Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Isra’il, areya’ dhabuna PANGERAN, "Sengko’ se nyepta’agi ban agabay ba’na, ja’ tako’, bi’ Sengko’ ba’na masthe epasalamet! Sengko’ la ngolok nyamana ba’na, ba’na reya Tang andhi’.
2 Mon ba’na lebat e aeng otaba songay, bi’ Sengko’ ebarengngana, ba’na ta’ kera tasellem e dhalem kasossa’anna. Mon ba’na lebat e apoy, ta’ kera ekello’, ta’ kera calaka’ polana coba se ra’-berra’.
3 Sabab Sengko’ reya PANGERAN, Allahna ba’na, Allahna Isra’il se socce, se masalamet ba’na. Messer bi’ Sengko’ ebagi menangka panebbussa ba’na, Sudan ban Syeba menangka gantena ba’na.
4 Ba’na reya aji e Tang mata, Sengko’ ngargai ban taresna ka ba’na; daddi bi’ Sengko’ manossa ebagi menangka gantena ba’na, sa-bangsa menangka gantena nyabana ba’na.
5 Ella, ta’ osa tako’, sabab ba’na ejaga bi’ Sengko’. Dhari bara’ ban dhari temor Sengko’ nyoro na’ potona ba’na akompol.
6 Sengko’ marenta ka dhaja ban ka lao’ sopaja na’ potona ba’na jareya duli eocol. Sopaja ana’na ba’na se lalake’ ban babine’ padha abali dhari co’-konco’na bume.
7 Sabab kalaban Tang nyama reng-oreng jareya kabbi la eolok, bi’ Sengko’ ecepta’agi kaangguy ngagungngagi Sengko’."
8 Dhabuna Pangeran, "Soro maju dha’ enna’ Tang bangsa se buta, maske andhi’ mata; se kopok, maske badha kopengnga.
9 Soro sakabbinna bangsa akompol ban sakabbinna suku apolong. Sapa e antarana ba-dibana reng-oreng jareya se abala sabellunna apa se kadaddiyan sateya reya? Sapa e antarana se bisa aramallagi are pagi’? Se-saksena kabbi soro nyander, me’ olle abukteyagi ja’ aba’na bendher, sopaja kabbi se ngedhing padha ngoca’ ja’ pajat kantha jareya!
10 He Tang ommat, ba’na Tang sakse kabbi, bi’ Sengko’ ba’na epele epadaddi Tang abdi, sopaja padha tao ban parcaja ka Sengko’, ban ngarte ja’ Sengko’ reya Allah. Sengko’ Allah Se Settong, tadha’ laenna sabellunna ban saellana Sengko’.
11 Sengko’ dibi’ PANGERAN, laenna Sengko’ tadha’ se masalamet manossa.
12 Sengko’ la malae ka ba’na, ja’ Sengko’ panyalamedda ba’na, ban banne dibana nagara manca se badha e antarana ba’na; ba’na kabbi Tang sakse. Ban Sengko’, Sengko’ reya Allah,
13 salanjangnga Sengko’ teptep Allah. Tadha’ se bisa lopot dhari Tang kobasa, otabana se lang-ngalange Tang rancana."
14 PANGERAN Panyalamedda ba’na, Allahna Isra’il Se Socce, adhabu kantha reya, "Kaangguy ba’na, Sengko’ ngerem tantara ka Babil, ban marosak lang-palangnga labangnga penjarana kabbi, soragga oreng Kasdim bi’ Sengko’ eoba epadaddi tanges.
15 Sengko’ PANGERAN, Allahna ba’na se socce, Ratona ba’na, se nyepta’agi ba’na, Isra’il!"
16 PANGERAN se abadhi jalan e tase’, lebat aeng se omba’na raja.
17 Tantara ban ra-parwirana epakon aperrang, kabbi padha maju nompa’ kareta se etarek jaran. Tape reng-oreng jareya labu, ta’ bisa jaga pole, kabbi padha ban sombu se mate.
18 Dhabuna PANGERAN, "Tadha’ gunana ngenga’e jaman lamba’, parcoma mekkere se la tadha’.
19 Abassagi patete, Sengko’ agabay barang se anyar, sateya la emolae, apa ba’na ta’ nangale? Sengko’ agabaya lorong e ra-ara, e jadhiya epabadha’a songayya.
20 Burun alas bakal amolja’agiya Sengko’; pate’ alas ban mano’ onta bakal mojiya Sengko’ sabab Sengko’ magili songay e sagara beddhi sopaja Tang ommat peleyan nemmowa aeng se eenoma.
21 Jareya reng-oreng se ekagabay Sengko’ kaangguy Sengko’ dibi’, sopaja padha bisa aberta’agi pojiyan kaangguy Sengko’."
22 Dhabuna PANGERAN, "Tape ba’na, Isra’il, ta’ nyemba ka Sengko’, ban ta’ abakte pole ka Sengko’.
23 Ba’na ta’ ngeba dumba kaangguy kurban obbaran ka Sengko’, ta’ ngormat Sengko’ kalaban tor-ator. Mangkana Sengko’ ta’ maberra’ ba’na ban kurban otaba masossa ba’na kalaban maksa ba’na ngeba mennyan.
24 Ba’na ta’ melleyagi Sengko’ dupa se ro’om, ta’ masenneng Sengko’ kalaban gajina kurban sambelliyan. Sabaligga ba’na maberra’ Sengko’ bi’ sa-dusana ba’na, masossa Sengko’ bi’ kasala’an-kasala’anna.
25 Tape Sengko’ Allah se matadha’ sa-dusana ba’na, Sengko’ nyapora ba’na polana jareya Tang sepat; Sengko’ ta’ nga’-ngenga’e dusana ba’na.
26 Paenga’agi Sengko’, mara padha ka pangadilan, mara aparkara, me’ olle etemmo ja’ ba’na bendher.
27 Bangatowana ba’na se dha’-adha’na la dusa, para pamimpinna ba’na aberonta’ ka Sengko’,
28 mam-imamma ba’na macemmer Tang Bengko. Daddi Isra’il bi’ Sengko’ epassra’agi me’ olle eya-seya, toronanna Yakub bi’ Sengko’ edina epatompes sakabbinna."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA