Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 He, Israel, kammaminne kananNa Batara, "INakkemi ampa’jariko siagang amparekko, teako mallakki, mattantu Kupasalamakko! Le’ba’ mako Kukio’ situru’ arennu, iNakke ampatangko.
2 Punna nusombali je’neka, iNakke anrurungangko, tena nulatallang lalang ri sikamma kasukkarrannu. Punna allaloko ri pepeka, tena nulammutung, tena nalanabalaiko sikamma paccoba battalaka.
3 Saba’ iNakke Batara, Allata’alanu, Allata’ala matangkasa’na Israel, Mappasalama’nu. Kupassareangi Mesir a’jari pappasulu’nu, Sudan siagang Syeba a’jari sambennu.
4 Nia’ anggarannu ri matangKu, Kuanggarakko siagang Kukamaseangko; jari Kupassareangi rupataua a’jari sambennu, bansa-bansaya a’jari sambe nyawanu.
5 Teako mallakki, saba’ iNakke alla’langiko. Battu lau’ siagang battu raya Kusuroi ana’ cucunnu battu asse’re.
6 Kuparentakangi mae ri wara’ siagang ri timboro’, sollanna linta’ ke’nanga nilappassang. Lappassammi ana’-ana’ bura’nenu ammotere’ battu bella, siagang ana’-ana’ bainenu ammotere’ battu ri cappa’-cappa’na buttaya.
7 Saba’ nikio’ ngasemmi ke’nanga lalang arengKu, Kupa’jari ke’nanga untu’ ampakala’birikKa’."
8 Nakana Allata’ala, "Suroi maju mae ri dallekang bansaKu butaya, manna pole nania’ja matanna; ia tongoloka, manna pole nania’ja tolinna.
9 Suroi sikontu bansaya a’rappungang siagang sikontu sukua asse’re. Inai ri rewata-rewatana ke’nanga le’ba’ ampaui apa kajarianga kamma-kamma anne? Inai ri ke’nanga akkulle antappui apa labattua sallang? Lappassammi maju sikamma sa’bina ke’nanga, na napa’butti angkana tojengi ke’nanga, sollanna sikontu tau allangngerekai ke’nanga angkanai, annaba memangi ke’nanga!
10 He ummakKu, ikau ngasemmi sa’bi-sa’bingKu, ikau ngasemmi Kupile a’jari ata-atangKu, sollanna nuassengA’ siagang tappakko ri Nakke, na nupahang angkana iNakkemi Allata’ala. INakke Allata’ala Kaminang Se’re-se’rea, tena maraeng rioloangangKu siagang ri bokoangangKu.
11 INakke Kale-kalengKu Batara, pantaranganna iNakke tena appasalama’.
12 Le’ba’ mako Kupauang, angkana iNakke ampasalamakko, teai rewatana bansa maraeng niaka ri alla’nu; ikau ngasemmi a’jari sa’bi-sa’bingKu. Na iNakke, iNakke minne Allata’ala,
13 sa’genna satunggu-tungguna tuli iNakke Allata’ala. Taniakka akkulle ta’lapassa’ battu ri kakoasangKu, yareka akkulle anrompai rancanaKu."
14 Batara Mappasalama’nu, Batara Matangkasa’na Israel, Nakana, "Lanri ikau ngaseng, naKuakkiring tantara mange ri Babel, naKulappo sa’genna rumbang sikamma panjoli pakke’bu’na panjaraya; sa’ra orre’na tu Kasdim Kupinrai a’jari piraung.
15 INakkemi Batara, Allata’alanu matangkasaka, Karaennu, ampa’jariako, he Israel!"
16 Le’baki appare’ Batara se’re oloang a’limbang tamparang, allalo ri je’ne’ a’gamarrunga.
17 Nasuroi tantaraya siagang sikamma perwirana a’bundu’, na maju ke’nanga siagang kareta nirenreng ri jarang. Mingka tu’guruki ke’nanga, takkuleami ambangung poleang, matemi ke’nanga rapang sulo mateamo rinrana.
18 Nakana Batara, "Tena matu-matunna niu’rangi rewasa’ laloa, sia-siaji niitung apa le’baka.
19 Parhatikangi, nia’ apa beru Kugaukang; anne kamma appakkaramulami, tenaka nuciniki? LapparekKa’ oloang ri parang lompoa, siagang binanga-binanga ri parang luaraka.
20 Lanapakala’birikKa’ olo’-olo’ liaraka; lamammuji ri Nakke serigalaya siagang jangang-jangang untaya lanri Kupasolongi je’neka ri parang lompoa, siagang binanga-binangaya ri parang luaraka untu’ assarei je’ne’ ummakKu Kupilea.
21 Iami ke’nanga bansa Kupareka untu’ KalengKu, sollanna akkulle nakabarrang pammujia untu’ iNakke."
22 Nakana Batara, "Mingka ikau Israel, tena nunynyomba ri Nakke, tenamo nugaukangi ibadaya mae ri Nakke.
23 Tena nungngerang gimbala’ untu’ koro’bang nitununu, tena nupakalompoA’ siagang passarenu. Nampa tenaja Kubattalliko siagang koro’bang, yareka Kususaiko lanri annuntuKa’ kamanynyang.
24 Tena nummalli dupa mabau’ untu’ iNakke, tena nupassukkuki pa’maikKu siagang janna koro’bang nupolonga. Kabalekanna iNakke ba’lalo nubattalli siagang dosa-dosanu, nususaiA’ siagang sikamma kasalannu.
25 Mingka iNakke Allata’ala allu’luki dosanu, Kupammopporangko lanri kammaminjo sipakKu; tena natuli Kuu’rangi dosanu.
26 Piu’rangiangA’, umba kimange ri pangadelang, pamajumi parkaranu sollanna a’nassa angkanaya annabako.
27 Dorakami boe-boenu riolo dudua, sikamma pamimpinnu angngewai ri Nakke,
28 imang-imannu narantassi ballakKu. Jari Kupassareammi nihina Israel, Kubalang parekangi turunganna Yakub nitumpasa’."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA