Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Saellana Ehud seda, bangsa Isra’il agabay dusa pole ka PANGERAN.
2 Daddi bi’ PANGERAN bangsa Isra’il epanneng epakala bi’ Yabin, rato Kana’an se marenta neng e kottha Hazor. Panglimana angkadan perrangnga iya areya Sisera se abengko e Haroset-Hagoyim.
3 Yabin kaagungan kareta perrang sangang atos meggi’, kareta jareya dhari besse. Dhu polo taon abidda Yabin ngobasane bangsa Isra’il; Yabin jareya kejjem ka bangsa Isra’il. Daddi ommat Isra’il pas aserro nyo’on tolong ka PANGERAN.
4 E bakto jareya bangsa Isra’il epimpin nabbi babine’ se asmana Debora, rajina Lapidot.
5 Debora biyasana alenggi e babana bungkana korma, e antarana Rama ban Betel, e tana pagunongan Efraim; reng-oreng Isra’il biyasana nyabis ka jadhiya mon parlo nyo’ona babala’an.
6 E settong are Debora makon oreng ngolok Barak, ana’na Abino’am, dhari kottha Kedes e dhaera Naftali. Dhabuna Debora ka Barak, "PANGERAN, Allahna Isra’il, apareng papakon ka ba’na, dhabuna: ‘Pakompol lalake’an sapolo ebu oreng dhari suku Naftali ban Zebulon, pas giba ka Gunong Tabor.
7 Sisera, panglima perrangnga Yabin rowa, bi’ Sengko’ epaentara ka Songay Kison, ngeba tantarana ban ta-kareta perrangnga, merrangana ba’na. Tape bi’ Sengko’ ba’na epamennanga e dhalem paperrangan jareya.’"
8 Saodda Barak, "Abdina poron mangkat manabi panjennengngan meyos jugan. Manabi panjennengngan ta’ meyos, abdina ta’ mangkada jugan."
9 Dhabuna Debora, "Iya, mara, sengko’ noro’a! Tape banne ba’na se narema’a kahormadan samarena perrang jareya, sabab PANGERAN bakal makala’a Sisera kalaban ngangguy oreng babine’." Daddi Debora meyos ka Kedes asareng Barak.
10 Barak ngeba oreng suku Zebulon ban Naftali ka Kedes. Se noro’ Debora ban Barak e bakto jareya badha sapolo ebu oreng.
11 E bakto jareya Heber, oreng Keni, mesa dhari bangsana. (Bangsa Keni reya toronanna Hobab, epar lake’na Mosa.) Heber masang mah-kemahna e seddi’na ka-bungkana terpentin e Za’ananim, ta’ jau dhari Kedes.
12 E bakto Sisera ngedhing ja’ Barak la entar ka Gunong Tabor,
13 laju makompol kareta perrangnga se dhari besse, se bannya’na sangang atos meggi’, ban sakabbinna pasukanna, saellana jareya kabbi pas padha mangkat dhari Haroset-Hagoyim ka Songay Kison.
14 Dhabuna Debora ka Barak, "Mara, maju! PANGERAN se mimpina ba’na! Sateya bi’ PANGERAN ba’na epamennanga ka Sisera." Daddi Barak toron dhari Gunong Tabor abareng ban pasukanna se sapolo ebu oreng,
15 pas nyerrang Sisera. Pasukan ban kareta perrangnga Sisera epacar-mencar bi’ PANGERAN, daddi Sisera toron dhari karetana, pas buru ajalan soko.
16 Barak nyerser ta-kareta perrang ban pasukanna moso sampe’ ka Haroset-Hagoyim, pasukanna Sisera epate’e kabbi; tadha’ karena se gi’ odhi’.
17 Sabatara jareya Sisera buru ka kemahna Yael, binena Heber, oreng Keni rowa, sabab Rato Yabin dhari Hazor akanca rapet ban balana Heber.
18 E bakto Sisera napa’ ka jadhiya, Yael kalowar nemmone, pas ngoca’, "Ngereng, maso’ ka kemah abdina. Ampon, ja’ tako’." Daddi Sisera maso’, bi’ Yael epangetek e budhiyanna kaen gorden.
19 Ca’na Sisera ka Yael, "Kaula nyo’ona aengnga sakone’, kaula pelka’." Yael mokka’ kanthong kole’ baddhana susu, Sisera eberri’i ngenom, pas epangetek pole e budhiyanna kaen gorden.
20 Ca’na Sisera ka Yael, "Sampeyan manjeng e adha’anna labangnga kemah. Mon badha oreng atanya ponapa badha oreng e ka’iya, kabala tadha’."
21 Sisera ce’ lessona sampe’ tedhung ce’ ngeddhana. Yael ngala’ tokol ban pajina kemah, pas ajalan teng-netteng nyemma’e Sisera. Paji gella’ pas etaccekkagi ka leng-pelenganna Sisera sampe’ terbas ka tana. Kantha jareya carana Yael se mate’e Sisera.
22 E bakto Barak napa’ ka jadhiya nyare’e Sisera, Yael kalowar nemmone, pas ngoca’, "Ngereng, abdina noduwagiya oreng se esare panjennengngan." Barak maso’ noro’ bunte’ Yael, pas nangale’e Sisera se la mate, agentang e tana, e leng-pelenganna naccek pajina kemah.
23 E are jareya bi’ Allah bangsa Isra’il epamennang ka Yabin, rato Kana’an.
24 Rato jareya sajan abit sajan epata’nemmo era bi’ bangsa Isra’il, sampe’ dhi-budhina seda.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA