Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nampa a’lampamo Musa siagang Harun mange andallekang ri Karaeng Mesir. Nakana ke’nanga, "Kammaminne parentaNa Batara, Allata’alana Israel, ‘Sarei ising bansaKu a’lampa sollanna akkulle ke’nanga anggaukangi ibadana mae ri Nakke ri parang lompoa.’"
2 Akkuta’nammi karaenga angkana, "Inaika anjo Batara? Angngapa naIa musti kujampangi na kusare ising bansa Israel a’lampa? Tena nakuassengi anjo Batara, siagang tena nakupassareang a’lampa tu Israel."
3 Nakanamo Musa siagang Harun, "Le’ba’mi Napappicinikang KalenNa Allata’alana tu Ibrani mae ri kambe. Kisaremi ising ikambe a’lampa mange ri parang lompoa, kira-kira bellana battu anrinni tallungalloi nijappai. Eroki kambe mange assare koro’bang mae ri Batara, Allata’alana ikambe. Punna tanagaukangnga ikambe anjo kammaya, lanibunoi ikambe passala’ garring yareka pa’bundukang."
4 Nakanamo karaenga ri Musa siagang Harun, "Angngapa nanukellai anjo ke’nanga ambalang parekangi jama-jamanna? Suroi anjo sikamma ataya anjama!
5 Anjo taua ta’liwa’mi jaina. Nampa kamma-kamma anne nukellai sollanna ammari ke’nanga anjama!"
6 Anjo memang alloa appasulu’mi parenta karaenga mae ri sikamma pajagaya siagang mandoro’ tu Mesir mae ri bansa Israel, angkanaya,
7 "Tea’ mako sarei pole rarame anjo bansaya untu’ appare’ batu bata. Lappassammi nakalenna ke’nanga a’boya.
8 Mingka suroi ke’nanga appare’ batu bata tena nakurang jaina battu ri allo-allo le’baka. Eroki ke’nanga a’malasa’-malasa’; iaminjo saba’na natulusu’ jai bicara ke’nanga sollanna nisare ising untu’ a’lampa assare koro’bang mae ri Allata’alana ke’nanga.
9 Passa ngasengi anjo taua pila’ anjama battala’, sollanna sibu’ ri jama-jamanna, siagang tenamo kasampatanna allangngere’ carita-carita balle-balle."
10 Assulu’mi anjo sikamma pajagaya siagang sikamma mandoroka nampa nakana mae ri tu Israel, "Naparentakangi karaenga sollanna tenamo nanisareko rarame.
11 Musti ikau ngaseng kalennu mange a’boya ri kere-keremae. Mingka u’rangi angkanaya anjo batu bata nupareka takkulleai kurang jaina battu ri allo-allo allaloa."
12 Jari a’lampami tu Israel anjappai sikontu butta Mesir untu’ appasse’re rarame.
13 Tulusu’ nijallakkang allo-allomi ke’nanga ri pajagaya sollanna sangkamma jaina batu bata napareka siagang ri wattunna nisare ija ke’nanga rarame.
14 Anjo sikamma mandoro’ tu Israel nisuroa anjagai anjo jama-jamanga niba’jimi ri sikamma pajagaya. Akkuta’nangi ke’nanga angkana, "Angngapa natenamo nasangkamma jaina riolo anjo batu bata napareka bansanu?"
15 Jari a’lampami anjo sikamma mandoro’ tu Israelka andallekang siagang akkunrareng ri karaenga angkana, "Angngapa kippakamma anne mae ri kambe karaeng?
16 Tenamo nisarei ikambe rarame, mingka nipassai ikambe appare’ batu bata! Kamma-kamma anne masarromi ikambe niba’ji nampa pagawe-pagawena karaenga sitojenna sala!"
17 Appialimi karaenga angkana, "Malasa’ ngaseng memang tongko siagang taerokako anjama. Iaminjo saba’na nuppala’ ising ri nakke untu’ a’lampa mange assare koro’bang ri Bataranu.
18 A’lampamako mange anjama pole! Tena nulanisare rarame, mingka musti tuli apparekko batu bata sangkamma jaina riolo."
19 Naassemmi kalenna anjo sikamma mandoroka angkanaya lalang kasukkarrangi ke’nanga ri wattunna nisuro tu Israel musti appare’ batu bata tuli sangkamma jaina siagang allo-allo le’baka.
20 Ri wattunna assulu’ ke’nanga battu ri balla’ karaenga, assibuntulu’mi ke’nanga siagang Musa na Harun, niaka antayangi ke’nanga.
21 Nakanamo anjo sikamma mandoroka, "Naassengi Batara panggaukannu! LaNahukkungko sallang! Passabakkang ikaumi sipa’rua nanikabirisi ikambe ri karaenga siagang sikamma pagawena, sa’genna ero’mo ke’nanga ambunoi ikambe."
22 Nampa andallekammo pole Musa ri Batara na nakana, "O, Batara, angngapa naKigau’ kodi kamma bansa Israel? Angngapa naKisuroa’ mae anrinni?
23 Baku’ le’bakku andallekang ri karaenga siagang a’bicara lalang arenTa, appakkaramulami nasessa anne bansaya. Nampa tena apa-apa Kigaukang untu’ antulungi ke’nanga."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA