Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dhabuna PANGERAN ka Mosa, "Kassa’ ba’na entar ka rato, kabala ja’ PANGERAN, Allahna bangsa Ibrani ngoca’ kantha reya, ‘Panneng Tang ommat kalowara dhari dhinna’, me’ olle ngenneng abakte ka Sengko’.
2 Mon ba’na ta’ ngedine bangsa Isra’il kalowar dhari dhinna’,
3 bi’ Sengko’ ba’na eokoma, ebinna ba’na epasake’a kabbi, jaran ban hemarra, onta ban sapena, dumba ban embi’na.
4 Ebinna bangsa Isra’il bi’ Sengko’ epabida’a dhari ebinna bangsa Messer. Ebinna bangsa Isra’il tadha’ settonga se mateya.
5 Sengko’, PANGERAN, la nantowagi baktona se ajalannagiya okoman reya, iya areya lagguna.’"
6 Kalagguwanna PANGERAN alampa’agi onggu sabarang se edhabuwagi. Ebinna bangsa Messer mate kabbi, tape ebinna bangsa Isra’il tadha’ se mateya sakale.
7 Rato makon oreng mareksa kadaddiyan jareya. Reng-oreng laju ngatore oneng ja’ ebinna oreng Isra’il tadha’ se mateya. Tape rato teptep macengkal, ta’ kasokan ngedine bangsa Isra’il kalowar dhari nagarana.
8 Dhabuna PANGERAN ka Mosa ban Harun, "Kassa’ ngala’ abu tomang sapergem dhari kennengnganna palebburan. Mosa kodu nabur abu jareya ka bang-abang, e adha’anna rato.
9 Abu jareya bakal ngarbuwa daddi sa Messer. Mon abu jareya ngenneng ka manossa otabana keban, kole’na tanto pas metto bu-tombu se du’-leddu’ kalowar nana."
10 Mosa ban Harun mondhut abu tomang dhari kennengnganna palebburan. Abu jareya etabur ka bang-abang e ajunanna rato. Kole’na manossa sarta keban laju metto bu-tombu se du’-leddu’ kalowar nana.
11 Kang-tokang tennongnga rato ta’ ngenneng ngadhebbi Mosa sabab badanna dibi’ padha possa’ bu-tombu akantha reng-oreng Messer laenna.
12 Tape bi’ PANGERAN rato epapaggun cengkal, akantha se la edhabuwagi PANGERAN, rato jareya paggun ta’ meyarsa’agi dhabuna Mosa ban Harun.
13 Dhabuna PANGERAN ka Mosa, "Lagguna gu-laggu ba’na entar ka rato. Kabala ja’ PANGERAN, Allahna bangsa Ibrani, ngoca’ kantha reya, ‘Panneng Tang ommat me’ olle kalowar dhari dhinna’ kaangguy abakte ka Sengko’.
14 Sateya Sengko’ madhatengnga sakabbinna balat ka ba’na, ka sakabbinna ponggabana ban ra’yadda, sopaja ba’na taowa ja’ Sengko’ reya tadha’ tandhinganna e bume reya.
15 Ja’ sakenga Sengko’ endha’ ngokoma ba’na ban ra’yadda kalaban panyaket, tanto ba’na la padha tompes kabbi.
16 Tape bi’ Sengko’ ba’na gi’ epanneng epaodhi’ terros me’ olle ba’na nangale’e ka Tang kakobasa’an, sopaja Tang nyama kalonta’a e bume reya.
17 Sanajjan kantha jareya, ba’na gi’ paggun tenggi ate, ta’ endha’ ngedine Tang ommat kalowar dhari nagarana ba’na.
18 Lagguna baja teya, Sengko’ matorona ojan es se ce’ rajana, se ta’ tao kadaddiyan neng e Messer reya.
19 Daddi sateya mara parenta’agi sopaja sakabbinna ebin ban dhi’-andhi’na oreng se badha e lowar padha’a egiba ka kennengngan se aman. Oreng sarta ebin se badha e lowar ban ta’ ngaop, bakal egaggarana ojan es jareya sampe’ mate kabbi.’"
20 Daddi ponggabana rato badha se padha tako’ ngedhing dhabuna PANGERAN jareya. Nor-dunorra ban ebinna epamaso’ ka bengkona, epangaop.
21 Tape se laen ta’ parduli ka parengeddan jareya; nor-dunor sarta ebinna paggun edina e lowar.
22 Dhabuna PANGERAN ka Mosa, "Jungjung tanangnga ba’na ka attas, tanto pas toron ojan es sanagara Messer. Ojan jareya bakal ngennenga ka manossa ban ebin sarta men-tamennan e gal-teggal."
23 Mosa laju ajungjung tongkedda la langnge’, PANGERAN pas madhateng galudhuk ban ojan es; kelap saleng pacenthar. PANGERAN matoron ojan es sanagara Messer.
24 Ojan es jareya talebat rajana etoro’e dhap-keddhap saleng pagalirap. Jareya ojan es se paleng raja e nagara Messer.
25 Sabarang se badha e teggal, tamaso’ manossa sarta ban-keban, padha mate ekenneng ojan es jareya. Men-tamennan ban ka’-bungka’an padha robbu.
26 Pera’ neng e Gosyen, kennengnganna oreng Isra’il, se ta’ ekenneng ojan es jareya.
27 Rato nembali Mosa ban Harun, dhabuna, "Sengko’ ce’ dusana, PANGERAN se lerres. Sengko’ ban tang ra’yat se sala.
28 Mara nyo’onnagi ka PANGERAN. Sengko’ ban tang ra’yat la cokop nyangsara polana kelap ban ojan es reya. Sengko’ ta’ lang-ngalangana ba’na ondura dhari Messer; oreng Isra’il la ta’ osa neng e dhinna’ pole."
29 Atorra Mosa ka rato, "Manabi abdidalem ampon napa’ ka lowarra kottha, abdidalem badhi adu’a nyo’ona ka PANGERAN. Galudhuk sareng kelap tanto pas ambu, ojan masthe pas terrang, sopaja junandalem onenga ja’ bume ka’dhinto kaagunganna PANGERAN.
30 Namong abdidalem oneng ja’ junandalem sareng sadajana ponggaba Messer gi’ ta’ tako’ ka GUSTE Allah."
31 Tamennan rame ban bungkana jaba padha rosak kabbi, sabab jabana teppa’na la towa buliranna ban ramena teppa’na ngembang.
32 Tape gandum ta’ rosak sabab gi’ banne mosemma.
33 Mosa pas nyengla dhari karaton, terros kalowar dhari kottha. E jadhiya Mosa adu’a nyo’on ka PANGERAN. Kelap ban ojan es sarta ojan aeng pas ambu.
34 E bakto rato ngoladi ja’ ojan, ojan es ban kelap la ambu, pas agabay dusa pole. Rato ban ba-ponggabana pas macengkal pole akantha asalla.
35 Bangsa Isra’il ta’ eedine kalowar dhari Messer, akantha se la edhabuwagi bi’ PANGERAN.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA