Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 A’bicarai Batara ri nakke ri le’ba’namo Nebuzaradan, anjo komandang pasukanga, allappassanga’ ri Rama. Nieranga’ mange anjoreng lalang tassikko’ siagang sikontu tau maraeng battua ri Yerusalem siagang Yehuda ia niengkaka salaku tunitahang mange ri Babel.
2 Nakioka’ anjo komandang pasukanga kale-kalengku nampa nakana ri nakke, "Karaeng Allata’alanu le’ba’ angngancangi laNaancuru’ anne pa’rasanganga.
3 Kamma-kamma anne Nagaukammi anjo kammaya, lanri dorakami bansanu siagang taerokai mannuruki mae ri Ia.
4 Kamma-kamma anne kulappassangi anne passikkoka battu ri limannu siagang kupakabebasakko. Punna erokko, akkulleko amminawang mange ri Babel, siagang lakuparakaiko. Mingka punna teako, tena todong nangngapa-apa. Ri sikontu anne pa’rasanganga laluasako a’lampa manna kemae nukaerokia."
5 Ri tenanapa ku’lampa, nakana Nebuzaradan, "Punna erokko, akkulleko ammotere’ mange ri Gedalya ana’na Ahikam cucunna Safan, le’baka niangka’ ri karaeng Babel a’jari guburnur mae ri kota-kota Yehuda. Akkulleko ammantang siagang ia ri tangnga-tangngana ra’yaka, yareka manna pole kamae nukaerokia." Nampa nasarema’ siapa are jaina kanre-kanreang siagang hadia, nampa nalappassanga’ a’lampa.
6 A’lampa’ mange ri Gedalya ri Mizpa, nampa ammantang anjoreng ti tangnga-tangngana ra’ya’ nibolika ri pa’rasangang Yehuda.
7 Karaeng Babel le’baki naangka’ Gedalya a’jari guburnur ri Yehuda untu’ ammarenta mae ri sikontu tau niaka ija ammantang ri Yehuda, iamintu sikamma tau kaminang kasi-asia. Sipa’gang battu ri sikamma perwira siagang parajuri’ Yehuda tenaya namanyara mae ri Babel, nalangngereki anjo passala’ niangka’na Gedalya.
8 Jari Ismael ana’na Netanya, Yohanan ana’na Kareah, Seraya ana’na Tanhumet, siagang ana’-ana’na Efai battu ri Netofa, kammayatompa Yezanya battu ri Maakha, a’lampa ngasengi siagang taunna ke’nanga mange ri Gedalya ri Mizpa.
9 Nakanamo Gedalya ri ke’nanga, "Tena nuparallu malla’ manyara mae ri tu Babel. Ammantang mako ri pa’rasanganta anne, siagang a’jari mako ata mae ri karaeng Babel. Kutanggongiko lasalama’ ngaseng.
10 Ammantang mako ri kota-kota nungaia, siagang appasse’re mako nummoli’ anggoro’, rappo-rappoang siagang minynya’ zaitun. Inakke kalengku lammantanga’ ri Mizpa siagang kuwakkeli ra’yaka punna battu mae anrinni tu Babel."
11 Lalang anjo wattua sikontu tu Israel niaka ri pa’rasangang Moab, Amon, Edom, siagang pa’rasangang-pa’rasangang maraenga, nalangngereki angkanaya karaeng Babel nasaremi ising sipa’gang tu Israel ammantang ri Yehuda, kammayatompa angkanaya le’ba’mi naangka’ Gedalya a’jari guburnur.
12 Lanri kammana anjo, nabokoimi tampa’-tampa’ napammantangia ke’nanga nipasisa’la’-sa’la’, nampa ammotere’ mange ri Yehuda. Battui ke’nanga mange ri Gedalya ri Mizpa, siagang appa’rappungi ke’nanga sanna’ jaina anggoro’ siagang rappo-rappoang.
13 Le’baki anjo, Yohanan siagang sikamma perwira tenaya namanyara mae ri musua, battui mange ri Gedalya ri Mizpa
14 nampa angkana, "Nuassenji angkanaya Baalis, iamintu karaeng Amon, le’baki nasuro Ismael untu’ ambunoko?" Mingka tena natappa’ Gedalya mae ri kananna ke’nanga.
15 Nampa a’bicara cokko-cokkomi Yohanan mae ri Gedalya angkana, "Baji’mi nakua’lampa ambunoi Ismael; tena manna sitau langngassengi angkana inai ambunoi. Angngapa namusti nilappassang ambunoko? Anjo sallang kale’bakkanna sikontu tu Yehuda asse’reamo anrinni siagang ikau, lasisa’la’-sa’laki ammotere’, sa’genna akkullei ancuru’ sikontu ra’ya’ niaka ija tassesa ri Yehuda."
16 Mingka appiali Gedalya angkana, "Teako! Anjo kanannu ri passala’na Ismael tena natojeng!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA