Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani tahun patolupuluhkon, bani bulan ompat, ari lima bulan ai, sanggah i tongah-tongah ni na tarbuang ai ahu i topi ni Bah Kebar, buha ma langit, gabe huidah ma pangungkabon humbani Naibata.
2 Palima-arihon bani bulan ai, ai ma palima-tahunkon dob tarbuang Raja Joyakin,
3 roh ma hata ni Jahowa hubani Malim Hesekiel, anak ni si Busi, i tanoh ni halak Kasdim, i lambung ni Bah Kebar; tampei do tangan ni Jahowa bani ijai.
4 Sanggah na mangkawah ahu, tonggor ma, logou na marhaba-haba roh hun utara ampa hombun na banggal marhasoman apuy na marjimbur-jimbur anjaha marsinondang inggot, anjaha i tongah-tongah ni apuy ai adong do songon tombaga na marlinang-linang.
5 Anjaha i tongah-tongahni ai adong do usihan ni ompat sipargoluh; sonon do rupa ni sidea: Usih bani jolma do sidea.
6 Tapi ompat do bohi ni sidea bei, anjaha ompat bei do habong ni sidea.
7 Pintor do nahei ni sidea, anjaha jampal ni sidea songon jampal ni anak ni lombu do; marlinang-linang do ai songon tombaga pinolas.
8 I toruh ni habong ni sidea bani lambung ni na ompat ai martangan ni jolma do sidea. Na ompat ai sonon do bohi ampa habong ni sidea:
9 Marsiogosan do habong ni sidea; sanggah mardalan sidea, seng marhusor sidea, ganup do sidea manlangkah pintor hu lobei.
10 Ia rupa ni bohi ni sidea sonon do: Hampit lobei songon bohi ni jolma bani na ompat ai, hampit siamun songon bohi ni singa bani na ompat ai; hampit sambilou songon bohi ni lombu bani na ompat ai, anjaha hampit pudi, songon bohi ni manuk-manuk nanggordaha bani na ompat ai.
11 Herbang dompak datas do habongni sidea ai; dua bei habong ni sidea marsiogosan, na dua nari manrungkub badan ni sidea.
12 Ganup do sidea laho pintor hu lobei, huja laho Tonduy ai, hujai do laho sidea, seng marhusor sidea sanggah na laho ai.
13 I tongah-tongah ni sipargoluh ai adong do na gara songon narnar ni batubara, songon rigapan na hujai-hujon i tongah-tongahni sipargoluh ai. Lihar do apuy ai, anjaha luar do hilap humbagas apuy ai.
14 Marhujai-hujon do sipargoluh ai, songon hilap na mardejeb-dejeb.
15 Jadi sanggah na mangkawah ahu bani sipargoluh ai, tonggor ma, adong do sada galapang i tanoh, i lambung ni sipargoluh ai, i lobei ni na ompat ai.
16 Ia rupa ni galapang ai ampa rumangni songon parlinang-linang ni mata intan Tarsis do, dos do rupani na ompat ai, tapi popouni songon na i tongah-tongah ni galapang na sada do na sada nari idahon.
17 Dompak deisa na ompat ai do sidea laho, seng marhusor sidea bani na laho ai sidea.
18 Gijang do giling-gilingni ai, gok mata do ganup giling-gilingni ai inggot bani na ompat ai.
19 Anggo mardalan sipargoluh ai, mardalan ma galapang ai i lambung ni sidea; anggo naik sipargoluh ai hun tanoh, naik ma homa galapang ai.
20 Atap huja laho Tonduy ai, hujai ma laho sidea, anjaha galapang ai naik rap pakon sidea, ai ibagas galapang ai do Tonduy ni sipargoluh ai.
21 Anggo laho sidea, laho ma on; anggo maronti sidea, maronti ma on; anggo naik sidea hun tanoh, naik ma galapang ai rap pakon sidea; ai ibagas galapang ai do Tonduy ni sipargoluh ai.
22 Ibabou ni ulu ni sipargoluh ai adong do na songon langit, marsinondang songon kristal, ipaherbang ibabou ni ulu ni sidea.
23 Anjaha i toruh ni langit ai do herbang habongni sidea pintor, marsiogosan na sada hubani na sada, dua bei do habongni manrungkub badanni.
24 Sanggah bingkat sidea, hubogei do habong ni sidea mardongos songon parhasak ni bah banggal, songon sora ni Pargogoh Na So Tarimbang, sora na mariah usih songon sora ni bala; anggo sonto sidea, ipahirput sidea ma habongni.
25 Jadi roh ma sora hun langit, i babou ni ulu ni sidea ai; anggo sonto sidea ipahirput sidea do habongni.
26 Anjaha i atas ni langit, na i babou ni ulu ni sidea ai, adong do sada paratas, rupani songon batu intan sapir; anjaha na hundul i atas ni na songon paratas ai, mausih do bani rupani jolma.
27 Anjaha humbani na songon binongeini ai hu atas huidah do marhilap-hilap songon tombaga, songon rupani apuy na hinondor inggot; anjaha humbani na songon binongeini ai hu toruh, huidah do songon apuy, anjaha adong do sinalsal inggot Bani.
28 Songon rupa ni halibitongan bani hombun sanggah roh udan, sonai do rupa ni sondang ai inggot. Ai ma rupa ni usihan ni hamuliaon ni Jahowa. Dob huidah ai, manrogop ma ahu, gabe hutangar ma sora na marsahap.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA