Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ia si Jepta, halak Gilead ai, sada puanglima na borani do ia, tapi anak ni sada puang-puang boru jalang do ia; bapa ni si Jepta ai ma si Gilead.
2 Sonai homa itubuhkon parinangon ni si Gilead do anak dalahi bani. Dob ganjang anak ni parinangonni ai, iusir sidea ma si Jepta, nini ma hu bani, “Seng panean ho i rumah ni bapanami, ai anak ni naboru na legan do ho.”
3 Jadi maporus ma si Jepta humbani saninani ai, lanjar marianan i tanoh Tob. Dob ai martumpu ma hubani si Jepta halak na hampung maruhur, na laho manamun odor pakonsi.
4 Bani dokah-dokah ni ari marmunsuh ma halak Amon mangimbang halak Israel.
5 Jadi dob marmunsuh halak Amon pakon halak Israel, laho ma pangintuai-pangintuai ni Gilead mangalopi si Jepta hun tanoh Tob.
6 Nini ma dompak si Jepta, “Roh ma ham, ham ma pambobainami ase porang hita halak Amon.
7 Nini si Jepta ma dompak pangintuai-pangintuai ni Gilead ai, ʻAi lang nasiam sandiri do na marsogam ni uhur mangidah ahu, anjaha na mangusir ahu hun rumah ni bapa? Mase ma roh nasiam sonari hu bangku sanggah tarsosak nasiam?ʼ
8 Dob ai nini pangintuai-pangintuai ni Gilead ma dompak si Jepta, ʻSasintongni, roh do hanami use marayak ham, ase ihasomani ham hanami marmunsuh dompak halak Amon, anjaha ase ham gabe pambobai bennami, haganup pangisi ni tanoh Gilead.ʼ
9 Nini si Jepta ma dompak pangintuai-pangintuai ni Gilead, ʻJadi anggo mulak ma ahu, ialopi nasiam laho marporang dompak halak Amon, anjaha iberehon Jahowa sidea hu bangku, jadi ahu ma tongon gabe pambobai bani nasiam?ʼ
10 Jadi nini pangintuai-pangintuai ni Gilead ma dompak si Jepta, ʻJahowa do saksi, na mambogei hita, anggo lang ibahen hanami songon na hinatahonmu ai.ʼ
11 Jadi iirikkon si Jepta ma pangintuai-pangintuai ni Gilead ai, gabe ipabangkit bangsa ai ma ia gabe pambobai ampa puanglima ni sidea. Ihatahon si Jepta ma ganup hatani ai i lobei ni Jahowa i Mispa.”
12 Dob ai isuruh si Jepta ma suruhanni hubani raja ni halak Amon, mangkatahon, “Ai dihamu dong bangku, ase roh ham hu bangku laho mamorang tanohku?
13 Nini raja ni halak Amon ma dompak suruhan ni si Jepta, ʻHalani na binuat ni halak Israel do tanohku sanggah partangkogni ai hun Masir, hun Bah Arnon nari das hu Bah Jabok anjaha das hu Bah Jordan.ʼ On pe paulak ma ganupan ai ibagas damei.”
14 Dob ai isuruh si Jepta ma use suruhanni hubani raja ni halak Amon,
15 nini ma hu bani, “Sonon do hata ni si Jepta, ʻSeng dong ibuat halak Israel tanoh ni halak Moab age tanoh ni halak Amon.ʼ”
16 Ai sanggah partangkog ni sidea hun Masir, mardalan do halak Israel i halimisan das hu Laut Sigerger, anjaha das ma sidea hu Kades.
17 Jadi isuruh halak Israel ma suruhanni hubani raja ni Edom mangkatahon, “Palopas ham ma hanami mamontas hun tanohmu.” Tapi seng itangihon raja ni Edom. Isuruh sidea ma use halak hu bani raja ni tanoh Moab, tapi seng ibalosi. Jadi tading ma Israel i Kades.
18 Dob ai misir ma sidea mamontas halimisan, manginggoti tanoh Edom pakon tanoh Moab, gabe das ma sidea hampit hapoltakan ni tanoh Moab, anjaha marsaran ma sidea i dipar ni Bah Arnon; tapi seng imasuki sidea tanoh ni Moab, ai Bah Arnon do parbalogan ni tanoh Moab.
19 Dob ai isuruh halak Israel ma suruhanni hubani si Sihon, raja ni halak Amori, raja i Hesbon; ihatahon halak Israel ma hu bani, “Palopas ham ma hanami mamontas tanohmu on das hu bani ianan siparayakonnami.”
20 Tapi seng tenger uhur ni si Sihon manlopas halak Israel mamontas hun tanohni, jadi ipatumpu si Sihon ma ganup rayatni, marsaran ma ia i Jahas, lanjar marporang mangimbang halak Israel.
21 Tapi iondoskon Jahowa, Naibata ni Israel do si Sihon pakon ganup rayatni hu tangan ni halak Israel, lanjar italuhon do sidea; gabe isoluk halak Israel ma ganup tanoh ni halak Amori, na marianan i nagori ai.
22 Sonai ma panoluk ni sidea bani tanoh ni halak Amori, hun Bah Arnon nari das hu Bah Jabok, anjaha hun halimisan nari das hu Bah Jordan.
23 On pe domma isoluk Jahowa Naibata ni halak Israel halak Amori, halani bangsani halak Israel, hape sihol solukonmu use tanoh in?
24 Ai lang ham do simada atap aha pe na binere ni Kamos, naibatamu ai? Sonai ma, hanami do simada haganup, na sinoluk ni Jahowa Naibatanami.
25 On pe, mintor bujuran ma ham ninuhurmu humbani si Balas, anak ni si Zippor, raja ni Moab? Ongga ma ia maringor ampa halak Israel, barang ongga ma ia marporang dompak sidea?
26 Sanggah na marianan halak Israel i Hesbon ampa i dusun-dusunni, i Aroer ampa i dusun-dusunni pakon bani ganup huta na martopihon Bah Arnon tolu ratus tahun dokahni, mase ma lang irampas nasiam huta ai ijia?
27 Jadi seng marsalah ahu dompak ham, tapi ham do na mambahen na jahat dompak ahu, marhitei na mamorang ahu. Jahowa, Panguhum in, Ia do na manguhum halak Israel pakon halak Amon sadari on.
28 Tapi seng itangihon raja ni halak Amon hata, na tinonahkon ni si Jepta hu bani.
29 Dob ai sogop ma Tonduy ni Jahowa hubani si Jepta, gabe misir ma ia mamontas hun tanoh Gilead pakon tanoh Manase, dob ai hun Mispa na i Gilead, anjaha hun Mispa na i Gilead mardalan ma ia torus hu tanoh ni halak Amon.
30 Dob ai marbagah-bagah ma si Jepta hubani Jahowa, nini ma, “Anggo iondoskon Ham halak Amon hubagas tanganku,
31 jadi barang aha na luar parlobei hun labah ni rumahku manjumpahkon ahu, sanggah na mulak ahu horas-horas humbani halak Amon, maningon Jahowa ma simada ai, anjaha galangkononku ma ai gabe galangan situtungon.”
32 Dob ai mandipar ma si Jepta dompak halak Amon laho marporang dompak sidea, gabe iondoskon Jahowa ma sidea hu tanganni.
33 Jadi italuhon ma sidea marhitei hataluon na banggal tumang, hun Aroer nari das hu Minit dua puluh huta bueini anjaha das hu Abel Keramin, gabe tunduk ma halak Amon ai i lobei ni halak Israel.
34 Sanggah na mulak si Jepta hun Mispa hu rumahni, tonggor ma, luar ma boruni manjumpahkonsi mararbap anjaha manortor-nortor; sasada ai do boruni, sobali ai seng dong anakni dalahi atap naboru bani.
35 Dob ididah boruni ai, iparrigat ma bajuni, lanjar nini ma, “Aih borungku, ham do na mambahen madotei uhurhu anjaha ham do na mambahen maseda ahu; domma hubuha pamanganku marbagah-bagah hubani Jahowa, anjaha seng be tartarik ahu bagah-bagahkai.
36 Tapi nini ma hu bani, ʻBapa, anggo domma ibuha ham pamanganmu marbagah-bagah hubani Jahowa, bahen ham ma bangku romban hu bani na dob iluarhon ham, ai domma ibahen Jahowa bamu pambalason dompak munsuhmu, ai ma halak Amon.ʼ
37 Ambahni ai nini ma dompak bapani, ʻBalosi ham ma na hupindohon on; palopas ham ma ahu dua bulan dokahni, ase laho ahu mawat-awat hu dolog, manangisi haanakboruonku rap pakon hasoman-hasomanku.ʼ
38 Nini si Jepta ma mambalosi, ʻLaho ma ho!ʼ Ipalopas ma ia laho dua bulan dokahni. Jadi laho ma ia rap pakon hasoman-hasomanni manangisi haanakboruonni i atas dolog.”
39 Jadi dob salpu na dua bulan ai, mulak ma ia hubani bapani, anjaha ibahen bapani ma hubani romban hubani na dob binagahkonni ai, gabe seng ongga itanda naboru ai dalahi. Gabe adat ma ai bani halak Israel:
40 Ganup tahun laho ma boru ni halak Israel manangisi boru ni si Jepta, halak Gilead ai, ompat-ompat ari dokahni.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA