Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas wari e iendesken Debora ras Barak ende-enden:
2 Pujilah TUHAN! Itetapken bangsa Israel ukurna erperang alu ukur meriah.
3 Begikenlah o raja-raja! Begikenlah o kam pemerentah! Rende ateku, rende man TUHAN, Dibata bangsa Israel.
4 TUHAN, sanga ItadingkenNdu Deleng Seir, sanga Kam ndarat nadingken negeri Edom mugur-ugur doni enda janah udan ndabuh i langit nari. Payo, lau mambur i embun nari.
5 Mundu-undu deleng i lebe-lebe TUHAN Deleng Sinai, mundu-undu deleng i lebe-lebe TUHAN Dibata Israel.
6 I bas paksa Samgar anak Anat, i bas paksa Jael lanai lit arak-araken perbinaga mentasi negeri e, janah kalak gawah-gawah erdalan arah dalan si deban.
7 Kota-kota Israel tempa-tempa terulang, O Debora; nggo mesuni seh kam reh, reh desken sekalak nande man bangsa Israel.
8 Kenca bage lit perang i negeri e sanga bangsa Israel milih dibata-dibata si mbaru, empat puluh ribu kalak dilaki i bas bangsa Israel, lit kin si ngangkat ampang-ampang, ntah lembing?
9 Megah kal ukurku ngidah puanglima-puanglima Israel, bage pe rayat si umeriah ukur ngendesken bana. Pujilah TUHAN!
10 Turikenlah e o, kam si ngersak kalde mbentar, kam si kundul i babo pelana, ras kam si terpaksa erdalan nahe ku japa pe kam lawes.
11 Begikenlah! Jelma si nterem ersurak i kelewet sumur. Nuriken kemenangen TUHAN, kemenangen bangsa Israel! Kenca bage bangsa TUHAN ngincuah i kotana nari.
12 Pinpinlah, Debora, pinpinlah terus! Pinpinlah terus! Rendelah! Pinpinlah terus! Ku lebe kam, o Barak anak Abinoam! Babai tabanenndu erdalan!
13 Kenca bage nusur kalak si setia ndahi peminpinna; bangsa TUHAN reh man BaNa, sikap guna erperang.
14 Reh ia i Eperaim nari ku baluren e, arah pudi suku Benyamin ras rayatna. Puanglima-puanglima nusur i Makir nari, perwirana nusur i Sebulon nari.
15 Peminpin Isakar reh ras Debora; tuhu, Isakar reh ras Barak pe, janah ikutkenna Barak ku baluren e. Tapi suku Ruben erbelah-belah; la terputuskenca ikut tah lang.
16 Ngkai maka ia tading deherken karang asuh-asuhen? Megiken suling pendilo rarasen? Tuhu, suku Ruben erbelah-belah; la terputuskenca ikut tah lang.
17 Suku Gat tading i Timur Lau Jordan, janah suku Dan tetap tading deherken kapal. Suku Aser tading i tepi lawit; kalak enda la nggit miser i tepi lawit nari.
18 Tapi bangsa Sebulon ras Naptali, pang ngasamken kesahna i bas perang.
19 Taanak, deherken lau i Megido, reh raja-raja janah erperang; raja-raja Kanaan e erperang, tapi pirak la lit irampasna.
20 Bintang-bintang pe ikut erperang. I bas perdalanenna i langit nari, erperang ia ngelawan Siseraken.
21 Lau Kison ergalun ngombakken musuh, Lau Kison deras pemalerna. Aku maju, maju terus, alu megegeh!
22 Kenca bage reh kuda ngeratuh sora tapak-tapakna kuritap i babo taneh.
23 "Sumpahilah kota Meros," nina malekat TUHAN. "Kena sumpah, kena sumpah kerina si tading i je. La ia reh nampati TUHAN, la ia reh bagi tentera si erperang guna TUHAN."
24 Sangap me Jael ndehara Heber bangsa Keni e diberu si sangapna i bas kerina diberu si ringan i bas kemah.
25 Ipindo Siseraken man Jael lau, tapi iberekenna susu. Tare mangkuk si mejile, idudurkenna susu si mehulina.
26 Ibuatna pantuk-pantuk kemah alu tanna si kawes, janah sada martel tukang alu tanna si kemuhen ipaluna Siseraken, ipecahkenna takalna; itajakna takalna seh pultak.
27 Erjimpuh Siseraken, guling ampar i deher nahe Jael. I deher nahe Jael erjimpuh Siseraken jenari guling; guling ia ku taneh, mate.
28 Ipernehen nande Siseraken arah jendela, itungkirna arah jerijak jendela. "Ngkai maka bage lawenna gereta reh?" nina nungkun. "Ngkai maka bage meletna kudana mulih?"
29 Ngaloi diberu-diberu si pentarna, janah iulih-ulihina ngerana man dirina jine,
30 "Ndatken barang perang nge kalak ndai, janah mbagi-bagikenca, sada ntah dua diberu man tiap sekalak tentera, uis si mejile man Siseraken piga-piga potong kain sulam man kerahung kemberahen."
31 Mbera kerina MusuhNdu bage permatena O, TUHAN, tapi teman-TemanNdu ersinalsal bagi matawari si sangana nangkih! Emaka dame negeri e empat puluh tahun dekahna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA