Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai bingkat ma haganup tumpuan ni halak Israel hun halimisan Sin, marguru hubani pangkatahon ni Jahowa pardalan ni sidea ai, gabe marsaran ma sidea i Papidim; tapi seng dong bah siinumon ni bangsa ai ijai.
2 Jadi itinggili bangsa ai ma si Musa, nini sidea, “Bere bennami bah inumonnami!” Nini ma dompak sidea, “Mase ma tinggilan nasiam ahu? Mase ma lajouon nasiam Jahowa?”
3 Tapi horahan bani bah do bangsa ai ijai, gabe marungut-ungut sidea hubani si Musa, nini, “Mase ma patangkogonmu hanami hun Masir, laho mamunuh hanami, anaknami pakon pinahannami marhitei horah?”
4 Jadi doruh-doruh ma si Musa hubani Jahowa, nini ma, “Aha ma bahenonku hubani bangsa on? Narus ma pargijigon ni sidea ahu bani batu.”
5 Nini Jahowa ma dompak si Musa, “Mamontas ma ho hun lobei ni bangsa in, arahkon ma deba humbani partua ni halak Israel bahen hasomanmu, jolom ma tungkot na nilibaskonmu hu Bah Nil ondi anjaha laho ma ho.
6 Tonggor ma, jongjong pe Ahu ijai i lobeimu i atas ni sada batu gingging i Horeb; anjaha libas ma batu gingging ai, ase luar hunjai bah siinumon bani bangsa in.” Jadi ibahen si Musa ma sonai i lobei ni partua ni Israel.
7 Jadi ibahen ma goran ni ianan ai Massa (parlajouan) pakon Meriba (partinggilan), halani partinggilan ni halak Israel ampa halani na ilajou sidea ai Jahowa marhitei na mangkatahon, “I tongah-tongahta do nani Jahowa atap lang?”
8 Dob ai roh ma Amalek marmunsuh dompak Israel i Papidim.
9 Dob ai nini si Musa ma dompak si Josua, “Pilih ma banta dalahi anjaha misir ma ho mamorang Amalek; patar jongjong ma ahu i pakpak ni dolog-dolog ai manjolom tungkot ni Jahowa ibagas tanganku.”
10 Jadi ibahen si Josua ma songon na hinatahon ni si Musa hubani; tapi tangkog ma anggo si Musa, si Aron pakon si Hur hu pakpak ni dolog-dolog ai.
11 Sadokah ipaherbang si Musa tanganni hu babou monang ma Israel, tapi anggo lenduk ma tanganni, monang ma Amalek.
12 Tapi ngayotan ma tangan ni si Musa; jadi ibuat sidea ma sada batu, inahkon ma hu toruhni, gabe hundul ma ia hujai; roh ma si Aron pakon si Hur manungkol tanganni salopah bei, gabe hot ma tanganni paima sundut mata ni ari.
13 Jadi ipatunduk si Josua ma Amalek pakon bangsani marhitei mata ni podang.
14 Dob ai nini Jahowa ma dompak si Musa, “Suratkon ma in bani sada buku bahen pardingatan, anjaha paingat ma in hubani pinggol ni si Josua; ai sai na sasapon-Ku do barita ni Amalek hun toruh ni langit.”
15 Ipauli si Musa ma sada anjapanjap anjaha ibahen ma goranni: Jahowa do alatan bangku.
16 Ai nini do, “Jolom paratas ni Jahowa! Porangon ni Jahowa ma Amalek marsundut-sundut.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA