Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Reh kata TUHAN man bangku kerna kerina kalak Israel si tading i Mesir i kota Migdol, Tahpanhes ras Mempis ras arah bagin Selatan negeri e.
2 Nina TUHAN si Mada Kuasa, Dibata nu Israel, "Nggo idahndu jine cilaka si Kubaba man Jerusalem ras kerina kota-kota i Juda. Seh ngayak genduari kota-kota e tetap denga runtuh-runtuhen, dingen la lit kalak si tading i je,
3 erkiteken rayatna ngelakoken si jahat si erbahanca keke rawangKu. Iberekenna persembahen man dibata-dibata si deban. Isembahna gana-gana si la pernah isembahna, si la pernah isembahndu, ntah isembah nini-ninindu.
4 Gelgel nari tetap Kusuruhi nabi-nabi suruh-suruhenKu. Kukataken arah ia maka ula ilakoken si jahat si ciga ateKu,
5 tapi la ibegikenndu, la diatendu pe. La itadingkenndu perbahanenndu si jahat mereken persembahen man dibata-dibata si deban.
6 Emaka gara me rawangKu, Kukuseken ku babo kerina kota-kota Juda dingen ku babo dalan-dalan i Jerusalem, jenari Kuciluk alu api. Kota-kota e nggo meruntuhen, nggo mejin seh ngayak genduari enda.
7 Emaka Aku, TUHAN si Mada Kuasa, Dibata nu Israel, nungkun: Ngkai maka jahat perbahanenndu man dirindu jine. Ibabandu kin atendu cilaka man dilaki, diberu, danak-danak ras man anak gara-gara, maka sada pe lanai lit bangsandu si tading?
8 Ngkai maka ilegindu rawangKu alu nembah man gana-gana dingen mereken persembahen man dibata-dibata si deban i Mesir inganndu si genduari enda? Ibahanndu kin si enda lako ngkernepken dirindu jine gelah kerina bangsa-bangsa nggombangi kam? Maka isumpahken kalak gelarndu?
9 Lanai kin ingetndu kerina si jahat si nggo ibahan nini-ninindu, raja-raja Juda ras kemberahenna, si ibahanndu ras ndeharandu, i bas kota-kota Juda ras i bas dalan-dalan Jerusalem?
10 Tapi seh ngayak wari si sendah la ipeterukndu bandu. La ihamatindu Aku, la kam nggeluh sue ras undang-undang si nggo Kubereken man bandu ras man nini-ninindu.
11 Emaka Aku TUHAN si Mada Kuasa, Dibata nu Israel, ngelawan Kam dingen ngkernepken bangsa Juda.
12 Kalak Juda si tading denga dingen nggo tetap atena lawes ku Mesir, guna ringan i jah, Kubahan maka kerina la banci la ikernepken. Kerina ia mate i Mesir, subuk kitik entah mbelin, kerina mate i bas perang entah erkiteken kelihen. Jadi me si mejin man bana. Ihina kalak ia janah gelarna jadi sumpah.
13 Kuukum me asa kalak si tading i Mesir, bali ras pengukumKu Jerusalem alu perang, kelihen ras penakit.
14 Sekalak pe kalak Juda si lawes dingen ringan i Mesir la banci pulah dingen tetap enggeluh. Sekalak pe ia lanai bo mulih ku Juda amin pe tedeh atena. La lit ise pe si mulihken seakatan piga-piga pengungsi."
15 Emaka kerina dilaki si meteh maka ndeharana mereken persembahen man dibata-dibata si deban, ras kerina diberu-diberu si ringan i je, subuk kalak Israel si ringan Selatan Mesir, eme sada perpulungen si meriah ngerana man bangku nina,
16 "La kami nggit megiken kai si ikatakenndu i bas gelar TUHAN.
17 Kai ate kami ibahan kami, e nge ilakoken kami. Ibereken kami me persembahen dibata-dibata kami Ratu Langit dingen ipirpirken kami anggur si ipersembahken man bana, bagi si ibahan nini-nini kami, raja-raja kami ras peminpin-peminpin kami i kota-kota Juda dingen i bas gedang-gedang pasar kota Jerusalem. Paksa si e melala nakan pangan kami senang akap kami dingen la lit kiniseran kami.
18 Tapi kenca kami ngadi mereken persembahen man Ratu Langit, dingen kenca kami lanai mirpirken anggur si ipersembahken man bana, kade kami pe la lit. Bangsa kami maten i bas perang ras kelihen."
19 Nina diberu-diberu e, "Tupung ituang kam ampam, bagi gambaren Ratu Langit, mpersembahken man bana, janah mpersembahken lau anggur, ma kin isetujui perbulangen kami nge e?"
20 Emaka ningku ngaloi kalak enda, dilaki ras diberu si nggo ngaloi aku bagi si ndai,
21 "Bagi persembahen si ipersembahkenndu, si ipersembahken nini-ninindu, raja-rajandu ras si ipersembahken peminpin-peminpinndu dingen kalak perjuma mpersembahken i bas kota-kota Juda dingen i bas gedang-gedang dalan Jerusalem -- iakapndu kin e la iperdiateken TUHAN? Entah iakapndu mawen Ia lupa?
22 Seh sendah pe negerindu nggo jadi pinugun runtuh-runtuhen, lanai lit ise pe tading i je. Nggo mejin negeri e, nggo isumpahken kalak pe erkiteken lanai tertahan TUHAN kejahaten dingen lagu langkahndu si macik.
23 Cilaka enda ngkenai kam erkiteken persembahenndu man dibata-dibata si deban dingen erdosa man TUHAN perbahan la ikutkenndu PerentahNa."
24 Kukataken man bangsa-bangsa e terlebih man diberu-diberu kai si ikataken TUHAN si Mada Kuasa, Dibata nu Israel man kalak Juda si tading i Mesir, "Subuk kam bage pe ndeharandu kerina, nggo ersumpah janji man Ratu Langit. Ipadankenndu mereken persembahen man bana, dingen mirpirken persembahen lau anggur kempak ia. Merandal adi bage! Cikeplah janjindu! Sehkenlah sumpahndu!
25 (Yer 44:24)
26 Tapi genduari dengkehken sumpahKu, TUHAN, si Kubahan i bas kinibelinen gelarKu, man kerina kam kalak Israel si tading i Mesir. Asa ndigan pe lanai Kupediat ipakendu gelarKu i bas sumpah alu ngataken i bas gelar Dibata si nggeluh!
27 Kuperdiateken tuhu-tuhu maka labo kam makmur tapi ikernepken. Kerina kam la banci la mate subuk i bas perang entah penakit, seh maka lanai kam lit si tading nggeluh.
28 Tapi piga-piga i bas kam nari pulah i bas kematen dingen mulih ku Juda i Mesir nari. Emaka kalak si tetap enggeluh, meteh ranan ise si payo, cakapKu entah cakapna.
29 Aku TUHAN si mereken man bandu tanda maka kam Kuukum i bas negeri enda. Maka janjingKu ngeradasken kam payo tuhu jadi.
30 Kuendesken Hopra, raja Mesir man musuh-musuh si atena munuh ia, bali ras pengendeskenKu Raja Sedekia i Juda nari kempak Nebukadnesar raja Babilon, imbangna si atena munuhsa Sedekia."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA