Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ho ale anak ni jolma, manjahai ma ho pasal dolog ni Israel, anjaha hatahon ma, “Ale dolog ni Israel, tangihon ma hata ni Jahowa!
2 Sonon do hata ni Tuhan Jahowa: Halani na dob ihatahon munsuh pasal hanima: Ha, ha, ha! Buntu-buntu sisadokah ni dokahni ai, domma gabe parbagiananta!
3 Halani ai, manjahai ma ho, hatahon ma: Sonon do hata ni Tuhan Jahowa: Halani tongon, halani na dob pinarseda ni sidea ai hanima, iparreong inggot, anjaha gabe parbagianan ni bangsa-bangsa na tading ai hanima, anjaha gabe sisahap-sahapkononkon ampa sirisa-risaon ni halak hanima,
4 halani ai, ale dolog ni Israel, tangar ma hata ni Tuhan Jahowa: Sonon do hata ni Tuhan Jahowa bani sagala dolog ampa buntu-buntu, bani lombang-lombang ampa habungan, bani na mareong ampa huta-huta na dob tinadingkon, na dob gabe taban ampa sirisa-risaon bani bangsa-bangsa inggot,
5 halani ai sonon do hata ni Tuhan Jahowa: Tongon, marhitei gajag ni simburung-Ku do marsahap Ahu dompak bangsa parbegu na tading ai ampa dompak Edom haganup, na mambuat tanoh-Ku gabe parbagianan ni sidea, ibagas gok malas ni uhur ampa risa-risa, laho parsedahon ampa manrampasi ai,
6 halani ai, manjahai ma ho pasal tanoh Israel, anjaha hatahon ma bani sagala dolog ampa buntu-buntu, bani lombang-lombang ampa habungan: Sonon do hata ni Tuhan Jahowa: Tonggor ma, marsahap do Ahu ibagas simburung-Ku ampa ibagas ringis-Ku, halani na dob manaron ai hanima binahen ni dorun-dorun ni sipajuh begu-begu.
7 Halani ai sonon do hata ni Tuhan Jahowa: Hupagostong do tangan-Ku laho marbija, paboa bangsa-bangsa na inggot bannima ai maningon tarononni do dorun-dorun.
8 Tapi anggo hanima, ale dolog ni Israel, mangulaki do mardangkahi anjaha marbuahi bani bangsang-Ku Israel, ai podas ma sidea mulak hu tanohni.
9 Tongon, parayakon-Ku anjaha dompakkonon-Ku do hanima, horjahononkon anjaha tidahan do use hanima.
10 Anjaha pabueion-Ku do jolma i atasnima, ai ma ginompar ni Israel haganup; ianonkon do use huta-huta, anjaha padearon ma na mangkareong.
11 Pabueion-Ku do i atasnima jolma pakon pinahan, martambah-tambah anjaha manggompari do sidea; marisi do hanima bahenon-Ku songon bani panorangnima sapari; bahenon-Ku do bannima na madear lobih humbani sapari; jadi botohonnima ma, Ahu do Jahowa.
12 Bahenon-Ku do mardalani jolma i atasnima, ai ma bangsang-Ku Israel; sidea do manean ho, gabe parbagianan ni sidea do ho, anjaha seng be magouan anak sidea bahenonmu.
13 Sonon do hata ni Tuhan Jahowa: Halani ihatahon halak bam: Sipangan jolma do ho, anjaha ibahen ho do popor bangsamu,
14 halani ai, lang be sipangan jolma ho, anjaha lang be popor bahenonmu bangsamu, nini Tuhan Jahowa.
15 Lang be palopason-Ku ho manangar apas-apas ni bangsa-bangsa, anjaha seng be tarononmu risa-risa ni bangsa parbegu, anjaha seng be popor bahenonmu bangsamu, nini Tuhan Jahowa.
16 Dob ai roh ma hata ni Jahowa hu bangku, mangkatahon,
17 Ale anak ni jolma, sanggah marianan ope ginompar ni Israel i tanoh ni sidea, ipabutak sidea do ai marhitei parlahou ampa pambahenan ni sidea; parlahou ni sidea i lobei-Hu, ai ma songon habutakon ni naboru sanggah parroh ni pantang ni hiouni.
18 Jadi Huuseihon ma ringis-Ku hubani sidea halani daroh na niduruskon ni sidea i tanoh in, anjaha ibutaki sidea ai marhitei gana-gana ni sidea.
19 Huerap do sidea hu tongah-tongah ni bangsa-bangsa, gabe mampar do sidea i nagori-nagori ai; romban hubani parlahou ni sidea ampa pambahenanni do sidea Huuhumi.
20 Jadi das ma sidea hu tongah-tongah ni bangsa-bangsa; tapi huja pe sidea das ipabutak sidea do ijai goran-Ku na pansing in marhitei na hinatahon ni halak pasal sidea: On ma bangsa ni Jahowa ia, hape maningon buhar do sidea hun tanohni!
21 Tapi marulak-ulakan do uhur-Hu halani Goranku na pansing in, na pinabutak ni ginompar ni Israel i tongah-tongah ni bangsa-bangsa hadasan ni sidea ai.
22 Halani ai hatahon ma bani ginompar ni Israel: Sonon do hata ni Tuhan Jahowa. Sedo halani hanima, ale ginompar ni Israel, ase sonai hubahen, tapi halani goran-Ku na pansing in do, na pinabutaknima in i tongah-tongah ni bangsa-bangsa hadasannima ai.
23 Anjaha papansingon-Ku do goran-Ku na timbul in, na dob pinabutak in i tongah-tongah ni bangsa-bangsa anjaha na dob pinabutaknima i tongah-tongah ni sidea; jadi tandaon ni bangsa-bangsa ma, Ahu do Jahowa, nini Tuhan Jahowa, anggo Hupatalar ma hapansingon-Ku i lobei ni sidea marhitei hanima.
24 Ai padaratonku do hanima hun tongah-tongah ni bangsa-bangsa, patumpuonku do hanima humbani ganup nagori-nagori, anjaha boanon-Ku do hanima mulak hu tanohnima.
25 Anjaha uraskonon-Ku do bannima bah na lihou ase borsih hanima, urason-Ku do hanima humbani ganup habutakonnima ampa humbani gana-gananima.
26 Berehonon-Ku do bannima uhur na bayu, anjaha tonduy na bayu do nahkonon hubagas dirinima; buaton-Ku do uhur batu humbagas angkulanima, anjaha uhur na marpangahapan do berehonon-Ku bannima.
27 Tonduy-Hu do nahkonon-Ku hubagas dirinima, anjaha bahenon-Ku do ase marparlahou hanima ibagas titah-Ku, anjaha bujur idalankon hanima aturan-Ku.
28 Jadi marianan ma hanima bani tanoh na dob Huberehon hubani ompungnima; gabe bangsang-Ku ma hanima, anjaha Ahu gabe Naibatanima.
29 Paluahonku do hanima humbani sagala habutakonnima; marsahap pe Ahu bani gandum anjaha hubahen pe ai marganda-ganda, anjaha lohei seng sogop bannima.
30 Pabueion-Ku do buah ni sagala hayu ampa gogoh ni tanoh in, ase ulang be mahiri hanima ibahen bangsa-bangsa parbegu halani loheian hanima.
31 Jadi taringat ma hanima bani parlahounima na jahat in ampa bani pambahenannima na so madear in; gabe magigi ma hanima bani dirinima, halani hajahaton ampa pambahenan hasamboronnima in.
32 Sedo halani hanima ase sonai hubahen, nini Tuhan Jahowa; sai ibotoh hanima ma in! Maila anjaha mubah ma bohinima halani pambahenannima in, ale ginompar ni Israel!
33 Sonon do hata ni Tuhan Jahowa: Bani ari ai, sanggah na huuras hanima humbani sagala hajahatonnima, marisi ma use bahenon-Ku sagala huta, anjaha ipauli use sagala na mareong.
34 Horjaonkon do use tanoh na dob tarulang ai, na dob halong na sain dokah ipaidah-idah pamontas.
35 Jadi hatahonon ni halak ma: Tanoh on, na halong hinan, gabe songon pohon Eden do sonari; anjaha huta-huta in, na dob maseda, tarulang anjaha mareong, marisi do sonari anjaha ipatoguh.
36 Jadi tandaon ni bangsa-bangsa, na tading in, na inggot bannima in ma, paboa Ahu do Jahowa, na paulihon use sagala na mareong, anjaha na manuani use sagala na dob halong. Ahu do Jahowa na manluarhon ai, anjaha pasaudon-Ku do ai.
37 Sonon do hata ni Tuhan Jahowa: Pasal on pe ra do Ahu sungkunon ni ginompar ni Israel, ase Hubahen bani sidea, ai ma pabueihon jolma bani sidea songon hulanan ni biribiri.
38 Songon buei ni biribiri sigalangonkon, songon buei ni biribiri i Jerusalem sanggah pesta, sonai ma marisi bani hulanan ni jolma huta-huta na dob maseda in. Jadi tandaon ni sidea ma, Ahu do Jahowa.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA