Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas sada wari Gideon ras kerina anak buahna medak lampas erpagi-pagi, janah erkemah i tepi Ulu Lau Harod. Bangsa Midian erkemah arah Utara ingan kalak enda i bas baluren deherken Uruk More.
2 Nina TUHAN man Gideon, "Nteremsa Kuakap kalak ras kam. Adi nteremsa labo Kubere ia menang ngelawan Midian. Banci jadi iakapna maka ia menang erkiteken gegehna jine, emaka la iberekenna man bangKu kehamaten.
3 Emaka momokenlah, 'Ise mbiar mulih saja ku rumah janah kami tading i Deleng Gileat enda.'" Emaka dua pulu dua ribu kalak mulihken, tapi lit tading sepuluh ribu kalak.
4 Kenca bage nina TUHAN man Gideon, "Nteremsa denga si ngikut ras kam. Baba ia ku lau e, gelah Kupilihi ia i je man bandu. Adi Kukataken maka ia ikut ras kam, ia ikut. Adi kukataken maka la ia ikut ras kam, la ia ikut."
5 Ibaba Gideon kalak enda ngincuah ku lau e, emaka nina TUHAN man bana, "Serapkenlah kalak si minem lau alu dilahna bali ras biang, i bas kalak si deban nari si minem alu erjimpuh."
6 Lit telu ratus kalak si minem alu njaruk lau alu tanna emaka idilatna; kerina si deban erjimpuh ia minem.
7 Nina TUHAN man Gideon, "Aku mulahi kam, janah Kubereken man bandu kemenangen ngelawan bangsa Midian alu telu ratus kalak si ndilati lau e. Suruh si debanna mulih ku rumah."
8 Isuruh Gideon kerina bangsa Israel mulihken ku rumah, seakatan si telu ratus kalak e, si ncikep bekal ras terompet. Bangsa Midian erkemah bernehen kalak enda i bas baluren e.
9 Berngi e iperentahken TUHAN si Gideon, "Kekeken, peranglah perkemahen e. Aku merekenca man bandu kemenangen.
10 Tapi adi mbiar kam ngelawansa, ngincuah kam ku perkemahen e ras suruh-suruhenndu Pura.
11 Ibegindu kari kai sangana icakapken bangsa Midian e, janah kenca si e kari lanai kam mbiar merangsa." Emaka ngincuah Gideon ras suruh-suruhenna Pura ku tepi perkemahen musuh e.
12 Bangsa Midian, bangsa Amalek, ras suku-suku kalak si ringan i gurun pasir e, merap i baluren e desken labang teremna, janah untana bali buena ras kersik i tepi lawit.
13 Sanga Gideon seh i je, ibegina sekalak dilaki nuriken nipina kempak temanna. Nina, "Ernipi aku maka lit sengkibul roti cimpa jaba megulang ku inganta erkemah enda, janah itendengna sada kemah. Runtuh kemah e janah nggo gepa ku taneh."
14 Temanna njabapsa nina, "Pedang Gideon anak Joas kap e, kalak Israel e! Lanai banci lain asang si e. Dibata nggo mereken kemenangen man bangsa Israel ngelawan bangsa Midian ras kerina tenteranta!"
15 Kenca nggo ibegi Gideon kerna nipi e janah kai ertina, erjimpuh ia nembah man Dibata. Emaka mulih ia ku perkemahen bangsa Israel janah nina, "Kekeken! Dibata nggo mereken kemenangen man bandu ngelawan tentera bangsa Midian!"
16 Ibagina tenterana si telu ratus kalak e jadi telu terpuk, janah iberekenna sada terompet ras sada obor i bas guci man tep-tep kalak.
17 Nina Gideon man bana kerina, "Kenca nggo aku seh i tepi perkemahen e pepayo aku, janah lakoken bagi si kulakoken.
18 Kenca aku ras terpukku ngembus terompet, emaka iembusndu ka terompetndu kelewet perkemahen e jenari ersurak, 'Guna TUHAN ras guna Gideon!'"
19 Gideon ras temanna si seratus kalak e seh i tepi perkemahen e nandangi tengah berngi, pas kal kenca pertukaren jaga malam. Emaka iembus kalak enda terompetna janah ipecahkenna guci si icikep-cikepna,
20 emaka terpuk si dua ndai pe ibahanna ka bage. Kerina ia ncikep obor alu tanna si kawes, terompet i bas tanna si kemuhen janah ersurak ia, "Pedang guna TUHAN ras guna Gideon!"
21 Tep-tep kalak tedis i bas inganna sekelewet perkemahen e, janah kerina tentera musuh kiam janahna serko-serko.
22 Sanga anak buah Gideon ngembus terompetna, ibahan TUHAN maka tentera musuh e sitakilen alu pedangna sapih-sapih ia. Kiam tentera e kempak Saretan seh ku Bet-Sita, seh ku kota Abel Meholah deher Tabat.
23 Kenca bage ilebuh me dilaki-dilaki i bas suku Naptali, Aser, ras dua baginna suku Manase ngelis-ngelis bangsa Midian e.
24 Itenahken Gideon berita ku kerina deleng-deleng Eperaim ngataken, "Ngincuahlah ngelawan bangsa Midian. Kuasai Lau Jordan ras kerina lau anak seh ku Betbara gelah ula banci kalak Midian ngepar." Dilo dilaki-dilaki Eperaim, gelah ijagaina Lau Jordan ras lau anak seh ku Betbara.
25 Itaban kalak enda dua kalak peminpin bangsa Midian, eme Oreb ras Seeb. Ibunuhna Oreb deher Batu Oreb, janah Seeb i bas ingan Mereh Anggur Seeb. Iteruskenna ngayak-ngayak bangsa Midian janah ibabana takal Oreb ras takal Seeb man Gideon si nggo berkat ku lepar Jordan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA