Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E tanggal sapolo bulan sapolo, e taon se kapeng sanga’ sengko’ ban tang bangsa badha e pambuwangan, PANGERAN adhabu ka sengko’,

² "He, manossa se ta’ langgeng, cathet tanggalla are teya reya, sabab e are teya reya Babil molae ngeppong Yerusalim.

³ Sengko’, PANGERAN Se Mahatenggi, andhi’ settong parompama’an se kodu ekabala ka Tang ommat se dujan aberonta’: Ngala’ polo’, esse’e aeng pas saba’ e attassa apoy.

⁴ Maso’agi daging ka polo’ jareya daging se paleng bagus macemma, dagingnga bau ban dagingnga pokang, sarta lang-tolang se bannya’ somsomma.

⁵ Ngangguy dagingnga dumba se lempo ban ngodha, tambai kaju e baba’anna polo’na. Pangalkal aengnga, gudhuk dagingnga ban lang-tolangnga."

⁶ GUSTE Allah Se Mahatenggi adhabu, "Palang kottha se possa’ ban oreng se dujan mate’e oreng reya! Kottha jareya akantha polo’ se are’-kerre’ se ta’ tao eassae. Daging se badha e dhalemmanna epakalowar gan sakerra’, sampe’ tadha’ karena.

⁷ E kottha jareya badha oreng se epate’e oreng, coma dharana kurbanna ta’ epagili ka tana, tape etotta’ ka bato se gali, sampe’ ta’ ekenneng topowe.

⁸ Dhara jareya bi’ Sengko’ epanneng e jadhiya sampe’ bisa etangale’e ban bisa males sake’na ate."

⁹ GUSTE Allah Se Mahatenggi adhabu, "Palang kottha se possa’ ban oreng se dujan mate’e oreng rowa! Sengko’ dibi’ se nompo’a kaju se epangobbara.

¹⁰ Tambai kajuna! Keppay apoyya! Gudhuk dagingnga! Buwang kowana! Obbar lang-tolangnga!

¹¹ Sateya saba’ polo’ paronggu se kosong jareya e attassa apoy, panneng me’ sampe’ mera akantha mardha. Saellana tattaenna ekenneng obbar, polo’ jareya tanto berse pole menorot atoranna agama.

¹² Tape ta’ sakabbinna tattaenna elang ekello’ apoy.

¹³ Yerusalim, ba’na najjis polana tengkana ba’na se bejjat. Sengko’ la ngoddi aberse’e ba’na, tape tadha’ gunana, sabab ba’na teptep najjis. Ba’na ta’ kera berse pole sampe’ peggella Tang ate bi’ Sengko’ eteba’agi ka ba’na.

¹⁴ Sengko’, GUSTE Allah Se Mahatenggi la ngoca’. Sateya la baktona Sengko’ se ngokoma. Sengko’ ta’ loppa’a ka dusana ba’na ban ta’ nyapora’a ba’na ban ta’ neserra ka ba’na. Bi’ Sengko’ ba’na eokoma sabandhing ban tengkana kabbi. Sengko’, GUSTE Allah Se Mahatenggi la ngoca’."

¹⁵ PANGERAN adhabu ka sengko’,

¹⁶ "He, manossa se ta’ langgeng, oreng se paleng ekataresnae ba’na bi’ Sengko’ ekala’a dadagan. Tape ba’na ta’ osa nanges, ta’ osa magili aeng mata.

¹⁷ Ja’ sampe’ oreng ngedhing ba’na sesegunen. Ja’ ajalan ta’ ngangguy dhung-kodhung otabana ta’ akasodan akantha oreng se sossa polana kapateyan. Bariya keya ba’na ja’ notobi mowana, ban ja’ ngakan rotina oreng mate."

¹⁸ Kalagguwanna sengko’ acaca ka bangsa jareya ban lem-malemma tang bine mate. Kalagguwanna sengko’ ajalannagi apa se epakonnagi ka sengko’.

¹⁹ Ra’yat atanya, "Aponapa panjennengngan me’ sapaneka? Ponapa arteepon monggu ka kaula sadaja?"

²⁰ Sengko’ pas ngoca’, "Sengko’ epakon PANGERAN

²¹ manapa’ pessen reya ka ba’na: Ba’na ngandellagi kakowadanna Padalemman Socce. Ba’na dujan entar ka jadhiya ban dujan ngabas ka Padalemman jareya, tape padalemman jareya bi’ PANGERAN epacemmerra. Ban sabalana ba’na se gi’ ngodha se gi’ badha e Yerusalim, epamateya e dhalem paperrangan.

²² Ba’na pas bakal ngalakonana akantha sengko’ sateya reya. Ba’na ta’ kera notobi mowana ban ta’ ngakana rotina oreng mate.

²³ Ba’na ta’ kera ajalan ta’ ngangguy dhung-kodhung otabana ta’ akasodan, ban ta’ kera nanges. Ba’na bakal sajana nyangsara polana sa-dusana dibi’; ba’na bakal salenga aserro.

²⁴ Daddi sengko’, Yehezkiel, bakal daddiya conto ka ba’na; ba’na bakal ngalakonana akantha se elakone sengko’ sateya reya. PANGERAN adhabu ja’ mon se kantha jareya la kalakon, ba’na bakal taowa ja’ Salerana jareya GUSTE Allah Se Mahatenggi."

²⁵ PANGERAN adhabu ka sengko’, "Sateya, manossa se ta’ langgeng, Tang Padalemman Socce se koko rowa, se daddi kagumbira’anna ban kasennengnganna reng-oreng jareya, se bi’ reng-oreng jareya epandeng ban eentare kalaban ate senneng, bi’ Sengko’ ekala’a. Bariya keya ana’na reng-oreng jareya bi’ Sengko’ ekala’a kabbi.

²⁶ E are bakto Sengko’ ajalannagi jareya, settong oreng se ahasel lopot dhari pate jareya bakal dhatengnga, ban manapa’a kabar parkara jareya ka ba’na.

²⁷ E are jareya keya ba’na se buwi bakal bisa’a acaca pole. Ba’na bakal acaca’a bi’ oreng jareya. Kalaban cara se kantha jareya ba’na bakal daddiya tandha ka reng-oreng jareya; ban reng-oreng jareya bakal taowa ja’ Sengko’ PANGERAN."

Yehezkiel

Video Yehezkiel 24

Ikuti Kami:

KONTAK | PARTISIPASI | DONASI