Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri wattunna a’rappungang tu Israel ri Mizpa, a’janjimi ke’nanga mae ri Batara angkanaya tena manna sitau battu ri ke’nanga langkellai ana’ tulolonna nibaineang ri tu Benyamin.
2 Kamma-kamma anne a’lampami ke’nanga mange ri Betel, nammempo si’na pa’mai’na sa’genna bangngi ri dallekanNa Batara. Angngarruki siagang akkioki ke’nanga mae ri Batara, angkana,
3 "O, Batara, Allata’alana Israel, angngapa namusti kajariang ngaseng anne sikammaya? Suku Benyamin, kalase’renna suku bansana ikambe, a’birimmi lanynya’!"
4 Ammukona, bari’basa’ dudu, appaentemmi umma’ Israel se’re tampa’ pakkoro’bangngang anjoreng, nampa assare koro’bang ke’nanga mae ri Batara iamintu koro’bang nitunu siagang koro’bang passiamakkang.
5 Nampa nasalidiki ke’nanga, apaka nia’ battu ri suku-suku bansa Israel tamangea asse’re andallekang mae ri Batara ri Mizpa pirangalloang. (Anjo wattua le’ba’mi assumpa ke’nanga angkanaya tau tenaya nabattu ri pakkiokanga mange ri Mizpa musti nihukkung matei).
6 Umma’ Israel nakamaseangi anjo sari’battanna ke’nanga iamintu Benyamin; nakana ke’nanga, "Anne alloa tappelaki kalase’renna sukuna Israel.
7 Musti nia’ apa nigaukang sollanna anjo tu Benyamin niaka tassesa akkullei nia’ bainenna, lanri ikatte le’ba’ maki’ assumpa mae ri Batara angkanaya tena nalanikellai ana’ tulolonta a’jari bainenna tu Benyamin."
8 Jari nasalidikimi ke’nanga apaka nia’ se’re golongang battu ri suku bansana Israel tena na’lampa asse’re ri Mizpa. Na nagappamo ke’nanga angkanaya battu ri tu Yabesh ri Gilead, tena manna sitau a’lampa mange ri Mizpa.
9 Nasaba’ ri wattunna niparessa dattara’ hadereka, ma’nassami angkanaya manna sitau tania’ battu Yabesh.
10 Lanri kammana, anjo tau niaka a’rappung ri Betel, akkirimmi 12.000 tau kaminang barania battu ri ke’nanga untu’ mange ambunoi sikamma taua ri Yabesh, kammayatompa tubainea siagang ana’-anaka.
11 Niparentakangi ke’nanga ambunoi sikontu tu bura’nea, siagang sikontu baine tenayamo natulolo.
12 Jari ri sikamma tau niaka tassesa ri Yabesh, nia’mo nagappa ke’nanga 400 tuloloiji. Naerammi ke’nanga anjo sikamma tuloloa mange ri pakkemaanga ri Silo niaka ri pa’rasangang Kanaan.
13 Nampa sikontu umma’ Israel akkirimmi tunisuro mange ri tu Benyamin niaka ri moncong-moncong batu ri Rimon untu’ angngerang passiamakkang.
14 Lanri kammana anjo nia’mi ammotere’ tu Benyamin, nampa napassareammo umma’ Israel mae ri ke’nanga anjo sikamma tulolo batua ri Yabesh tenaya nanibunoi. Mingka tanggannakai jaina anjo tuloloa mae ri tu Benyamin.
15 Tu’guru’ pangngamaseammi umma’ Israel mae ri tu Benyamin, lanri Nareppe’mi Batara kase’reanna suku-suku bansa Israel.
16 Lanri kammana anjo sikamma pamimping niaka a’rappung ri Betel angkanami, "Lalang ri suku Benyamin tenamo tu baine. Mingka apami lanigaukang; takkulleaki’ angkellai ana’-ana’ tulolonta a’bunting siagang ke’nanga, lanri le’ba’ maki’ assumpai sikamma tau eroka ri katte angkellai ana’ tulolonna a’bunting siagang se’reang tu Benyamin! Jari apami lanigaukang mae ri anne ke’nanga tassesaya sollanna akkulle nia’ todong bainenna ke’nanga? Gassingka tappelaki kalase’renna sampuloa anrua sukuna Israel. Musti a’boyaki’ oloang sollanna akkulle suku Benyamin nia’ jari-jarina situlusu’na siagang tuli napatang todong sikontu buttana."
17 (21:16)
18 (21:16)
19 Nakanamo ke’nanga, "Kammanne! Nia’ se’re akkulle nigaukang, iamintu ri wattu passua’-suarrang tunggala’ taunga untu’ Batara ri Silo." (Ri timboranna Silo niaki kota Betel, na laukanna nia’ agang lompona Betel mange ri Sikhem, nampa warakkanna iamintu kota Lebona.)
20 Jari nakanamo pamimping-pamimpinna anjo pa’rappunganga ri Betel mae ri sikamma tu Benyamin niaka tassesa, "A’lampa ngasemmako accokko ri koko-koko anggoroka ri Silo,
21 siagang a’jaga-jaga mako anjoreng. Sinampe’ punna assulu’ sikamma tuloloa ri Silo untu’ a’joge’ ri passua’-suarrang tunggala’ taunga mae ri Batara, musti assulukko battu ri anjo koko-koko anggoroka. Nampa massing angngallemako tasse’rei tulolo battu ri ke’nanga nampa nulariang mange ri daerana Benyamin nupa’jari bainennu.
22 Punna battu manggena yareka sari’battang bura’nena antuntuki, akkulleko angkana, ‘Napalaki ikambe nakikellaimo ke’nanga ammantang ri kambe. Tenaja naalle passai ikambe lalang pa’bundukang. Na lanri tenana nupassareangi mae ri kambe anne ke’nanga, jari tenaja nanidakkai parjanjianga, jari tenaja nasala.’"
23 Jari nagaukammi tu Benyamin anjo apa nipaua mae ri ke’nanga. Massing allariammi ke’nanga tasse’rei tulolo battu ri anjo sikamma tulolo a’jogeka ri Silo. Nampa ammotere’ ke’nanga mange ri daerana ke’nanga siagang nabangung ammotere’ kota-kotana, nampa ammantang tulimo anjoreng.
24 Tu Israel maraenga a’lampa tommi. Ammotere’mi ke’nanga ri buttana ke’nanga ilalang ri massing daerana ke’nanga, situru’ bija-bijanna siagang suku-sukuna.
25 Ri anjo jammanga tenapa karaeng ri Israel. Massing nagaukangi ke’nanga apa nakanaya tojeng.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA