Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tapi on do bangsa sipajuh begu-begu na ipaturut Jahowa, laho manlajou Israel marhitei sidea, ai ma sagala na so mambotoh pasal parporangon i tanoh Kanaan,
2 ase marpambotoh marga ni halak Israel pasal parporangon, ase tarajarhonsi parporangon bani sidea, sagala na so marpambotoh pasal ai hinan,
3 ai ma lima raja ni halak Palistim, haganup halak Kanaan, halak Sidon pakon Hewi, na marianan i Dolog Libanon, singgan ni Dolog Baal-Hermon das hu Hamat.
4 Sidea ma na manlajou Israel, laho mangidah, barang tangihonon ni sidea do titah ni Jahowa, na tinonahkon-Ni bani ompung ni sidea marhitei si Musa.
5 Jadi dob marianan halak Israel i tongah-tongah ni halak Kanaan, Heti, Amori, Peresi, Hewi pakon Jebusi,
6 gabe ibuat ma boru ni sidea bahen parinangon ni sidea, anjaha ibere boru ni sidea bani anak ni sidea, anjaha isombah naibata ni sidea.
7 Dob ai ihorjahon halak Israel ma sogam ni uhur ni Jahowa, ihalupahon Jahowa, Naibata ni sidea ai, anjaha ibalosi sidea Baal pakon Aserot.
8 Jadi gajag ma ringis ni Jahowa dompak Israel, gabe ijualhon ma sidea hu tangan ni si Kusan-Risataim, raja hun Mesopotamia; gabe pambalosi ma halak Israel hubani si Kusan-Risataim ualuh tahun dokahni.
9 Dob ai doruh-doruh ma halak Israel bani Jahowa, gabe ipabangkit Jahowa ma sada sipaluah bani Israel, laho paluahkon sidea, ai ma si Otniel, anak ni si Kenas, anggi ni si Kaleb.
10 Jadi sogop ma bani Tonduy ni Jahowa, gabe iuhumi ma halak Israel; bingkat ma ia marporang, jadi iondoskon Jahowa ma hu tanganni si Kusan-Risataim, raja ni Mesopotamia ai; ipatunduk tanganni ma si Kusan-Risataim ai.
11 Jadi marhasonangan ma tanoh ai ompat puluh tahun dokahni. Dob ai matei ma si Otniel, anak ni si Kenas ai.
12 Tapi iulaki halak Israel ma use mambahen sogam ni uhur ni Jahowa; jadi ipargogohi Jahowa ma si Eglon, raja ni Moab mangimbang halak Israel, halani na hinorjahon ni sidea ai sogam ni uhur ni Jahowa.
13 Iarahkon ma halak Amon pakon Amalek, bingkat ma ia, ipatunduk ma Israel anjaha isoluk huta parkurmaan.
14 Jadi maningon balosan ni halak Israel ma si Eglon, raja ni Moab ai, sapuluh ualuh tahun dokahni.
15 Jadi doruh-doruh ma halak Israel bani Jahowa, gabe ipabangkit Jahowa ma bani sidea sada sipaluah, ai ma si Ehud, anak ni si Gera, marga Benjamin, matei lopah do tanganni siamun; isuruh halak Israel ma ia mamboan utang sombah hubani si Eglon, raja ni Moab.
16 Dob ai ipauli si Ehud ma bani sada podang sidua mata, saasta ganjangni; jadi igonditkon ma ai bani binongeini hampit siamun i toruh ni hiouni.
17 Jadi itaruhkon ma utang sombah ai hubani si Eglon, raja ni Moab; jolma na mombur tumang do si Eglon ai.
18 Jadi dob ondos isombahon utang sombah ai, isuruh ma mulak siboan utang sombah ai.
19 Mulak ma anggo ia hun gana-gana na i Gilgal, anjaha nini Ma, “Adong do hata ponopanku bamu, alo rajanami.” Jadi iparentahkon Ma, “Sip.” Dob ai luar ma sagala na jongjong i lambungni.
20 Dob ai iparayak si Ehud ma ia, sanggah hundul ia tumang i kamar pardatas ni panatap-natapanni. Nini si Ehud ma, “Adong do bangku tonah ni Naibata bamu.” Jadi jongjong ma raja ai humbani karosini.
21 Ipagostong si Ehud ma tanganni sambilou, iumpat ma podangni humbani binongeini,
22 itikamkon ma ai hu boltokni, gabe masuk ma mata ni podang ai rap pakon suhulni; lanjar irongkop taboh-taboh ai do mata ni podang ai, halani lang iumpat podang ai humbani boltokni; kaluar do ginagatni.
23 Dob ai luar ma si Ehud hu surambih; ioruk ma labah ni kamar par datas ai lanjar ikunsi.
24 Kaluarhonsi ia, roh ma juakjuak ni raja ai manorih, tapi oruk do labah ai jumpah sidea. Nini sidea ma, “Tontu na hu duru do ia i kamar panatap-natapanni ai.”
25 Jadi ipaima-ima sidea ma pala bulinsah, tapi lanjar seng ibuha raja ai labah ni kamar pardatas ai. Dob ai ibuat sidea ma anakkunsi, ibuha sidea ma labah ai, jadi tonggor ma, domma tibal tuan ni sidea ai i dasor, matei.
26 Sanggah na paima-imahon ai sidea, domma maporus si Ehud, domma pala ilopusi gana-gana ai, anjaha maluah hu Seira.
27 Dob das ia hujai, isompul ma tarompit i Dolog Efraim, jadi tuad ma halak Israel rap pakonsi hun dolog ai, ia mambobahon sidea.
28 Nini ma dompak sidea, “Irikkon nasiam ma ahu, ai domma iondoskon Jahowa halak Moab munsuh nasiam ai hubagas tangan nasiam.” Jadi tuad ma sidea mangirikkonsi, gabe dapot sidea ma pandiparan ni Jordan, tontang ni Moab, anjaha lang ilopas mandipar age sahalak.
29 Ibunuh sidea ma bani panorang ia, hira-hira sapuluh ribu halak Moab, haganup halak na gogoh anjaha halak parmunsuh, sahalak pe lang na maluah.
30 Sonai ma Moab bani ari ai ipatunduk hu toruh ni kuasa ni halak Israel, anjaha sonang ma tanoh ai ualuh puluh tahun dokahni.
31 Dob ia, bingkat ma si Samgar, anak ni si Anat, na mamunuh halak Palistim pakon simambu ni lombu onom ratus halak; dihut do ia paluahkon Israel.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA