Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yefta reya parjurit se bangalan dhari Gileyad. Eppa’na anyama Gileyad tape ebuna sondel.
2 Eppa’na andhi’ ana’ lalake’ laenna katello dhari binena se teppa’. Saellana na’-kana’ jareya padha dibasa, laju padha nondhung Yefta dhari bengkona. Oca’na ka taretanna jareya, "Ba’na ta’ kera olle sangkol pa-apa dhari eppa’, sabab ba’na ana’na babine’ laen."
3 Daddi Yefta laju apesa dhari tan-taretanna pas ondur sarta enneng e dhaera Tob. E jadhiya badha reng-oreng jahat se pas agabung ban aba’na; Yefta ban reng-oreng jareya laju entar arampok.
4 Ta’ saapa abidda dhari jareya oreng Isra’il eserrang oreng Amon.
5 E baktona kadaddiyan jareya para pamimpinna Isra’il e Gileyad entar ngajak Yefta abaliya dhari dhaera Tob.
6 Oca’na, "Ngereng pimpinnagi oreng Isra’il e Gileyad aperrang sareng oreng Amon."
7 Saodda Yefta, "Sampeyan gu ta’ padha baji’ ka kaula, ta’ enggi? Bi’ sampeyan kaula etondhung dhari compo’na eppa’. Aponapa samangken e bakto sampeyan ngadhebbi kasossa’an, me’ pas padha entar ka kaula?"
8 Saodda reng-oreng jareya, "Kan melana abdina padha nyabis, polana terro nyo’ona tolong ka panjennengngan ngereng pimpinnagi oreng Gileyad aperranga sareng bangsa Amon samangken jugan."
9 Saodda Yefta, "Mon sampeyan ngajaga kaula abali ka Gileyad merrangana bangsa Amon, ban PANGERAN apareng kamennangan ka kaula, kaula se marenta’a sampeyan."
10 Saodda reng-oreng jareya, "Enggi, sae. PANGERAN saksena."
11 Daddi Yefta laju mangkat abareng ban para pamimpin Gileyad. Saellana jareya bi’ oreng Gileyad Yefta epadaddi pamimpinna ban epaneggu’ kakobasa’an e jadhiya. Ban e ajunanna PANGERAN neng e Mizpa, Yefta nyebbuttagi sabarang se daddi tuntutanna ka oreng Gileyad.
12 Saellana jareya Yefta ngotos oreng ka rato Amon epakon mator kantha reya, "Ponapa kasala’anna bangsa abdidalem me’ daddi eperrange sareng junandalem?"
13 Ratona bangsa Amon adhabu ka reng-oreng otosan jareya, "E bakto dhateng dhari Messer, ommat Isra’il ngala’ tanana tang bangsa, molae dhari Songay Arnon sampe’ ka Songay Yabok ban Songay Yordan. Sateya mara pabali tana jareya sacara pa’-teppa’."
14 Yefta laju ngotos reng-oreng pole ka rato Amon
15 epakon nyaot kantha reya, "Ommat Isra’il ta’ arampas tanana oreng Mo’ab otaba tanana oreng Amon.
16 E bakto mangkat dhari Messer, oreng Isra’il nojju ka Tellok Akaba lebat e sagara beddhi sampe’ e Kades.
17 Saamponna gapaneka oreng Isra’il ngerem otosan ka rato Edom nyo’on edi lebada e nagarana. Namong ta’ eedine. Sapaneka jugan ka rato Mo’ab, namong ta’ eedine jugan lebat e dhaerana. Daddi ommat Isra’il enneng e Kades.
18 Saamponna gapaneka laju nerrossagi parjalananna lebat e sagara beddhi, namong ta’ lebat e dhaera Edom sareng Mo’ab, se elebadi ngala’ jalan alengleng kantos napa’ ka temoranna Mo’ab, e bara’na Songay Arnon. Ommat Isra’il akemah e ka’dhissa’, namong ta’ alengka songay gapaneka, sabab dhaera gapaneka tamaso’ baba kakobasa’anna Mo’ab.
19 Saamponna gapaneka ommat Isra’il ngotos oreng ka Sihon, rato Amori e Hesybon nyo’on edi lebada e dhaerana Amori, entara ka nagarana dibi’.
20 Namong sareng Sihon ta’ eedine sabab ta’ eparcaja ja’ ommat Isra’il namong lebada malolo. La’-mala’ tantarana epakalowar sadaja laju amarkas e Yahas sarta pas nyerrang Isra’il.
21 Namong PANGERAN, Allahna Isra’il, apareng kamennangan ka ommat Isra’il kantos Sihon sareng tantarana kala sadaja. Daddi kalaban sapaneka ommat Isra’il ngaolle sadajana tanana oreng Amori se badha e nagara gapaneka.
22 Baba kakobasa’anna Amori ekobasae sareng Isra’il molae dhari Arnon e bagiyan lao’, kantos ka dhajana Songay Yabok, sareng dhari sagara beddhi e bagiyan temor, kantos ka Songay Yordan e bagiyan bara’.
23 Daddi PANGERAN, Allahna Isra’il, se ngojuk reng-oreng Amori kaangguy kaparlowannepon ommadda Pangeran.
24 Ban samangken ponapa sareng junandalem tana gapaneka epondhuda pole? Tana paparengnga Kamos, dibaepon junandalem ka’dhissa’, diggal paggun daddi kaagunganna junandalem. Namong sadajana tana se eparengngagi ka ommat Isra’il sareng PANGERAN, Allahna bangsa abdidalem, sareng bangsa Isra’il ta’ eocola.
25 Ponapa junandalem apangrasa asaeyan dhari Balak pottrana Zipor, rato Mo’ab? Balak ta’ oneng nangtang otabana merrange bangsa abdidalem.
26 Tello ratos taon abidda Isra’il ngobasane Hesybon sareng Aroër sareng sa-disa e sabingkerrepon, sareng sadajana kottha e penggirra Songay Arnon. Aponapa kantos samangken sareng junandalem me’ ta’ epondhut pole?
27 Bunten, bangsa abdidalem ta’ gadhuwan sala ka junandalem. Junandalem se sala sabab nyerrang bangsa abdidalem. PANGERAN se daddi hakim se are mangken motose parkarana oreng Isra’il sareng oreng Amon ka’dhinto."
28 Tape rato Amon ta’ parduli ka sen-pessenna Yefta jareya.
29 Saellana jareya Errohna PANGERAN ngobasane Yefta jareya. Yefta laju meyos ka dhaera Gileyad ban Manasye, sarta laju abali ka Mizpa e Gileyad. Dhari jadhiya terros ka baba kakobasa’anna Amon.
30 Yefta ajanji kantha reya ka PANGERAN, "Manabi sareng Junandalem abdidalem epamennang ka bangsa Amon,
31 sarengngan pole abdidalem salamet abali ka compo’, pasera’a saos se kalowar dha’-adha’ kadibi’ dhari dhalem compo’ abdidalem ngamba’a abdidalem, sareng abdidalem eatorragiya ka Junandalem menangka kurban obbaran."
32 Yefta laju alengka Songay Yordan merrangana oreng Amon, bi’ PANGERAN Yefta epamennang.
33 Yefta mokol mosona amba’ pate dhari Aroër sampe’ ka dhaera e sabingkerra Minit, kabbi bannya’na badha dhu polo kottha, ban sampe’ gan Abel-Keramim. Ce’ bannya’na oreng Amon se mate, daddi sampe’ kala ka oreng Isra’il.
34 E bakto Yefta abali ka Mizpa, pottra bine’na entar ngamba’ ramana jareya sambi atari ban nabbu terbang. Jareya pottrana se pera’ settong tadha’ pole.
35 E bakto Yefta ngoladi pottrana jareya panggaliyanna ce’ sossana sampe’ nyebbit rasoganna sambi adhabu, "Adhu, na’, ancor tang ate! Arapa ma’ ba’na se daddi lantaranna ancorra tang ate reya? Sengko’ la asompa ka PANGERAN, ban sengko’ ta’ ngenneng maburung tang sompa jareya!"
36 Kana’ bine’ jareya ngoca’ ka Yefta, "Sampeyan ampon asompa ka PANGERAN, ampon ngereng, lampa’agi. Sabab sareng PANGERAN sampeyan ampon eedine males kajahadanna oreng Amon, mosona sampeyan."
37 "Namong," ca’na kana’ jareya pole, "badha se eso’ona kaula. Kaula nyo’ona bakto dhu bulan, lan-jalanana e pagunongan asareng ca-kanca. E ka’issa’ kaula nangesa, sabab kaula mateya gi’ paraban."
38 Bi’ ramana eedine, pas eater se mangkada. Kana’ jareya abareng ban ca-kancana entar ka pagunongan; e jadhiya nanges polana aba’na mateya sabellunna alake ban sabellunna andhi’ ana’.
39 Saellana lebat dhu bulan, kana’ jareya abali ka ramana, dineng ramana laju ajalannagi apa se la ejanjiyagi ka Pangeran. Daddi kana’ bine’ jareya pas mate gi’ paraban. Jareya asal molana adad e kalanganna bangsa Isra’il
40 ban-paraban ajalanan pa’ are abidda sabban taon kaangguy ngenga’e pottrana Yefta e Gileyad.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA