Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kata TUHAN seh man bangku kenca Nebusaradan puanglima tentera e nggo mbebasken aku i Rama. Aku ibaba ku jah teriket radu ras kalak Jerusalem ras Juda si sangana iangkut tertaban ku Babilon.
2 Ikusikken puanglima tentera e man bangku nina, "TUHAN Dibatandu nggo ngancam negeri enda alu cilaka.
3 Genduari nggo IlakokenNa kai si IkatakenNa, kerina si enda jadi erkiteken bangsandu erdosa kempak TUHAN janah la patuh man bana.
4 Genduari kutangtangi me gari si lit i bas pergelangen tanndu kubebasken me kam. Adi atendu ikut ras aku ku Babilon, banci aku si pekena-kena kam. Tapi adi atendu la ikut, kam metehsa. Kam milihsa inganndu i belang-belang negeri enda; bebas kam ku ja atendu."
5 Perbahan la aku ngaloi emaka nina Nebusaradan, "To dage dahi mulihken si Gedalya anak Ahikam kempu si Sapan, si iangkat raja Babilon jadi gubernur Juda. Banci kam tading rassa enggeluh i tengah-tengah bangsa e, tah pe banci kam lawes ku ja atendu lawes." Kenca bage iberekenna pemerena man bangku, rikut ras pangan, jenari ipeberkatna aku.
6 Lawes aku tading ras Gedalya i Mispa janah nggeluh i tengah-tengah bangsa e si tading denga i bas negeri e.
7 Piga-piga puanglima ras tentera Juda lit denga langa talu janah tading i mbal-mbal. Ibegina maka raja Babilon nggo ngangkat Gedalya jadi gubernur i negeri e janah nggo itugaskenna ia ngurusi kerina kalak si la iangkut ku Babilon: dilaki, diberu ras anak-anak bage pe si musil-musil si tading i negeri e.
8 Emaka Ismael anak Netania, Johanan anak Kareah, Seraya anak Tanhumet, kerina anak Epai i Netopa nari, ras Jesania i Maaka nari ras anak buahna, lawes ndahi Gedalya i Mispa.
9 Nina Gedalya man kalak enda, "Kukataken man bandu maka la kam perlu biar-biaren ngendesken dirindu man kalak Babilon. Tadinglah i negeri enda, erdahinlah guna raja Babilon emaka kerina jadi si menuli man bandu.
10 Aku tading jine i Mispa janah jadi wakilndu tupung kalak Babilon reh ku jenda. Tapi banci ipepulungndu jadi simpanenndu anggur, buah kayu, minak saitun jenari tadinglah i bas kuta-kuta si nggo inganindu."
11 Sanga e pe, ke rina kalak Israel si ringan i Moap, Amon, Edom ras i bas ingan-ingan si deban, megi maka ipediat raja Babilon sisa kalak Israel tading i Juda dingen nggo iangkatna Gedalya jadi gubernurna.
12 Emaka itadingkenna negeri inganna ihuntakken ndube jenari mulih ia ku Juda. Idahina Gedalya ku Mispa. Mbue kal ipepulungna i je anggur ras buah kayu.
13 Kenca bage, Johanan ras kerina puanglima tentera si langa talu e reh ndahi Gedalya i Mispa,
14 jenari nina man Gedalya, "Itehndu kang maka Baalis raja Amon nggo nuruh Ismael anak Netania munuh kam?" Tapi la tek Gedalya.
15 Kenca bage nina Johanan man Gedalya alu erbuni-buni, "Enta aku lawes dingen munuh Ismael janah sekalak pe labo meteh kerna si e. Ngkai maka ipelepas ia munuh kam. Adi ibunuhna kam marpar pagi kerina kalak Jahudi si nggo pulung i sekelewetndu dingen si e maba cilaka man kerina kalak si tading denga i Juda."
16 Tapi nina Gedalya ngaloisa, "Ula bage! Si ikatakenndu kerna Ismael bual kap e!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA