Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai puho ma si Jerubbaal, ai ma si Gideon girah sogod, rap pakon hasomanni ai, jadi marsaran ma sidea i lambung ni bah tubuh Harod; anjaha bala ni Midian marsaran do i utarani, i lambung ni buntu-buntu More, i habungan
2 Dob ai nini Jahowa ma dompak si Gideon, “Mabueitu do halak hasomanmin, parhiteian-Ku mamberehon halak Midian hubagas tangan ni sidea, ase ulang ipuji halak Israel dirini dompak Ahu, mangkatahon, ʻTanganku sandiri do na paluahkon ahu.ʼ
3 On pe tingtingkon ma ase ibogei halak ganupan, ʻBarang ise na mabiar anjaha gobir, mulak ma ia hun Dolog Gilead.ʼ Jadi mulak ma dua puluh dua ribu halak, tading ma sapuluh ribu.
4 Dob ai nini Jahowa ma dompak si Gideon, ʻMabueitu ope halak ai, arahkon ma sidea tuad hu bah ai, ase Hulajou sidea ijai, jadi barang ise na huhatahon bam: On ma hasomanmu bingkat, jadi ia ma hasomanmu bingkat, tapi barang ise na Huhatahon bam: Halak on seng bulih hasomanmu bingkat, jadi ulang ma bingkat ai.ʼ
5 Jadi iarahkon ma halak ai tuad minum hu bah ai. Nini Jahowa ma dompak si Gideon, ʻBarang ise na manirup bah in marhitei dilahni, songon pandilati ni baliang, papulig ma ai, sonai homa na manowod minum.ʼ”
6 Ia bilangan ni na manirup ai tolu ratus halak do, anjaha haganup na legan ai manowod do laho minum bah marhitei tanganni.
7 Dob ai nini Jahowa ma dompak si Gideon, “Marhitei sitolu ratus halak ai, na manirup ai, Ahu paluahkon hanima anjaha mamberehon halak Midian hu tangannima; tapi sagala halak na legan ai bulih do mulak, ganup hu iananni bei.”
8 Ibuat ma bohal ni halak ai pakon tarompitni; anjaha isuruh ma haganup halak Israel mulak, ganup hu lampolamponi bei, tapi na tolu ratus ai ijolomi do. Ia parlampolampoan ni halak Midian i bornohni do, i habungan.
9 Lanjar bornginni ai ihatahon Jahowa ma hu bani, “Jongjong ma ho, tuad ma ho mandorab parlampolampoan ai, ai domma Huondoskon ai hubagas tanganmu.
10 Tapi anggo mabiar ho tuad, tuad ma ho lobei pakon si Pura, juakjuakmin hu parlampolampoan ai;
11 jadi bogeionmu ma barang aha sahap-sahap ni sidea; dob ai dapotan gogoh ma tanganmu mandorab parlampolampoan ai.”
12 Ia halak Midian pakon halak Amalek ampa haganup halak parhapoltakan ai martibalan do i habungan ai, songon balang bueini, anjaha unta ni sidea songon horsik na i pasir ni laut, seng tarbilangi halani bueini.
13 Daskonsi si Gideon hujai, adong ma sada halak patugahkon nipini hubani hasomanni, nini, “Tonggor ma, na marnipi do ahu; magulang sada ruti masuk hu parlampolampoan ni halak Midian; daskonsi hu lampolampo on, idorab ma lampolampo on, gabe marumbak anjaha balik; sonai ma reong lampolampo ai.
14 Dob ai nini hasomanni ai ma mambalosi, ʻSeng bulih lang podang ni si Gideon, anak ni si Joas halak Israel ai do ai; domma iondoskon Naibata halak Midian pakon ganup lampolampo on hubagas tanganni.ʼ”
15 Jadi dob ibogei si Gideon hata ni nipi ai pakon artini, marrogop ma ia marsombah. Dob ai mulak ma ia hu parlampolampoan ni halak Israel, anjaha nini ma, “Jongjong ma, ai domma iondoskon Jahowa parlampolampoan ni halak Midian hu tangan nasiam.”
16 Dob ai ibagi si Gideon ma na tolu ratus halak ai gabe tolu hulanan, anjaha ibere ma tarompit sada bei hubagas ganup tangan ni sidea ampa hudon na lumei sada bei, na marisi suluh damar.
17 Anjaha nini ma dompak sidea, “Pardiateihon nasiam ma ahu anjaha bahen nasiam ma songon na hubahen. Anggo das ma ahu hu ujung ni parlampolampoan ai, bahen nasiam ma songon na hubahen ai.
18 Anggo husompul tarompit, ahu ampa ganup halak na rap pakon ahu, sompul nasiam ma homa tarompit inggot ni ganup parlampolampoan ai, anjaha marsurak ma, ʻBani Jahowa pakon bani si Gideon.ʼ”
19 Jadi dob das si Gideon rap pakon halak sisaratus hasomanni ai hu ujung ni parlampolampoan ai, bani pamungkah ni runda tongah borngin, sanggah ai pe mulai marjaga sidea, jadi isompul sidea ma tarompit anjaha ibolahkon ma hudon na i tangan ni sidea ai.
20 Jadi rap manompul tarompitni bei ma na tolu hulanan ai anjaha ibolahkon ma hudon ai, ijolom bei ma suluh i tangan sambilouni anjaha tarompit sisompulon ai i tangan siamunni, lanjar marsurak, “Podang halani Jahowa pakon halani si Gideon!”
21 Lanjar jongjong bei ma sidea, ganup bani iananni, inggot parlampolampoan ai; gabe lutu ma ganup bala ai, mandoraki anjaha maporus.
22 Sanggah na sinompul ni sitolu ratus halak ai tarompit ai, jadi ipatongon Jahowa ma podang ni na sada hubani na sada nari i parlampolampoan ai, gabe maporus ma bala ai das hu Bet-Sita, dompak Zesera das hu parbalogan ni Abel-Mehola dohorhon Tabat.
23 Dob ai iarahkon ma halak Israel hun marga Naftali, hun marga Asser pakon humbani ganup marga Manase, jadi iayak sidea ma halak Midian.
24 Isuruh si Gideon ma homa suruhan hu ganup Dolog Efraim mangkatahon, “Tuad ma nasiam mandorab halak Midian, anjaha soluk nasiam ma hampit bah ai mangimbang sidea das hu Bet-Bara pakon Bah Jordan.” Jadi iarahkon ma ganup halak Efraim, gabe isoluk sidea ma bah ai das hu Bet-Bara, sonai homa Jordan.
25 Itaban sidea ma dua raja ni halak Midian, ai ma si Oreb pakon si Zeeb. Ibunuh sidea ma si Oreb i Dolog batu Oreb anjaha si Zeeb ibunuh ibagas pangilangan anggur Zeeb. Ipardakdak sidea ma halak Midian, iboan sidea ma ulu ni si Oreb pakon ulu ni si Zeeb hubani si Gideon i dipar ni Jordan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA