Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ On do hata na roh bani si Jeremia humbani Jahowa, dob maluah ia ibahen si Nebusaradan, kopala ni parjaga ai, hun Rama; tarboan do ia hujai ibagas gari rap pakon tahanan na hun Jerusalem ampa Juda, na sihol buangon hu Babel.

² Isuruh kopala ni parjaga ai ma na mangalop si Jeremia anjaha nini ma dompaksi, “Jahowa, Naibatamu do manlumbahon hamagouan on bani ianan on;

³ ipasaud Jahowa do ai, ibahen do songon na hinatahon-Ni ai. Halani mardousa nasiam dompak Jahowa, anjaha seng itangihon nasiam sora-Ni, ai do ase masa on bani nasiam.

⁴ On pe, tonggor ma, hupaluah do ham sadari on humbani gari na bani tanganmu. Anggo marosuh uhurmu laho hu Babel rap pakon ahu, dear, eta ham ma, ahu pe na patorsahon ham; tapi anggo seng dear ai ninuhurmu, laho hu Babel rap pakon ahu, age ulang. Tonggor ham ma haganup tanoh na i lobeimu in; laho ma ham huja na dear ampa na pintor, nini uhurmu.

⁵ Tapi anggo ijon do ham nini uhurmu, mulak ma ham hubani si Gedalya, anak ni si Ahikam, anak ni si Sapan, na pinabangkit ni Raja Babel manggomgom huta-huta ni Juda, anjaha marianan ma ham rap pakonsi i tongah-tongah ni na mabuei in; atap laho ham huja na dear, nini uhurmu.” Jadi ibere kopala ni parjaga ai ma bohal ampa sibere-bere bani, anjaha ipaturut ma ia laho.

⁶ Jadi laho ma si Jeremia hubani si Gedalya, anak ni si Ahikam, hu Mispa, lanjar marianan ma ia rap pakonsi i tongah-tongah ni na mabuei ai, na tading i nagori ai.

⁷ Dob ibogei haganup kopala ni tentara ai, na mambur merap ope i tanoh ai ampa tentara ni sidea, na dob ipabangkit raja ni Babel si Gedalya, anak ni si Ahikam manggomgom nagori in, anjaha iondoskon hubani paramangon, parinangon ampa dakdanak, ai ma halak na masombuh, na so hona buang hu Babel,

⁸ jadi roh ma sidea marayak si Gadalya hu Mispa, ai ma si Ismael, anak ni si Netanya, si Johanan pakon si Johanan anak ni si Kareah, si Seraya, anak ni si Tanhumet, anak ni si Epai hun Netopa, si Jesania anak ni halak Maakati ai, sidea ampa pangiring ni sidea.

⁹ Jadi marbulawan ma si Gedalya, anak ni si Ahikam, anak ni si Sapan, hubani sidea pakon hubani pangiring ni sidea, nini ma, “Ulang ma nasiam mabiar unduk bani halak Kasdim. Iankon nasiam ma tanoh in, anjaha balosi nasiam ma raja ni Babel, jadi sonang ma nasiam.

¹⁰ Tapi anggo ahu, i Mispa do marianan, mawakili nasiam i lobei ni halak Kasdim, na roh hu banta; anggo nasiam pariamai nasiam ma buah ni anggur, buah ni hayu ampa minak, anjaha simpan nasiam ma ai; marianan ma nasiam bani huta na tinodoh nasiam.”

¹¹ Sonai homa, dob ibogei haganup halak Juda, na i Moab, na i tongah-tongah ni halak Amon, na i Edom ampa na i nagori-nagori na legan, na ipaturut Raja Babel do tading deba i Juda, anjaha ipabangkit si Gedalya, anak ni si Ahikam, anak ni si Sapan, manggomgomi sidea,

¹² jadi mulak ma haganup halak Juda, humbani haganup ianan hamerapan ni sidea gabe das ma sidea hu tanoh Juda, hubani si Gedalya i Mispa. Anjaha buei do anggur ampa buah ni hayu ipariamai sidea.

¹³ Roh do ijia si Johanan, anak ni si Kareah ampa haganup kopala ni tentara na i darat marayak si Gedalya hu Mispa;

¹⁴ nini sidea ma dompaksi, “Ai seng ibotoh ham, na isuruh si Baalis, raja ni Amon do si Ismael, anak ni si Netanya, laho mamunuh ham? Tapi seng porsaya si Gadalya, anak ni si Ahikam, bani hata ni sidea ai.

¹⁵ Dob ai nini si Johanan, anak ni si Kareah ma dompak si Gedalya marponop-ponop i Mispa, ʻPalopas ham ma ahu laho, ase hubunuh si Ismael, anak ni si Netanya, anjaha ise pe lang na mambotoh ai. Mase ma ia mambunuh ham, gabe merap halak juda, na martumpu i lambungmu, gabe masab simasima na humbani Juda?ʼ

¹⁶ Tapi nini si Gedalya, anak ni si Ahikam ma dompak si Johanan, anak ni si Kareah, ʻUlang bahen sonai, seng sintong sahapmu pasal si Ismael ai.ʼ”

Yeremia

Video Yeremia 40

Ikuti Kami:

KONTAK | PARTISIPASI | DONASI