Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri se’reang allo, bari’basa’ dudumi ambangung Gideon, siagang taunna. A’lampai ke’nanga appare’ kema ri ampi’na timbuseng je’neka ri Harod. Na ia kemana tu Midian niaki ri warakkanna ke’nanga, ri lappara’ ambania ri Bulu’ More.
2 Nakanamo Batara ri Gideon, "Jai dudui taunnu. Tena Kuero’ assarei pammetang mae ri tu Midianga. Nasaba’ nakana sallang ke’nanga, ammetai lanri kagassingang kalenna ke’nanga, sa’genna teaimi Nakke napakalompo.
3 Jari, pauammi taunnu angkanaya, ‘Inai-nai nabattui malla’, musti akkaro-karoi nabokoi anne Moncong Gilead nammotere’ mange ri balla’na.’" Jari nia’ 22.000 tau ammotere’. Ia ammantanga nia’ mamo 10.000 tau.
4 Nakanamo pole Batara mae ri Gideon, "Jai duduiji taunnu. Erangi ke’nanga mange ri binangaya. Anjorempi naKupileangko, punna Kukana ri kau, ‘Anne taua musti a’lampai siagang ikau,’ musti a’lampai. Mingka punna Kukana, ‘Anne taua takkulleai a’lampa siagang ikau,’ takkulleai a’lampa."
5 Naerammi Gideon anjo taunna mange ri binangaya. Nampa Nakana Batara ri Gideon, "Inai-nai allepaki je’neka sangkamma kongkong, musti nusa’laki battu ri tau akkulantuka untu’ angnginung."
6 Jari nia’ 300 tau allepaki je’neka battu ri limanna, maraenganga akkulantu’ ngasengi angnginung.
7 Nakanamo Batara ri Gideon, "Iaminjo tallum bilangnganga tau allepaka je’ne’ laKupake untu’ allappassangko siagang naKusareko pammetang mae ri tu Midian. Suromi anjo maraengannaya ammotere’ ngaseng."
8 Jari nasuromi Gideon ammotere’ anjo sikontu tu Israel maraenga, pantaranganna anjo tau tallum bilangnganga. Sikontu bokonga siagang tarompe’ niaka ri anjo tau ammotereka nialle ngasengi. Tu Midian niaki ri lapparaka, irawangang tampa’ kemana tu Israel.
9 Anjo bangngia Nakanamo Batara ri Gideon, "Ambangung mako Gideon! Mange mako ambunduki tu Midian ri kemana. Kusareko pammetang mae ri ke’nanga.
10 Mingka punna mallakko, kioki anjo atannu Pura, nunampa a’lampa siagang mae ri kemana musua.
11 Lanulangngereki sinampe’ apa nabicaraya musunnu. Iaminjo lampa’jari baraniko untu’ ambunduki." A’lampami Gideon siagang Pura, mange ri pa’baeng-baenna kemana musua.
12 Anjo tu Midian, Amalek siagang tu battua ri parang kassika, tassia’-siaraki ri kere-kere mae anjoreng ri lapparaka. Sangkammai nicini’ katimbang a’rappunganga. Unta-untana ke’nanga sanna’ jaina sanrapang kassi’ ri biring tamparang.
13 Battuna mange anjoreng Gideon, nia’mo nalangngere’ sitau musunna ancaritai so’nana mae ri aganna. Kammai anne caritana anjo taua, "Asso’na’ nia’ kucini’ sibatu roti ta’gulung-gulung antama’ ri tampa’ kemata. Nampa nia’ se’re kema naluluang. Anjo kemaya rumbangi anjari sallappara’ buttaya."
14 Appialimi aganna angkana, "Cecce, mattantu pa’danna Gideon, ana’na Yoas anjo tu Israelka! Battuanna nisaremi pammetang ri Allata’ala mae ri tu Midian siagang sikontu tantarata!"
15 Nalangngere’na Gideon ri passala’na anjo so’naya siagang apa battuanna, su’ju’mi anynyomba ri Allata’ala. Nampa ammotere’ mae ri tampa’ kemana tu Israel. Nakanamo, "Sadia-sadia ngaseng mako! Nasareko pammetang Batara mae ri tantarana tu Midian!"
16 Nampa nabage tallu Gideon anjo tallum bilangnganga taunna, a’jari tallu regu. Tase’re-se’re tau massing nisarei tarompe’, siagang se’re pammantangang sulo.
17 Nakanamo Gideon ri ke’nanga, "Punna battua’ ri pa’baeng-baenna tampa’ kemana tu Midianga parhatikang baji’-bajika’. Nampa nugaukang todong apa kugaukanga.
18 Punna kutui’ tarompekku siagang natui’ ngaseng tarompe’na tau niaka ri reguku, musti nutui’ ngaseng tongi tarompe’nu nampa musti ammarrang ngasengko ri tammulilina anjo kemaya, angkana, ‘Untu’ Batara siagang untu’ Gideon!’"
19 Ri la’birinnamo lantang bangngia, battumi Gideon siagang taunna mange anjoreng ri pa’baeng-baenna tampa’ kemana musunna. Anjo wattua beru nisambei tau a’jagaya ri anjo tampa’ kemaya. Nanatui’mo tarompe’na Gideon siagang tarompe’na sikontu tau niaka ri reguna, na nasungke tommo pammantangang sulona.
20 Kammatommi anjo nagaukang anjo ruaya regu. Nampa naangka’ ngasemmo siagang lima kairinna sikontu sulo naeranga ke’nanga. Kammayatompa natui’ ngasemmi tarompe’na niaka ri lima kananna ngaseng ke’nanga. Nampa ammarrang ngaseng ke’nanga, "Pa’dang untu’ Batara siagang untu’ Gideon!"
21 Massing ammantangi ke’nanga ri tampa’na ri tammulilina anjo tampa’ kemaya. Na piti lari-lari ngasemmo anjo tantara nasuroa, ammarrang-marrang.
22 Ri wattunna napasa’ra tarompe’na Gideon siagang sikontu taunna, napasibundu’mi siagang Batara anjo tantara musua para ia. Larimi ke’nanga mange ri Zerera sa’genna Bet-Sita na kota Abel-Mehola rampi’na Tabat bellana.
23 Nikio’ tommi suku Naftali, Asyer siagang suku Manasye niaka irayanganna siagang ilaukanna Binanga Yordan. Nampa angngondang tommo ke’nanga ri tantara Midian.
24 Kammayatompa akkiring tommi kabara’ mange ri sikontu daera monconna Efraim, angkana, "Naung ngaseng mako mae ambunduki tu Midian. Jagai Binanga Yordan siagang yangasenna kaloroka sa’genna Bet-Bara bellana. Teako lappassangi tu Midian a’limbang anjoreng." Jari nipagio’ tommi tu Efraim. Nampa najagai ke’nanga Binanga Yordan siagang sikontu kaloroka sa’genna mae ri Bet-Bara bellana.
25 Nia’ rua pamimpinna tu Midian najakkala’ anjo ke’nanga iamintu niarenga Oreb siagang Zeeb. Nibunoi Oreb ri Batu Oreb, na Zeeb nibunoi ri tampa’ pammaccokang anggoro’na Zeeb. Anjo tu Efraim naondang tulusuki tu Midianga nampa naerang ulunna Oreb siagang Zeeb mae ri Gideon, ri biring rayana Yordan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA