Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pasiah-tahunkon, ari sapuluh bulan sapuluh, roh ma hata ni Jahowa hu bangku, mangkatahon,
2 “Ale anak ni jolma, suratkon ma goran ni ari on, ari sisadari on, ai sadari on ma ihubu raja Babel huta Jerusalem.
3 Marlimbaga ma ho bani bangsa sipanlawan on, hatahon ma bani sidea, ʻSonon do hata ni Tuhan Jahowa: Hodohon ma hudon in, tampeihon ma hu atas, anjaha bahen bah hubagas!
4 Nahkon ma hubagas gulei na dob tinoktokan in, haganup na madear ni in, tulan pudi ampa tulan tangan, goki ma in bani holi-holi pilihan.
5 Buat ma sada biribiri pilihan, pagara ma soban i toruhni; lompah ma toktokni in, sonai homa holi-holi na ibagas hudon in.ʼ
6 Halani ai sonon do hata ni Tuhan Jahowa, ʻMagou ma huta na gok daroh in, ai ma na usih bani hudon ma martasik, na so mandarat tasikni hum bagas. Buat ma hum bagas toktokni ai sada-sada, ulang pala papilih-pilih.
7 Ai i tongah-tongahni ope daroh na niduruskonni ai; bani dolog batu do ai iduruskon, seng bani tanoh iduruskon ai, ase boi rungkubon ai bani tanoh.
8 Ase puho ringis-Ku, ase boi mambalas Ahu, Hupaturut do durus daroh ai bani dolog batu, ase ulang boi irungkub ai.ʼ
9 Halani ai sonon do hata ni Tuhan Jahowa: Magou ma huta na gok daroh in! Ahu pe pajunjunon-Ku ma soban panutungini.
10 Tambahi soban in, pagara apuy, lompah-lompah gulei in, useihon kuahni, anjaha paturut ma monsong holi-holini.
11 Nahkon ma hudon ai lumei hu atas ni narnarni, ase milas ai, gerger tombagani, gabe malala kotoranni na ibagas ai, anjaha magou tasikni ai.
12 Hape, seng ra tanggal tasikni na hapal ai age ibagas apuy.
13 Halani habutakonmu marhitei parriah-riahon, anjaha seng ra ho borsih age pe Hupaborsih ho, halani ai seng anjai borsih be ho paima sombuh ringis-Ku dompak ho.
14 Ahu do Jahowa na manluarhon ai, sai saud do ai, sai bahenon-Ku do ai; seng surut Ahu, seng maralang-alang Ahu, seng manosal Ahu; domu hubani parlahoumu ampa pambahenanmu uhumon-Ku ho,” nini Tuhan Jahowa.
15 Dob ai roh ma hata ni Jahowa, hu bangku, mangkatahon,
16 “Ale anak ni jolma, tonggor ma, buaton-Ku ma sompong humbam hinarosuhkon ni matamu; tapi seng bulih ho doruh-doruh, mandoraki atap mariluh-iluh matamu.
17 Boi do marhoih, tapi ulang gogoh-gogoh, ulang bahen na manangisi na matei ai! Martudung ma ho dear, anjaha marsipatu, ulang rungkub gumismu, anjaha ulang pangan ruti pusok ni uhur!”
18 Jadi marsahap ma ahu sogod hubani na mabuei ai, anjaha bodarini matei ma parinangonku, anjaha patarni ai hubahen ma songon na hinatahon hu bangku.
19 Jadi nini na mabuei ai ma hu bangku, “Ai seng ra ho patugahkon bennami, aha do arti ni on bennami, ase sonin ibahen ho?”
20 Jadi ningku ma hubani sidea, “Jahowa do mangkatahon hu bangku sonon”
21 Hatahon ma hubani ginompar ni Israel: Sonon do hata ni Tuhan Jahowa: Tonggor ma, palopason-Ku do butakan ianan-Ku na pansing in, ai ma na nienjeng-enjengkonnima in, na hinarosuhkon ni matanima ampa na hinasiholhon ni uhurnima; anjaha anak ampa borunima, na tinadingkonnima ijai, maningon rasei do bahenon ni podang.
22 Bahenonnima ma songon na Hubahen in: seng tutuponnima gumisnima anjaha seng panganonnima ruti pusok ni uhur.
23 Tapi martudung ma hanima dear anjaha marsipatu; seng doruh-doruh atap mandoraki, tapi mandatei ma hanima halani hajahatonnima, anjaha morong-orong i lobei ni hasomanni bei.
24 Sonai ma si Hesekiel gabe tanda bannima, ase ibahen hanima songon na binahenni ai. Anggo masa ma ai, gabe botohonnima ma, Ahu do Tuhan Jahowa.
25 Ho ale anak ni jolma, bani ari ai, anggo Hubuat ma humbani sidea benteng ni sidea ampa na hinasiholan ni uhur ni sidea ai, sonai homa anak ampa boru ni sidea,
26 tongon, bani ari ai ma roh sahalak na maporus marayak ho, laho pabotohkon barita ai hubam.
27 Bani ari ai, bani parroh ni halak na maporus ai, boi ma marsahap anjaha seng be longah ho. Sonin ma gabe tanda ho bani sidea, anjaha botohon ni sidea ma, Ahu do Jahowa.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA