Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kata TUHAN seh man bangku nina,
2 "O manusia si ermasap-masap, sumpahilah Gog, raja si mbelin i negeri Mesek ras Tubal i taneh Magog.
3 Kataken man bana maka Aku, TUHAN si Erdolat, Aku kap musuhna.
4 Kukusurken me ia, Kukawit isangna, jenari Kurintak ia lawes ras kerina tenterana. Lanai kal langlang teremna tentera kudana si erpaken seragam, janah kerina tenterana e maba ampang-ampang dingen erpedang.
5 Si jadi teman raja eme kalak Persia, Sudan ras Libia, janah kerina ia make ampang-ampang ras topi waja.
6 Kerina dilaki si ngasup erperang i negeri Gomer ras Bet Togarma nari i utara, kerina teman raja, bage pe mbue bangsa-bangsa si debanna.
7 Suruhlah ia ersikap-sikap, janah perentahken kerina tenterana maka sikap ndalanken perentahna.
8 Piga-piga tahun nari Kuperentahken me ia nerang sada negeri si pendudukna nggo ibaba mulih i bas piga-piga negeri nari, janah nggo ringan i bas negeri e alu la lit kebiarenna. Iserang Gog me deleng-deleng Israel, si nggo terulang bage dekahna, tapi genduari sangana iiani rayat si nggeluh alu teneng.
9 Ia ras tenterana rikut ras nterem bangsa si jadi temanna lawes me nerang negeri e desken angin kaba-kaba rikut ras udan, emaka itamburina me negeri e bagi embun."
10 Enda me si ikataken TUHAN si Erdolat kempak Gog, "Adi nggo seh paksana, mulai me kam rukur kerna sura-sura si jahat.
11 Itetapkenndu me nerang sada negeri si la ergegeh i ja pendudukna nggeluh alu dame ras teneng i bas kuta si la ertembok, si la lit pertahanenna.
12 Irampok ras irampasindu me penduduk si ringan i bas kota-kota si nai pernah runtuh. Pendudukna si nai ipepulung i bas erbage-bage negeri nari genduari nggo melala ertana ras asuh-asuhenna, janah ia ringan i bas pusat doni enda.
13 Kalak Syeba ras Dedan bage pe saudagar-saudagar i bas kuta-kuta Sepanyol nari isungkunna kam nina, 'Atendu kin ngerampas ras ngerampok emas, pirak, asuh-asuhen, ras erta-erta si debanna, dingen ngangkatsa kerina, maka ipepulungndu tenterandu?'"
14 Dage TUHAN si Erdolat nuruh aku, gelah kupeseh man Gog kata enda, "Tupung bangsangKu Israel sangana nggeluh alu teneng, tupung si eme kam lawes nerangsa.
15 Kam berkat i bas inganndu nari, ndauh i utara, minpin tentera si nterem dingen megegeh, kerina tentera si erkuda i bas erbage-bage bangsa nari.
16 Emaka iserangndu me bangsangKu Israel, desken angin kaba-kaba nderpa taneh. Kenca nggo seh paksana, Kusuruh kam nerang tanehKu lako encidahken man bangsa-bangsa ise kin Aku si tuhuna, encidahken kebadianKu alu perkara si Kulakoken arah kam.
17 Ma kerna kam kin si Kukataken nai arah suruh-suruhenKu nabi-nabi Israel? Nabi-nabi e nggo ernubuat nai maka i bas paksa si reh Kusuruh me sekalak si nerang Israel." Bagenda me nina TUHAN si Erdolat.
18 Nina TUHAN si Erdolat, "Tapi i bas warina Gog nerang Israel, ngamuk me Aku.
19 I bas pernembeh ateKu si gara, Kukataken maka i bas wari e lit me linur si mehantu i Israel.
20 Kerina nurung ras perik-perik, kerina rubia-rubia si kitik bage pe si galang, kerina manusia i babo doni enda, nggirgir perban biarna ngenehen Aku. Deleng-deleng meruntuh, lingling meruhruh, janah kasa kai tembok mbulak kerina.
21 Alu erbage-bage cilaka Kubahan maka Gog jadi gentar. Aku, TUHAN si Erdolat nggo melasken katangKu. Anak buahna sitakilen sapih-sapih ia alu pedangna.
22 Kuukum ia alu penakit ras dareh mambur. Udan si meder ras baho, rikut ras api ras kertah, icurcurken i das nari kempak ia ras tenterana bage pe kempak bangsa-bangsa si nterem si jadi temanna.
23 Alu dalan si enda ateKu encidahkenca man bangsa-bangsa maka Aku si erkuasa ras si badia. Kenca bage ieteh bangsa-bangsa maka Aku kap TUHAN."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA