Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 On do hata na roh bani si Jeremia humbani Jahowa, sanggah roh si Nebukadnesar, raja ni Babel, ampa sagala tentarani ampa haganup harajaon na i tanoh on, na masuk hubani gomgomanni, ampa haganup bangsa-bangsa na marporang dompak Jerusalem ampa dompak haganup huta-hutani:
2 Sonon do hata ni Jahowa, Naibata ni Israel, “Laho ma ho, anjaha marsahap ma ho bani si Sedekia, raja ni Juda, anjaha hatahon ma bani: Sonon do hata ni Jahowa, ʻTonggor ma, ondoskonon-Ku do huta on hubagas tangan ni raja ni Babel, anjaha tutungonni do on bani apuy.ʼ
3 Ho pe seng anjai maluah humbagas tangan-Ni, tapi maningon tartangkap do anjaha iondoskon hubagas tangan-Ni; maningon marsididahan do ho pakon raja ni Babel, anjaha maningon marsahap do ho pakonsi padumpar bohi; maningon tarboan do ho hu Babel.
4 Tapi, tangar ma homa hata ni Jahowa, ale Sedekia, raja ni Juda! Sonon do hata ni Jahowa pasal ho, ʻSeng matei anggo ho marhitei podang,
5 sonang do ho matei; songon na itutung dahupa bani ompungmu, ai ma raja-raja na i lobeimu, sonai do tutungon dahupa bam, anjaha tangisan do ho. Aih tuannami! Tongon, Ahu do na mangkatahon ai, nini Jahowa.ʼ”
6 Jadi ipadas Nabi Jeremia ma ganup hata ai hubani si Sedekia, raja ni Juda i Jerusalem,
7 ai ma sanggah iporang tentara ni raja ni Babel Jerusalem ampa haganup huta-huta ni Juda na tading ai ope, ai ma Takis ampa Aseka; pitah on mando huta na pinatoguh i Juda na tading ope.
8 On do hata na roh hubani si Jeremia humbani Jahowa, dob ibahen Raja Sedekia parpadanan pakon haganup bangsa ai i Jerusalem, ai ma pasal haluahon sitingtingkononkon:
9 Paboa ganup halak maningon paluahonni do jabolonni halak Heber, dalahi atap naboru, ase ulang dong be halak Juda, na marjabolonkon hasomanni halak Jahudi.
10 Anjaha mangaku do haganup pangintuai-pangintuai ampa haganup bangsa ai, na masuk bani parpadanan ai, na mangkatahon, ase ganup paluahkon jabolonni, dalahi atap naboru, ase ulang be iparjabolon sidea; mangaku bei do sidea, anjaha ipaluah do tongon sidea.
11 Tapi margoling do use uhur ni sidea, ialop sidea do mulak jabolonni dalahi atap naboru, na dob pinaluah ni sidea ai, anjaha ipaksa sidea do use gabe jabolon.
12 Jadi roh ma hata ni Jahowa, bani si Jeremia sonon,
13 “Sonon do hata ni Jahowa, Naibata ni Israel, Ahu do na mambahen padan bani ompungnima, sanggah na Huboan sidea mandarat hun tanoh Masir, hun rumah parjabolonan, ningku do,
14 Bani tahun papituhon maningon ganup do hanima paluahkon hasomanni halak Heber, na targadei bam anjaha na dob marhorja bam onom tahun; tapi seng itangihon ompungnima Ahu atap itareihon pinggolni Bangku.
15 Ia hanima ipaubah hanima do uhurnima, anjaha ibahen hanima do na pintor bani uhur-Hu marhitei na maningtingkon haluahon bani ganup hasomanni, anjaha ibahen hanima do parpadanan i lobei-Hu ibagas rumah on na targoran bani goran-Ku,
16 tapi margoling do use uhurnima, gabe ipabutak hanima goran-Ku, marhitei na ialop hanima haganup use jabolonnima, dalahi atap naboru, na dob maluah mandalankon domu hu bani rosuhni, anjaha ipaksa hanima do sidea use mulak gabe jabolonnima.
17 Halani ai, sonon do hata ni Jahowa, Seng itangihon hanima Ahu, gabe seng saud itingtingkon hanima haluahon bani ganup hasomanni. Tonggor ma, tingtingkonon-Ku do bannima haluahon bani podang, bani sampar ampa lohei, nini Jahowa. Anjaha bahenon-Ku do hanima gabe songgot-songgot bani haganup harajaon na i tanoh on.
18 Anjaha halak, na manlanggar padan-Ku, anjaha na so manjolom hata ni padan ai, na dob binahen ni sidea i lobei-Hu, bahenon-Ku do sidea songon anak ni lombu na dob pinonggol dua ai, songon ponggol-ponggol ai, na dob montas sidea hun tongah-tongah ni ai,
19 ai ma na sangap-sangap ni Juda, ampa na sangap-sangap ni Jerusalem, siparugas i rumah ni raja, malim-malim ronsi haganup halak na marianan i nagori in, na dob montas hun tongah-tongah ni ponggol-ponggol ni anak ni lombu ai.
20 Ondoskonon-Ku do sidea hubagas tangan ni munsuh ni sidea ampa hubagas tangan ni halak na manguhurhon hosah ni sidea; anjaha bangkei ni sidea ai maningon do panganon ni manuk-manuk na i awang-awang ampa binatang na i talun.
21 Anjaha si Sedekia, raja ni Juda, ampa gamot-gamotni ondoskonon-Ku do hubagas tangan ni munsuh ni sidea ampa hubagas tangan ni tentara ni raja ni Babel, na dob mulak namin humbennima.
22 Tonggor ma, martonah do Ahu, nini Jahowa, boanon-Ku do sidea mulak hu huta on; parangonni do huta on anjaha tabanonni, lanjar tutungonni bani apuy. Bahenon-Ku do tarulang huta-huta ni Juda, seng dong be na mangiankon.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA