Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E are jareya Debora ban Barak ana’na Abino’am anyanye kantha reya:
2 Molja’agi asmana PANGERAN, sabab pahlawan Isra’il padha nekat abilla’ana bangsana, ban ra’yadda padha ehlas aperranga.
3 Para rato sareng pangeran, kasokana meyarsa’agi, abdina anyanye amolja’agi PANGERAN, Allah se esemba Isra’il.
4 Guste Allah PANGERAN kaula, e bakto Junandalem meyos dhari Seir adinggallagi tana Edom, bume agedder, jalanna aeng e langnge’ abukka’, aeng toron ngalowa dhari ondhem e langnge’.
5 Nong-gunong padha agundhek e ajunanna se ngobasane Sinay, e ajunanna PANGERAN, Allahna Isra’il.
6 E jamanna Samgar, ana’na Anat, sapaneka jugan e jamanna Yael, tadha’ kafilah e nagara, tadha’ oreng alalana e lorong rajana.
7 Tha-kottha Isra’il tadha’ orengnga, ce’ seppena, sampe’ ba’na dhateng, Debora; ba’na dhateng padha ban ebu se kataresnan.
8 E bakto Isra’il molae nyemba diba, e nagarana pas badha perrang. Dhari pahlawanna bangsa se pa’ polo ebu bannya’na, tadha’ settonga se ngangka’ sanjatana.
9 Sengko’ talebat ngargai para panglima Isra’il se sokalella noro’ aperrang. Molja’agi PANGERAN!
10 He, reng-oreng se nompa’ hemar pote, reng-oreng se toju’ e babut, ban se ajalan soko, mara berta’agi caretana kamennangan reya!
11 E seddi’na mor-somor badha sowarana reng-oreng jung-kejungan, nyareta’agi kamennanganna PANGERAN se li-baliyan, kamennanganna Isra’il, ommadda PANGERAN. Daddi pas abaris ommadda PANGERAN ajalan ka labang sakethengnga kottha.
12 Jaga Debora, mara anyanye pakaja! Jaga Barak, eret reng-oreng tahanan!
13 Satreya re-karena padha nyander ka pamimpinna, bila’a bai sanggup aperranga abilla’ana pamimpinna jareya.
14 Reng-oreng jareya ajalan dhari Efraim ka cora, noro’ bunte’ pasukanna Benyamin se abaris e adha’anna. Dhari Makhir dhateng para panglima, ban dhari Zebulon dhateng para parwira.
15 Para pangrajana Isakhar dhateng abareng Debora; ongguwan, Isakhar dhateng, ban Barak noro’ keya; kabbi padha noro’ bunte’ Barak jareya toron ka cora. Tape suku Ruben ta’ bisa motose noro’a apa enja’, sabab panemmona reng-orengnga suku jareya ta’ padha.
16 Arapa reng-oreng jareya me’ apolong ban ba-dumba? apa terro ngedhingngagiya tokang ngowan se ngolok ebinna? Pajat suku Ruben ta’ bisa motose noro’a apa enja’, sabab panemmona reng-orengnga suku jareya ta’ padha.
17 Sabatara suku Zebulon ban Naftali aperrang amba’ pate, suku Dan paggun klok-noklok e kapal, ban suku Gad paggun neng e temorra Songay Yordan, dineng suku Asyer tadha’ gulina, ta’ aginjeggan dhari kennengnganna e paseser.
18 (5:17)
19 E Ta’anakh, e seddi’na songay e Megido, to-rato aperrang, bariya keya to-rato Kana’an, tape ta’ ngeba salaka menangka barang rampasan.
20 Tang-bintang noro’ aperrang ngadhebbi Sisera keya, dhari kennengnganna e langnge’.
21 Songay Kison ngalowa, moso eanyo’ tadha’ karena. Mara maju, maju pabangal, tang sokma!
22 Ran-jaran se epeccot bi’ se nompa’ berka’ ce’ santa’na jek-garjeggan monyena sokona.
23 "Basto Meros ban pandhudhu’na," dhabuna malaekadda PANGERAN, "sabab reng-oreng jareya ta’ aberri’ bantowan ta’ noro’ aperrang abillai PANGERAN."
24 Pojur Yael, binena Heber oreng Keni rowa, dhari antarana reng-oreng essena kemah, aba’na se paleng eberkadi Pangeran.
25 Sisera menta aeng, bi’ Yael eberri’i susu, susuna ebaddhai cangker se pantes eangguy rato.
26 Yael mokol Sisera ngangguy paji ban tokol, sampe’ cethagga ancor.
27 Sisera robbu e sokona Yael la tadha’ nyabana ajalamperran e tana napa’ ka ajalla.
28 Dhari ca’-raca’na candhela ebuna Sisera nyongngo’ ka lowar, pas ngoca’, "Arapa me’ ta’ endha’ dhateng karetana, arapa paberka’na jaranna me’ ta’ ekaedhing monyena?"
29 Bu’ embanna se paleng bicaksana ajawab menorot se ekarassa e atena,
30 "Tantona gi’ padha gi-magi barang rampasan, saneyap tantara, kabagiyan paraban settong otaba dhadhuwa’, Sisera kabagiyan bakalla rasogan se paleng aji, din aju rato kabagiyan penjung se solamanna ana-barna."
31 Moga sadajana mosona Junandalem, GUSTE, eparengngana mate akadi Sisera, namong sadajana sahabadda Junandalem eparengngana jaja akadi are se badha e langnge’! Saellana jareya, nagara jareya taremtem pa’ polo taon abidda.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA