Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi mandoding ma si Debora pakon si Barak, anak ni si Abinoam bani ari na sasada ai.
2 Halani adong pambobai na mambobai Israel, halani rosuh uhur ni bangsa in manggalangkon dirini; puji ma Jahowa!
3 Tangar ma, nasiam raja-raja! Tarehon ma pinggolmu, nasiam siparkuasa! Sihol mandoding ahu bani Jahowa, mandodingkon psalm bani Jahowa, Naibata ni Israel.
4 Ale Jahowa, sanggah luar Ham hun Seir, sanggah roh Ham hun tanoh ni Edom, dugur do tanoh, burus langit, hombun pe manektekkon bahni.
5 Dugur do dolog i lobei ni Jahowa ai ma Dolog Sinai i lobei ni Jahowa, Naibata ni Israel.
6 Bani panorang ni si Samgar, anak ni si Anat, bani panorang ni si Jael, lungun pasar na bolon, anjaha halak na maningon mardalan, mardalan humbani dalan na maringgot.
7 Seng dong pambobai i Israel, seng dong tongon paima bangkit ham, Debora, bangkit songon inang i Israel.
8 Dob ipilih Israel naibata na legan, masa ma porang i horbangan. Seng dong be taridah gantar age tanja i tongah-tongah ni ompat puluh ribu halak i Israel.
9 Laho do uhurhu hubani puanglima ni Israel, hubani sidea na mamberehon dirini, humbani rosuhni i tongah-tongah ni bangsa in. Puji ma Jahowa.
10 Nasiam na mangajak halode silopak, nasiam na hundul i atas ni parmadani, nasiam na mardalan i dalan, baritahon nasiam ma in.
11 Mangihutkon sora ni sipamursik bani ianan pambuatan bah, idodingkon halak do ijai, dear layak ni Jahowa, dear layak-Ni bani pambobai ni Israel. Tuad ma ijia bangsa ni Jahowa hu horbangan.
12 Jongjong ma, jongjong ma, Debora! Jongjong ma, jongjong ma, dodingkon ma sada doding! Jongjong ma, Barak! arahkon ma na tinabanmu in, ham anak ni si Abinoam!
13 Jadi tuad ma tading-tadingan ni partuanan, tuad ma bangsa ni Jahowa hubani parporangan na borani.
14 Humbani halak Efraim tuad sidea hu habungan, mangirikkon ham, halak Benjamin: pakon balamu; humbani halak Makir tuad puanglima, anjaha humbani halak Sebulon siboban tungkot harajaon.
15 Sonai homa pambobai ni halak Isasar mangkasomani si Debora, anjaha si Isasar bujur bani si Barak; mardalan nahei mangirikkonsi idorab ma hu habungan ai. I tongah-tongah ni ginompar ni si Ruben, buei do partimbangan.
16 Mase sohsoh ham i holangkolang ni harang ni biribiri, laho manangihon parsulim i lambung hulanan ni pinahan? I tongah-tongah ni ginompar ni si Ruben buei do partimbangan!
17 Tading i dipar ni Jordan do halak Gilead; anjaha halak Dan, mase sohsoh sidea i lambung ni kapal-kapal? Halak Asser hundul i topi ni laut, sohsoh i juruk-jurukni.
18 Tapi halak Sebulon ai ma bangsa na ra mamberehon hosahni hu hamatean, sonai homa Naftali, bani ianan na gijang i ladang.
19 Roh ma raja-raja marporang; bani ari ai marporang ma raja-raja ni tanoh Kanaan, i Taanak, dohorhon Bah Megiddo; sada duit pirak pe lang dong rampason ni sidea.
20 Hun langit marporang bintang-bintang, humbani dalan ni sidea iporangi sidea si Sisera.
21 Bah nabasaia do Bah Kison mangayubkon sidea, bah nabasaia do Bah Kison. Langkahkon ma, ale tonduyhu, marhagogohon.
22 Bani panorang ai marolob-olob ma tambirik ni huda, halani pamosik ni puanglimani.
23 Papai ma Meroz, nini malekat ni Jahowa, sabonar papai ma pangisini, halani seng roh sidea mangurupi Jahowa, mangurupi Jahowa mangkasomani parporang na borani.
24 Pinasu-pasu ma si Jael, parinangon ni si Heber, halak Keni ai, lobih humbani sagala naboru, pinasu-pasu ma ia, lobih humbani sagala naboru na ibagas lampolampo.
25 Bah do ipindo, dadih ibere, ibagas mangkuk na maharga ibere bani dadih.
26 Idurdurhon ma tanganni mambuat pasuk-pasuk, tanganni siamun mambuat parpalu. Ipalu ma si Sisera, ipuntarhon uluni, iropuki anjaha itolpus ma parsuntinganni.
27 Pugul ma ia dabuh i holangkolang ni naheini, matei anjaha tibal ijai; i holangkolang ni naheni dabuh halak ai anjaha matei, bani hadabuhanni ai, ijai ma ia tibal ibogbogi.
28 Humbani tingkap manungkir inang ni si Sisera, anjaha mardilo humbani jandela: Mase hun dokah roh garetani? Mase ma hun dokah tarbogei sora ni garetani?
29 Sipentaran i tongah-tongah ni nasipuang mambalosisi, ia sandiri marbalos bani:
30 Ai lang mandapot taban-taban do sidea anjaha marbagi-bagi ai? Sada barang dua anak boru bani ganup halak, hiou tinubar, na tinaban bani si Sisera, hiou tinubar na sinulam, saparangguan hiou tinubar, na sinulam, bani borgokku songon taban-taban.
31 Sonin ma siap ganup munsuhmu, ale Jahowa. Tapi anggo na mangkaholongi Ham, songon mata ni ari na poltak bani hagogohonni do. Dob ai sonang ma tanoh ai ompat puluh tahun dokahni.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA