aku, TUHAN.
15 Surakkenlah surak-surak perang sekelewet kota. Genduari nggo terkepung Babil. Benteng-bentengna nggo pecah dingen meruntuh. Erbalas Aku man kalak Babilon. Emaka erbalaslah kam kempaksa. Bahanlah man bana bagi si ibahanna man kalak si deban.
16 Ula pelepas kalak nuan i bas negeri e. Ula pediat kalak rani. Kerina kalak pertandang si lit i je mbiar i perang tentera, emaka mulih ia kerina ku kutana."
17 Nina TUHAN, "Kalak Israel bali kap ras biri-biri si iayak-ayak dingen ihuntakken singa. Si pemena raja Assur nerangsa, dungna Nebukadnesar raja Babil ngkilkili tulan-tulanna.
18 Erkiteken si e, Aku TUHAN si Mada Kuasa Dibata nu Israel la banci la ngukum Nebukadnesar ras negerina bali ras pengukumenKu man raja Assur.
19 Kupemulih me bangsangKu ku negerina jine. Ipanna me pangan si turah i Deleng Karmel dingen i daerah Basan. Besur me ia erkiteken rate-ate man buah gandum si turah i daerah Eperaim ras Gileat.
20 Adi nggo seh paksa si e, lanai lit ijumpai dosa i Israel, lanai lit kejahaten i Juda, sabap Kualemi me kalak si Kupelepas denga enggeluh. Aku TUHAN kap si nggo melasken ranan enda."
21 Nina TUHAN, "Peranglah kalak Marataim ras Pekod. Bunuh dingen kernepkenlah ia. Lakokenlah tep-tep kai si Kuperentahken man bandu. Aku TUHAN kap si nggo melasken ranan enda.
22 I bas negeri e terbegi me gejek sora perang janah jadi me kecedan mekelek i je.
23 Mbarenda nggo getem kal doni enda ipalu Babilon. Genduari palu-palu e ka nggo ka meripuk. Kerina bangsa-bangsa sengget kerna kai singgo jadi kempak negeri e.
24 O, Babilon ilawanndu Aku, janah kam nggo kena siding si Kutogeng man bandu, alu la ietehndu.
25 Ingan penimpanen senjatangKu nggo Kutalangi. Alu rawangKu si gara nggo Kupedarat senjata e kerina, sabap Aku TUHAN si Mada Kuasa si Erdolat lit si man dahinKu i Babilon.
26 Perangilah ijapa nari pe, pecahken lumbung-lumbungna gelah talang! Pegun-gunlah barang rampasen e bagi pinugun page! Kernepken negeri e! Ulanai sitik pe tadingken ia!
27 Bunuhi kerina tenterana! Gelehi kerina! Bagenda me jadina man kalak Babilon! Nggo seh paksa pengukumen bana!
28 (Pengongsi-pengongsi si pulah i Babilon nari dingen seh i Jerusalem, nuriken uga TUHAN Dibatana erbalas man bangsa Babilon kerna pernembehna nandangi Rumah Pertoton TUHAN.)
29 Kataken maka iperang kalak pemanah e Babil. Suruh kerina ndarat asa si beluh make panah ras anak panah. Kepung kota e, ula bere sekalak pe pulah. Ulihken man bana kerina si nggo ilakokenna. Bahan man bana bagi perbahanenna man kalak. Sabap si ilakokenna e, eme perbahanen si megombang ngelawan Aku, si Badia nu Israel.
30 Emaka bunuhilah kerina anak peranana i bas gedang-gedang dalan kota e. Kerina tenterana la banci la ikernepken i bas paksa e. Aku TUHAN kap si nggo melasken ranan enda.
31 O kalak Babilon si megombang. Aku TUHAN si Mada Kuasa si Erdolat, Aku kap imbangndu! Nggo seh paksana Aku ngukum kam.
32 Kam bangsa si megombang la banci la terantuk dingen guling janah la lit kalak si nampati kam keke. Kuciluk ateKu kota-kotandu. Kukernepken ateKu si lit i sekelewetna."
33 Nina TUHAN si Mada Kuasa, "Radu ras kalak Israel, Juda nggo itindih. Kerina kalak si nggo naluken dingen naban ia la ipelepasna lawes.
34 Tapi kalak si mulahi ia megegeh kap -- TUHAN si Mada Kuasa kap GelarNa. Ia jine kap si ngerunggui perkara BangsaNa. Iberekenna dame ku doni enda, tapi man Babilon iberekenna kiniseran."
35 Nina TUHAN, "Reh me pedang nampul Babilon! Nampuli kalak si ringan i je. Nampul pengulu-pengulu ras kalak si pentar.
36 Pedang reh nggeleh nabi-nabi perguak. Andiko bodoh kal kepe ia! Pedang reh nebak tenterana. Andiko enggirgir kal kap ia!
37 Kernepkenlah kerina kuda ras geretana! Pedang reh nampul tentera upahenna. Andiko kote kal ia kerina! Kernepkenlah kebayakenna; rampuki ras rampasilah!
38 Bahan maka sekali-sekali reh kelegon i negeri e, kerahi lau belinna. Babilon eme negeri si dem alu gana-gana si mejin eme si nebu-nebu kalak si ringan i je.
39 Emaka rubia-rubia si meliar, serigala ras perik unta nari ngenca pagi ringan i Babil. Ndigan pe lanai lit i je kalak si tading, asa ndigan pe lanai.
40 Jadi me man Babil bali ras Sodom ras Gomora bali ras tupung ia ku kernepken ras kota si lit i sekelewetna. Asa ndigan pe i je lanai lit si enggeluh. Aku TUHAN kap si nggo melasken ranan enda.
41 Nehenlah! Ena sangana reh bangsa i Utara nari, bangsa si ndauh-ndauh nari si lanai tanggung gegehna, nterem raja si nggo ersikap lako erperang.
42 Panah ras pedangna nggo ibuatna, kejam dingen la lit i bas ia perkuah ate. Sorana bali ras lawit si ergeruhguh, tupung iersakna kudana. Nggo sikap ia erperang ngelawan Babilon.
43 Raja Babilon nggo megi beritana, emaka nggo kote tanna. Sedak iakapna perban aru atena mesui iakapna desken pernanden si sangana mupus.
44 Bali ras singa ndarat i kerangen tua gedang-gedang Lau Jordan nari nangkeng ku mbal-mbal si meratah, bage me Aku TUHAN reh dingen mahan maka rempet kalak Babilon kiam nadingken negerina. Kenca bage raja si Kupilih me si jadi raja i tengah-tengah bangsa e. Ras ise kin Aku terpeseri? Ise pang ngelawan Aku? Pemerentah si apai kin si pang rubat ras Aku?
45 Emaka dengkehkenlah kai si nggo Kurencanaken nandangi kota Babil, dingen kai ateKu si Kulakoken man kalak si ringan i je. Anak-anakna pe la banci la isaren janah kerina kalak gentar.
46 Tupung Babil guling, lit sora si megang seh maka kerina doni enda mundu-undu. Sora tangis mesera terbegi ku bangsa-bangsa si deban."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA