Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas wari si pesepuluhken, bulan pesepuluhken, i bas tahun pesiwahken kenca kami i bas pembuangen, seh kata TUHAN man bangku nina,
2 "O manusia si ermasap-masap, suratkenlah tanggal wari si sendah, sabap i bas wari si sendah me raja Babil mulai ngepung Jerusalem.
3 Aku, TUHAN si Erdolat, lit sada perumpamanKu man bangsa pemberontak e, janah turikenlah man bana bagenda: Geleh biri-biri si mburna, buat dagingna si mejilena. Daging nahe si arah lebe ras pahana, bage pe tulan-tulanna si melala utukna. Tamaken lau ku bas kudin, tanggerken kerina i das dalikan. Gestungken rantingna seh luam launa, maka medate dagingna bage pe tulanna."
4 (Yeh 24:3)
5 (Yeh 24:3)
6 Enda me tole si ikataken TUHAN si Erdolat, "Cilaka me kota kalak pemunuh e! Kota e desken kudin si nggo tembesin si la pernah ibersihken. Daging ndai ibuat i bas kudin nari sengkeret-sengkeret, seh maka sitik pe lanai lit tading.
7 Lit pembunuhen i bas kota e; darehna la mambur ku taneh, tapi ku batu seh maka la banci itamburi.
8 Kupelepas dareh ndai i bas batu si nggo la tertamburi e, maka arah e keke rawangku erbahan pembalasen."
9 Enda tole si ikataken TUHAN si Erdolat, "Cilaka me kota kalak pemunuh e! Aku jine kap nggestungken rantingna.
10 Tambahi tole rantingna! Kiapi apina! Belgang daging e! Gergeri seh kerah kuahna, seh maka meseng tulan-tulan e!
11 Genduari tamakenlah kudin tembaga si nggo lume e i babo arang, jenari pegara seh merara kudin e. Kenca bage maka kudin e nggo ka bersih mulihi rikutken aturen agama erkiteken tembesina nggo meseng,
12 aminna gia tembesina e langa keri kerina ibahan api e.
13 O Jerusalem perbahanenndu si nggesuh e nggo ngeliami kam. Aminna nggo gia Kucubaken mersihken kam, kam tetap denga keliamen. Lalap kam la banci bersih mulihi adi lenga kin inanamindu uga sangatna pernembeh ateKu man bandu.
14 Aku, TUHAN si Erdolat nggo ngerana, janah genduari nggo seh paksana Aku ndalankenca. Dosa-dosandu lanai Kuenggo-enggoken, lanai ateKu mekuah, lanai kucidahken lias ateKu. Kam Kuukum sue ras perbahanenndu," bagenda me nina TUHAN si Erdolat.
15 Kata TUHAN seh man bangku nina,
16 "O manusia si ermasap-masap; alu sekali gudam, Kubunuh me kalak si ikelengindu kal. Tapi la banci kam jungut-jungut tah nderkuh ngamburken iluh.
17 Ula cidahken maka kam erceda ate. Sorandu kesi-kesi pe ula terbegu. Erbulang ras ersepatulah kam. Ula tutupi ayondu, janah ula pan pangan si biasa ipan kalak si erceda ate."
18 Lampas erpagi-pagi, ngerana aku man bangsa e. Karabenna mate ndeharangku, janah pepagina kulakoken sue ras si nggo ikataken man bangku.
19 Nungkun bangsa e man bangku nina, "Ngkai maka bage perbahanenndu?"
20 Emaka ningku ngaloi, "Lit kata TUHAN man bangku,
21 si man sehenken man bandu, o kalak Israel. Kata e bagenda: Megah kal akapndu kerna uga gegehna Rumah Pertoton e. Meriah ukurndu natapsa ras ngidahsa, tapi iliami TUHAN AteNa ingan e. Isi jabundu si nguda denga si tading i Jerusalem mate pagi i bas perang.
22 Kenca bage pagi, kam pe ilakokenndu bagi si kulakoken enda. La itutupindu ayondu, la ipanndu pangan si biasa ipan kalak si erceda ate.
23 Erbulang dingen ersepatu kam, la kam tangis, la kam ngandung. Reh dekahna reh kertangna dagingndu erkiteken dosa-dosandu, janah kelsehen kam sekalak kempak si debanna.
24 Emaka aku, Esekiel, aku jadi kalak si man usihenndu; ilakokenndu me kasa kai si nggo kulakoken. Ikataken TUHAN maka kenca jadi pagi si enda, ietehndu me maka ia kap TUHAN si Erdolat."
25 Nina ka TUHAN, "Dage, o manusia si ermasap-masap, Kubuat me i bas ia nari Rumah Pertoton si paguh e, si jadi kemegahen ras keriahenna e, si meriah kal akapna natapsa ras ndahisa. Tambah si e Kubuat pe anak-anakna si dilaki si diberu.
26 I bas warina Aku ngelakoken si enda sekalak si pulah i bas cilaka e nari reh ndahi kam janah nurikenca man bandu.
27 I bas wari e mulihi ka kam pagi ngasup ngerana janah lanai kam pekak. Kenca bage ngerana-ngerana kam pagi ras ia. Alu dalan si bagenda kam pagi o Esekiel, jadi sada tanda man bangsa e, maka ietehna Aku kap TUHAN."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA