Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E settong are Gideyon ban reng-orengnga jaga gu-laggu, pas akemah e seddi’anna somber Harod. Parkemahanna oreng Midian badha e dhaja’anna parkemahanna oreng Isra’il, e cora e seddi’anna Gumo’ More.
2 Dhabuna PANGERAN ka Gideyon, "Orengnga ba’na bannya’ gallu. Sengko’ ta’ endha’ mamennanga reng-orengnga ba’na ka oreng Midian, sabab reng-orengnga ba’na jareya dhaggi’ ngera mennang polana kakowadanna dibi’, daddi pas ta’ amolja’agi Sengko’.
3 Daddi, mara omommagi ka reng-orengnga ba’na jareya, ‘Pa’-sapa’a se arassa tako’, kodu duli mole ka bengkona, nyengla dhari Gunong Gileyad.’" Daddi badha dhu lekor ebu oreng se mole; se nyeccer pera’ sapolo ebu oreng.
4 Dhabuna PANGERAN ka Gideyon, "Orengnga ba’na gi’ bannya’ gallu. Mara giba reng-oreng jareya kabbi ka songay. E dhissa’ bi’ Sengko’ epeleyagiya. Mon Sengko’ ngoca’ ka ba’na, ‘Se reya kodu noro’ ba’na,’ oreng jareya kodu noro’. Tape mon Sengko’ ngoca’, ‘Se reya ta’ olle noro’ ba’na,’ oreng jareya ta’ olle noro’."
5 Gideyon abakta reng-oreng jareya ka songay, dhabuna PANGERAN ka Gideyon, "Reng-oreng se ajilat aeng akantha pate’ palaen dhari reng-oreng se ngenom sambi adekkong."
6 Se ngala’ aeng ngangguy tanangnga pas ajilat aeng jareya dhari tanangnga badha tello ratos oreng; se laenna ngenom sambi adekkong.
7 Dhabuna PANGERAN ka Gideyon, "Kalaban oreng se tello ratos se ajilat aeng jareya, Sengko’ mabebasa ba’na ban ba’na epamennanga ka reng-oreng Midian. Se laenna soro mole."
8 Daddi bi’ Gideyon reng-oreng Isra’il jareya esoro mole kabbi, kajabana se tello ratos oreng. Sango ban tarompet se egiba reng-oreng se epamole jareya, egante bi’ reng-oreng se tello ratos jareya. Parkemahanna oreng Midian badha e baba’anna parkemahanna oreng Isra’il, neng e cora.
9 E malem jareya PANGERAN adhabu ka Gideyon, "Mara jaga, Gideyon, serrang parkemahanna oreng Midian. Ba’na epamennanga bi’ Sengko’.
10 Tape mon ba’na tako’, ajak dunorra ba’na se anyama Pura rowa ka parkemahanna moso.
11 E dhissa’ ba’na bakal ngedhinga apa se ekacaca moso, ban jareya bakal andaddiyagiya ba’na bangal se nyerrangnga." Daddi Gideyon ban Pura pas mangkat ka batessa parkemahanna moso.
12 Oreng Midian, Amalek ban reng-oreng laenna dhari sagara beddhi, acar-pencar e man-dhimman e cora jareya, akantha balang se mo’-ngaromo’. Bannya’na ontana akantha bannya’na beddhi e paseser.
13 Sadhapa’na ka jadhiya, Gideyon meyarsa oreng nyareta’agi mempena ka kancana. Ca’na oreng jareya, "Sengko’ amempe badha roti settong agulu’ maso’ ka parkemahan reya, pas abentor settong kemah. Kemah jareya robbu sampe’ rata ban tana."
14 Saodda kancana, "Wa, jareya tanto peddhangnga Gideyon ana’na Yowas, oreng Isra’il rowa! Jareya artena bi’ Allah oreng jareya la epamennang ka bangsa Midian ban sakabbinna pasukanna!"
15 E bakto meyarsa parkara mempena oreng jareya sarta artena, Gideyon pas asojut abakte ka Allah. Saellana jareya pas abali ka parkemahanna oreng Isra’il, sarta adhabu, "Mara pasadhiya! Bi’ PANGERAN ba’na epamennang ka pasukan Midian!"
16 Pasukanna se tello ratos oreng rowa ebagi tello’. Saneyap oreng epaneggu’i tarompet ban gendhi se aesse colok.
17 Dhabuna Gideyon ka reng-oreng jareya, "Mon sengko’ la napa’ ka penggirra parkemahanna oreng Midian, abassagi sengko’ pagu-onggu, terowe apa’a bai se elakone sengko’.
18 Mon sengko’ ban tang regu mamonye tarompet, tarompedda ba’na kabbi pamonye keya. Saellana jareya ba’na pas kodu aera’ e sakalenglengnga parkemahan jareya, ‘Kangguy PANGERAN sareng Gideyon!’"
19 Para’ tengnga malem, Gideyon ban reng-orengnga napa’ ka batessa parkemahanna moso. E bakto jareya oreng se ngawal parkemahan gi’ buru agante. Gideyon ban regguna pas mamonye tarompedda sarta mabella dhi-gendhina.
20 Regu laenna se dhadhuwa’na kantha jareya keya. Reng-oreng jareya kabbi padha ngangka’ lok-cologga ban tanang kacerra, sarta nope tarompedda se badha e tanang kanganna bang-sebang. Reng-oreng jareya aera’, "Peddhang kaangguy PANGERAN sareng Gideyon!"
21 Kabbi padha manjeng e kennengnganna bang-sebang e sakalenglengnga parkemahan jareya. Angkadan perrangnga moso pas buru rit-tabalirit sambi rat-tharadan.
22 E bakto Gideyon ban reng-orengnga teppa’na mamonye tarompedda, tantarana moso bi’ PANGERAN epasaleng serrang ban peddhang sakanca’anna dibi’. Moso jareya buru nojju ka Zerera sampe’ napa’ ka Bet-Sita ban kottha Abel-Mehola e seddi’anna Tabat.
23 Daddi suku Naftali, Asyer ban suku Manasye se e bara’na Songay Yordan, bariya keya se e temorra, eolok kabbi. Saellana jareya, reng-oreng jareya kabbi padha nyerser tantara Midian.
24 Bariya keya ka saanterona dhaera pagunongan Efraim, Gideyon ngerem kabar kantha reya, "Mara padha toron aperrang ban oreng Midian. Ja’ sampe’ Songay Yordan ban ngay-songay kene’ sampe’ ka Bet-Bara gaggar ka moso. Jaga ja’ sampe’ oreng Midian alengka ngay-songay jareya." Daddi reng-oreng Efraim epamangkat aperrang ajaga Songay Yordan ban ngay-songay kene’ laenna sampe’ ka Bet-Bara sopaja ta’ sampe’a gaggar ka moso.
25 Badha pamimpin Midian kadhuwa se ekenneng tangkep, nyamana Oreb ban Ze’eb. Oreb epate’e e Bato Oreb ban Ze’eb epate’e e pamerressanna anggur Ze’eb. Reng-oreng Efraim jareya terros nyerser oreng Midian, sarta pas ngeba cethagga Oreb ban Ze’eb, eatorragi ka Gideyon e temorra Songay Yordan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA