Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri matenamo Ehud, dorakami pole bansa Israel mae ri Batara.
2 Jari nibalang parekkammi ke’nanga ri Batara, na nibeta ri Yabin, iamintu karaeng Kanaan, ammantanga ri kota Hazor. Ia panglimana ke’nanga niarengi Sisera, ammantanga ri Haroset-Hagoyim.
3 Nia’ 900 kareta bassi naballaki Yabin untu’ napake a’bundu’. Ruampulo taungi najaja siagang nasessa tu Israel. Nampa akkio’mo tu Israel appala’ tulung ri Batara.
4 Anjo wattua a’jari pamimpinga ri Israel, iamintu sitau na’bi baine niarenga Debora, bainenna Lapidot.
5 Biasai ammempo Debora irawanganna poko’ kormaya, niaka ri alla’na kota Rama siagang kota Betel, ri daera monconna Efraim. Anjoremmi battu tu Israel mange appala’ pappakainga’ battu ri ia.
6 Ri se’reang allo, nasuro kio’mi tu niarenga Barak, ana’naya Abinoam, battua ri kota Kedes, ri daera Naftali. Nampa nakanamo ri Barak, "Iaminne parentaNa Batara, Allata’alana tu Israel mae ri kau: ‘Passe’rei 10.000 jaina tu bura’ne battua ri suku Naftali siagang suku Zebulon. Nampa nuerang ke’nanga mange ri Moncong Tabor.
7 LaKupabattui sallang Sisera mae ri kau ri Binangana Kison, siagang tantarana, kammayatompa kareta-kareta bundu’na untu’ ambundukiko. Mingka laKusareko pammetang lalang ri anjo pa’bundukanga.’"
8 Angkanami Barak ri Debora, "Punna amminawanjako, ero’ja’ a’lampa. Mingka punna tena, tena todong nakuero’ a’lampa."
9 Appialimi Debora angkana, "Baji’mi, lamminawanga’! Mingka u’rangi teai kau sallang langgappa pappakala’biri’. Sitau baine laNapake Batara ambetai Sisera." Jari a’lampami Debora siagang Barak mange ri Kedes.
10 Anjo wattua nia’ 10.000 tau amminawang ri Barak siagang Debora.
11 Anjo wattua nia’ se’re tau nikana Heber tu Keni, nasa’la’mi kalenna battu ri bansana (anjo bansa Keni turungang battu ri Hobab, ipara’na Musa). A’lampami Heber appaenteng siapa are jaina kema rampi’na poko’-poko’ niarenga poko’ terpentin ri Zaanaim, tena nabella battu ri Kedes.
12 Nalangngere’na Sisera angkana a’lampami Barak mange ri Tabor,
13 akkaro-karomi napa’rappungang anjo salapang bilangnganga kareta bundu’ bassina. Kammayatompa napasse’re tommi sikontu tantarana. Nampa naerang ke’nanga battu ri Haroset-Hagoyim mange ri Binanga Kison.
14 Nampa nakanamo Debora ri Barak, "Maju mako! Batara ampimpingko. Anne alloa Nasareko pammetang mae ri Sisera." Jari naummi Barak battu ri Moncong Tabor, siagang anjo sampuloa sa’bu taunna.
15 Nampa nabunduki Sisera. Na nipa’jari kacomo ri Batara anjo tantarana Sisera siagang kareta-kareta bundu’na. Sa’genna naummi Sisera battu ri kareta bundu’na, nampa lari a’jappa bangkeng.
16 Naondammi Barak anjo kareta-kareta bunduka siagang tantara musua sa’genna mange ri Haroset-Hagoyim. Nampa nabuno ngaseng sikontu tantarana Sisera. Tena manna sitau nalappasang attallasa’.
17 Na sitabanna anjo larimi Sisera mange ri kemana Yael, iamintu bainenna Heber, anjo tu Kenia. Nasaba’ anjo Karaeng Yabin battu ri Hazor, agangi siagang bija-bijanna Heber.
18 Ri wattunna battu Sisera, niruppaimi ri Yael. Nakana, "Maeki’, antamakki’ ri kemaku; tea’ maki’ mallaki." Jari antama’mi Sisera ri anjo kemaya. Nampa natongko’ Yael siagang kaeng gordeng sollanna taccokko.
19 Nakanamo Sisera ri Yael, "Tulunga’, nanusaresa’ sike’de’ je’ne’ inung, katurere dudua’." Jari angngallemi Yael guci pammolikang je’ne’ dadi’na, nampa nasarei angnginung Sisera. Le’baki anjo natongkokimi pole kaeng gordeng.
20 Nampa nakanamo Sisera ri Yael, "Mangeko ammenteng ri timungang kemaya. Punna nia’ tau battu nakkuta’nang ri kau apaka nia’ tau anrinni, pauangi angkana tena."
21 Lanri sanna’na mangnganna, ta’do’do’mi Sisera sa’genna attinro jannang. Angngallemi Yael se’re palu-palu siagang patto’ kema, nampa palang-palang anreppessi Sisera. Nampa napatinting anjo pattoka ri pilisi’na Sisera sa’genna annarrusu’ naung ri buttaya. Kammaminjo nanibunomo Sisera ri Yael.
22 Ri wattunna battu Barak amboyai Sisera niruppaimi ri Yael na nakanamo ri ia, "Maeki’, nakupaccinikangki’ anjo tau kiboyaya." Antama’mi Barak siagang Yael. Nacini’mi Sisera matemo ammonrang rawa ri buttaya siagang nia’ patto’ tattinting ri pilisi’na.
23 Anjo alloa nisaremi pammetang tu Israelka mae ri Yabin, karaeng Kanaan.
24 Pila’ nijallakkammi anjo karaenga, sa’genna kala’busanna lanynya’mi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA