Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN adhabu ka sengko’, "He, manossa se ta’ langgeng, mara acaca ka nong-gunong Isra’il, soro nong-gunong jareya ngedhingngagi pessenna Sengko’, Pangeran Se Mahatenggi,
2 ‘E bakto sa-bangsa e sabingkerra ba’na nyerrang ban arampok ba’na, sa-bangsa jareya la ya-nyeya saantero Isra’il. Sa-bangsa jareya kaperagan ngoca’ ja’ sateya mo’-gumo’ jaman lamba’ rowa la daddi andhi’na. Daddi, he, nong-gunong ban mo’-gumo’, ngay-songay ban ra-cora, he tha-kottha se la daddi jur-gujuran, se la eonduri ta’ ekennengnge oreng sarta erampok ban ebi-cebbi bi’ sa-bangsa e sakalenglengnga, mara edhingngagi apa se ekoca’agi GUSTE Allah Se Mahatenggi ka ba’na: E bakto peggella Tang ate ta’ ekenneng ampet pole, Sengko’ ca’-ngoca’e sa-bangsa e sakalenglengnga ba’na, bi-lebbi Edom, sabab sa-bangsa jareya kalaban ate perak ban pannengnga se ya-nyeya la arebbu’ Tang tana ban arampas Tang lon-talon. Sateya Sengko’ peggel ban ngamok polana sa-bangsa jareya ya-nyeya ban ngababa’agi ba’na ce’ talebadda.
3 (36:2)
4 (36:2)
5 (36:2)
6 (36:2)
7 Sengko’, GUSTE Allah Se Mahatenggi asompa ja’ sa-bangsa e sabingkerra ba’na jareya bakal eya’-seya’a keya.
8 Tape ka ba’na Sengko’ ngoca’a, he, nong-gunong Isra’il, ka’-bungka’anna ba’na bakal nyelbi’a ban abuwa’a pole kaangguy kaparlowanna Tang ommat Isra’il se la para’ moleya.
9 Sengko’ nolongana ba’na, he, Isra’il, ban Sengko’ amastheyagiya ja’ tanana ba’na bakal elandhu’a pole ban etaburana ne-bine.
10 Bannya’na Tang ommat Isra’il bi’ Sengko’ etamba’ana. Isra’il bakal ngennengngana tha-kottha ban maddegga pole jur-gujuranna kabbi.
11 Pandhudhu’ ban ebinna ba’na bi’ Sengko’ epatamba’a sampe’ ce’ bannya’na, abannya’an dhari asalla; kabbi bakal bannya’a na’ potona. Ommat Isra’il bakal odhi’a e jadhiya akantha asalla, ban bi’ Sengko’ epama’mora, akantha se gi’ ta’ tao rassana ealame ba’na. Daddi reng-oreng jareya tao ja’ Sengko’ reya PANGERAN.
12 Tang ommat Isra’il bi’ Sengko’ egiba’a mole epangennengngana nagarana pole. Tana jareya bakal ekaandhi’a Isra’il dibi’ ban bakal ros-terrosana aberri’ hasel sampe’ na’ potona ta’ kera tao kalaparan pole.
13 Sengko’ GUSTE Allah Se Mahatenggi, ngoca’: Pajat bendher tana reya ejulugi se ngakanan oreng ban se arampasan na’-ana’na bangsa se enneng e jadhiya.
14 Tape molae sateya tana reya ta’ ngakana manossa pole ban ta’ arampasa na’-ana’na bangsa jareya pole. Sengko’ GUSTE Allah Se Mahatenggi la ngoca’.
15 Ta’ parlo pole tana reya ngedhing ebi-cebbi bi’ bangsa laen otabana eya-seya oreng. Tana reya ta’ kera matompes bangsa se ngennengnge e jadhiya pole. Sengko’, GUSTE Allah Se Mahatenggi la ngoca’.’"
16 PANGERAN adhabu ka sengko’,
17 "He, manossa se ta’ langgeng, e bakto reng-oreng Isra’il enneng e nagarana dibi’, reng-oreng jareya macemmer nagarana bi’ lalakonna sarta tengkana. Tengka jareya bi’ Sengko’ eanggep haram, akantha babine’ se teppa’na dhateng kotorra.
18 Peggella Tang ate bi’ Sengko’ eteba’agi kabbi ka bangsa jareya polana bangsa jareya bannya’ mate’e oreng e tana jareya ban manajjis tana jareya bi’ la-brahalana.
19 Bangsa jareya bi’ Sengko’ eokom sabandhing ban tengkana sarta carana odhi’na, saellana jareya bi’ Sengko’ pas epabalessadan e ra-nagara manca.
20 Entara dha’ emma’a bai bangsa jareya macemmer Tang nyama malolo. Sabab reng-oreng ngoca’ kantha reya, ‘Bangsa reya ommadda Allah, tape kodu ondur dhari tana se bi’ Allah eparengngagi ka aba’na.’
21 Sengko’ sossa polana Tang nyama se socce epacemmer bi’ reng-oreng Isra’il e dhimma’a bai se eentare bi’ bangsa jareya.
22 Daddi panapa’agi apa se ekoca’agi Sengko’, GUSTE Allah Se Mahatenggi ka bangsa Isra’il jareya, ‘Apa se elakonana Sengko’ dhaggi’ banne polana ba’na, Isra’il, tape polana Tang nyama se socce, se bi’ ba’na epacemmer e dhimma’a bai se eentare ba’na.
23 Sengko’ noduwagiya kasocceyanna Tang nyama se agung jareya, nyama se epacemmer ba’na e antarana sa-bangsa, me’ olle reng-oreng jareya tao ja’ Sengko’ PANGERAN. Sengko’, GUSTE Allah Se Mahatenggi la ngoca’. Bi’ Sengko’ ba’na eangguya noduwagi ka sa-bangsa ja’ Sengko’ reya socce, Pangeran Se Settong.
24 Dhari saneyap bangsa ban nagara, bi’ Sengko’ ba’na epakompola ban epamoleya ka tanana dibi’.
25 Saellana jareya bi’ Sengko’ ba’na eketessana aeng se jenneng, me’ olle ba’na berse dhari sakabbinna brahalana ban dhari sabarang se macemmer ba’na.
26 Daddi bi’ Sengko’ ba’na eberri’ana ate se anyar ban pekkeran se anyar. Atena ba’na se galina akantha bato jareya bi’ Sengko’ eganteyana ate se ta’at.
27 Atena ba’na bi’ Sengko’ eesseyana Tang Erroh, dineng ba’na bi’ Sengko’ ejaga’a sopaja odhi’ noro’ Tang kom-hokom sarta ta’at ka sakabbinna Tang parenta.
28 Daddi ba’na bakal ennengnga e tana se bi’ Sengko’ la ebagi ka bangatowana ba’na. Ba’na daddiya Tang ommat, ban Sengko’ daddiya Allahna ba’na.
29 Bi’ Sengko’ ba’na epabebasa dhari sakabbinna kacemmerranna. Sengko’ marenta’a ka gandum sopaja tombu landhu me’ olle ba’na ta’ tao ekenneng kalaparan pole.
30 Bungkana wa’-buwa’anna ba’na bi’ Sengko’ epasajana landhu, bariya keya hasella gal-teggalla, me’ olle ba’na ta’ tao ngalame laep se majuba’ nyamana ba’na e antarana sa-bangsa.
31 Ba’na bakal enga’a ka tengkana ba’na se jahat ban kalakowanna se ta’ pantes rowa, ban ba’na bakal ngalennyerra ka aba’na dibi’ polana sa-dusana ban kajahadanna rowa.
32 Kaenga’e, Isra’il, ja’ Sengko’ ajalannagi jareya kabbi banne polana ba’na. Ba’na kodu arassa todhus ban apes polana tengkana ba’na jareya. Sengko’ GUSTE Allah Se Mahatenggi la ngoca’.’"
33 GUSTE Allah Se Mahatenggi adhabu, "Saellana bi’ Sengko’ ba’na epaberse dhari sa-dusana, bi’ Sengko’ ba’na eedinana enneng e tha-kotthana ba’na pole, ban maddek jur-gujuranna.
34 Lamba’ reng-oreng se ajalan lebat e lon-talonna ba’na nangale’e saapa kajalla tana jareya, tape bi’ Sengko’ tana jareya epakennenge garap pole.
35 Daddi oreng tanto pas heran, sabab tana se dha’-adha’na kajal jareya sateya aoba daddi Kebbun Eden, ban tha-kottha se lamba’na seppe, ancor ban daddi jur-gujuran, sateya daddi tha-kottha se koko partahananna ban bannya’ pandhudhu’na.
36 Daddi sa-bangsa tatangga se gi’ badha bakal taowa ja’ Sengko’ reya PANGERAN, se maddek pole tha-kottha se la ancor, ban agarap pole gal-teggal se kajal. Sengko’, PANGERAN, la ngoca’, ban masthe ajalannagi jareya."
37 GUSTE Allah Se Mahatenggi adhabu, "He, bangsa Isra’il, bi’ Sengko’ ba’na eedine pole menta tolong ka Sengko’; Sengko’ namba’ana bannya’na ba’na epakantha’a ambalanna dumba.
38 Tha-kottha se sateya reya ancor, pagi’ bakal possa’a orengnga akantha Yerusalim e re-are raja e jaman lamba’, possa’ ban ba-dumba se ekagabay tor-ator. Daddi ba’na tao ja’ Sengko’ reya PANGERAN."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA