Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iaminne kananNa Batara ri sesena Amon, angkana, "Angngapai nabuttana suku Gad niallei siagang nipammantangngi ri tau anynyombaya ri Rewata Milkom? Apaka tenamo tu Israel akkulle angngallei anjo daeraya?
2 Mingka lanarapiki sallang wattunna nalaKupilangngeriang pandudu’na Raba, ibukotana anjo Amon, iamintu sa’ra-sa’ra pakkio’ pa’bundukang. Anjo kotaya la’jari rumbangngangi siagang desa-desa niaka ri tammulilina lala’busuki nakanre pepe’. Nampa Israel lanaallei ammotere’ buttana battu ri tau le’baka riolo angngalle passai.
3 He tu Hesybon, angngarrukko, lanri kota Ai ancuru’mi! He tubainea ri kota Raba, appiraungko! Pakei kaeng karunga pammatei susanu. Lariko anrai’ kalau’, a’lingu-lingu. Milkom, rewatanu, niengka’mi mae ri butta pammelakkanga siagang imang-imanga kammayatompa sikamma pagawe pamarentana!
4 He ikau tenaya numajarre’ ri pa’mai’! Angngapa nukalompoang pa’maiki sikamma lappara’nu copponga? Apa saba’na nupattoang kammai kakalumanynyangngannu? Antekamma olonu lakkulle angkana tena manna sitau labarani ambundukiko?
5 Lanitujuko ri kapallakkang Kupabattua battu ri kere-keremae. Lalariko, massing ero’ ampasalamaki kalennu, siagang tenamo lampasse’reko ammotere’.
6 Mingka sallang, katallassanna bansa Amon laKupa’jari bajiki ammotere’. INakke, Batara, anne akkana."
7 Iaminne kananNa Batara Kaminang Koasaya ri ri sesena Edom, angkana, "Apaka tu Edom takkulleai appikkiri’ baji’? Apaka sikamma tucara’de’na tena napakaingaki ke’nanga? Lanynya’mi kacara’dekanna ke’nanga!
8 He pandudu’na Dedan, gilingi kalennu nampa lariko! A’lampako mange accokko. LaKuancuruki jari-jarina Esau, lanri narapi’mi wattunna laKuhukkung ke’nanga.
9 Punna angngattili’ taua rappo anggoro’, tuli nia’ naboli’ nasesa, siagang punna battu palukkaka ri wattu bangngia, iaji naalle apa nakaerokia.
10 Mingka, iNakke Kubarrasaki sa’genna tangkasa’ sikontu apa-apanna jari-jarina Esau siagang Kusungkei rahasia tampa’ paccokoanna ke’nanga; takkulleami ke’nanga nacokko kalenna. Tu Edom siagang sikamma sari’battanna kammayatompa siampi’ balla’na ke’nanga, kabusu’na le’ba’mi niancuru’, tena manna sitau ta’lappasa’.
11 He Edom! Boli’mi ana’-ana’ kukannu ri Nakke, iNakke lamparakai ke’nanga. Lappassammi sikamma jandaya napadongko’ panrannuanna mae ri Nakke.
12 Manna tau tenaya siratang nihukkung nataba ngaseng todong hukkungang, angngapa naikau tena? Ma’nassa ikau lanihukkung tongko!
13 AssumpA’ lanri areng KalengKu angkanaya kota Bozra la’jari tampa’ appakamallaki, nibokoia ri taua. Lanikakkali ri taua siagang lanapakei arenna a’jari kana pattunra. Sikontu desaya niaka ri tammulilina la’jari rumbangngang kabusuki sa’genna satunggu-tungguna. INakke, Batara, anne akkana."
14 Inakke, Yeremia, kukana, "He Edom, anggappama’ kabara’ battu ri Batara. Le’ba’mi Nasuro battu tunisuroNa mae ri bansa-bansaya untu’ ansuroi ke’nanga ampasse’rei tantarana siagang sadia-sadia untu’ ambundukiko.
15 LaNapa’jari lammako Batara siagang nihina ri taua.
16 Lanitipuko ri katampoannu. Tena lamalla’ ri kau kamma nukapanga. Ammantangko ri alla’-alla’na batua, bella ri coppo’na monconga. Mingka, manna pole nupare’ balla’nu ri tampa’ tinggi dudua, sangkamma tinggina ru’munna jangang-jangang rajawalia, mingka laNapanaungko Batara battu anjoreng. Batara ampaui yangasenna anjo."
17 Nakana Batara, "Bala lantujuai Edom lasanna’ heba’na, sa’genna sikamma tau allaloa anjoreng lata’bangkai siagang lamallaki.
18 Antekamma batena Sodom siagang Gomora niancuru’ siagang desa-desa niaka ri tammulilina, kamma tomminjo Edom. Tena manna sitau lammantang pole anjoreng. INakke, Batara, anne akkana.
19 Rapang singa ammumbaya battu lalang ri romang lompoa ri ampi’na Binanga Yordan nampa battu mange ri parang tampa’na gimbalaka a’ruku’, kammatommi anjo bateKu labattu siagang lampalari tu Edom silalonna battu ri pa’rasanganna ke’nanga. Nampa langngangkaKa’ sitau pamimping untu’ amparentai anjo bansaya. Inai akkulle nipasangkamma siagang iNakke? Inai barani appare’ parkara siagang iNakke? Apaka nia’ pamimping akkulle angngewA’?
20 Lanri kammana anjo, pilangngeri apa le’baka Kurancanakang mae ri tu Edom, siagang apa eroka Kugaukang mae ri pandudu’na kota Téman. Manna ana’-ana’na ke’nanga lanire’resang tongi a’lampa, siagang sikontu taua lamalla’ kabusuki.
21 Punna tu’guruki Edom, lania’ kalangngerang karicuang sannaka lompona sa’genna ta’goccang sikontu linoa; sa’ra-sa’ra pakkio’na pandudu’na lakalangngerangi sa’genna mange ri Tamparang Alara’.
22 Rapang jangang-jangang rajawali attambero siagang ka’nyi’na takka’ranga, kammami anjo musua labattu siagang antamberoi Bozra. Anjo alloa tantara Edom lamallaki rapang baine eroka ammana’."
23 Iaminne kananNa Batara ri sesena Damsyik. "Pandudu’na kota Hamat siagang Arpad ranggaselai siagang lussaki lanri allangngereki kabara’ kodi. Lussaki siagang ta’ronang-ronangi atinna ke’nanga rapang bombang ri tamparanga.
24 Pandudu’na Damsyik a’jari lammai, siagang lari napakamma malla’. Pa’risiki nasa’ring kalenna siagang sessai rapang baine eroka ammana’.
25 Anjo kota masahoroka siagang tuli rannua, kamma-kamma anne a’jari sinoi, tena tau ampammantangngi.
26 Anjo alloa lamatei sikamma tau rungkana ri agang-agang kotana, siagang sikontu tantarana niancuru’ kabusuki.
27 Tembo’-tembo’na kota Damsyik laKutunui, siagang sikamma balla’ karaenna Karaeng Benhadad laKupa’jari ammutungi. INakke, Batara Kaminang Koasaya, anne akkana."
28 Iaminne kananNa Batara ri sesena suku Kedar siagang daera-daera kakoasanna Hazor, ia le’baka naalle Nebukadnezar karaeng Babel, "He Nebukadnezar, bunduki suku Kedar siagang ancuruki sikamma tau niaka iraya!
29 Alleangi sikamma olo’-olo’na, iamintu gimbala’, unta, kammayatompa kema-kemana ke’nanga siagang sikontu bonena, siagang ammarrangko mae ri ke’nanga angkana, ‘Nikatulungko ri pammunoang!’
30 He ikau tu Hazor! INakke, Batara, angkana: Karo-karoko a’lampa a’lili annompang siagang accokko. Nebukadnezar karaeng Babel le’ba’mi narancanakang untu’ ambundukiko. Nakana,
31 ‘Umba maju! Umba nanibunduki tau nakanaya kalenna amang siagang sannang. Kotana ke’nanga tena pa’la’langanna, lanri tena pakke’bu’ lompona siagang tena panjolina.’"
32 Nakana pole Batara ri Nebukadnezar, "Alleangi sikamma untana siagang sikontu olo’-olo’ piarana ke’nanga! Sikontu anjo tau nacukkuru’ bodoa uu’na laKupasiaraki ri kere-keremae tampa’. LappabattuA’ bala mae ri ke’nanga battu ri kere-keremae.
33 Hazor lata’ronangi sa’genna satunggu-tungguna siagang a’jari tampa’ paccokkoannai kongkong romang. Tenamo tau manna sitau lammantang anjoreng. INakke, Batara, anne akkana."
34 Tena nasallo Zedekia a’jari karaeng Yehuda, a’bicarai Batara Kaminang Koasaya ri nakke, ri sesena pa’rasangang Elam.
35 Nakana Batara, "LaKubunoi sikontu tau cara’deka ammake sanjata pana, tau kassa’na Elam.
36 LattuiKa’ anging mange ri Elam battu ri appa’ sulapa’, nampa Kupasiara’ pandudu’na ri kere-keremae, sa’genna manna se’re pa’rasangang tenamo tanabattui tu Elam untu’ annompang.
37 LaKupa’jari mallaki tu Elam mae ri musu eroka ambunoi ke’nanga. Sanna’ larroKu ri ke’nanga siagang laKuancuruki ke’nanga. LaKukiringi tantaraya ambunduki ke’nanga sa’genna cappu’ taba sikali ke’nanga.
38 Sikamma karaenna siagang pagawena ke’nanga laKuancuruki, nampa ri pa’rasanganna ke’nanga laKupaentengi empoang kakaraengangKu.
39 Mingka sallang, laKupa’jari bajiki ammotere’ katallassanna Elam. INakke, Batara, anne akkana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA