Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yangasenna anjo kupikkiri’ baji’-baji’mi. Naatoroki Allata’ala katallassanna tau bajika siagang cara’deka, ba’lalo punna mangngabirisi yareka mangngai anjo taua. Tena tau angngassengi apa lakajariang sallang ri allo ri boko.
2 Memang, nia’ sare sangkamma lantuju ngasengi taua: Tau lambusuka yareka tau ja’dalaka, baji’ natau bajika kammayatompa tau kodia, tau tangkasaka yareka tau rantasaka, tau assarea koro’bang yareka tenaya. Tau bajika tena naupakkangngang na tau dorakaya, tau assumpaya siagang tau tenaya naero’ assumpa sangkammaji.
3 Jari, sare sangkamma tonji antujui ke’nanga ngaseng. Na anjo passalaka appakasi’nai pa’mai’, sangkamma todong sikontu kaja’dallanga ri lino. Lalang tallasa’na rupataua, rassi ka’ja’dallang atinna, siagang pikkiranna rassi todong katoloang. Nampa ti’ring narapi’mo a’jala’na.
4 Mingka lalang nia’na ija tallasaka ri batangkalea, lalanna anjo nia’ panrannuang. Sai la’bi te’neangngangi nasa’ring kongkong attallasaka kala singa tenaya nyawana?
5 Minang sike’de’na, tau attallasaka naassengi angkana attayangi a’jala’na, nampa tau matea tena apa-apa naasseng. Mae ri ia tena passawallang yareka pa’balasa’, siagang nikaluppaimi arenna.
6 Pakkasia’ mangngai, birisi’, siagang napasuna, yangasenna lasikamateang ngasengi siagang ia. Tenamo nantama’ ri sikamma apa kajarianga ri lino.
7 Umba, ningnganremo siagang a’rannu-rannu, inungi anggoro’nu numatte’ne-te’ne pa’mai’. Tena Napappisangkangi Allata’ala, ba’lalo Nakellai.
8 Lappassammi accaya siagang singara’ rupannu.
9 Kasia’mi tallasaka siagang bainennu nungaia lalang tallasa’ sia-sianu, Nasareako Allata’ala ri lino. Kasia’mi allo-allo manna natena matu-matunna. Saba’ iaji anjo bawang sawala’ posonu.
10 Jamai sikontu tugasa’nu sipagassing-gassinnu. Saba’ tenamo sallang pikkirang yareka jama-jamang. Tenamo pangngassengang yareka kacara’dekang ri linona tau matea. Na iami anjo lanumangei.
11 Nia’ pole kucini’ ri anne linoa: teai tuli kaminang gassinga lari ammeta ri pa’lumbanga, teai tuli tau kassaka ammeta ri pa’bundukanga. Tena natuli anggappa pa’boya-boyang tau cara’deka. Na tau taranga pikkiranna tena natuli anggappa kakalumanynyangang. Kammayatompa natuli masahoro’ tau porea. Saba’ manna inai akkulle tonji natuju dalle’ siala’.
12 Takkulleai naasseng rupataua ringngapanna nabattu wattunna. Sanrapang jangang-jangang naalle sikko’ siagang juku’ naalle jala, kamma tomminjo rupataua natuju bala, ri wattu tenaya nasanna-sannai.
13 Anne nia’ se’re pangngebarang kaminang coco’, antekamma batena nipakalompo kacara’dekanga:
14 Nia’ se’re kota ca’di-ca’di, sike’de’ji pandudu’na. Ri se’reang allo nia’ sitau karaeng lompo battu ambunduki anjo kotaya. Natammulili anjo kotaya siagang sadiami ero’ anrumbangi tembo’ kotana.
15 Ri anjo kotaya nia’ se’re tu kasi-asi mingka cara’deki. Akkullei napasalama’ anjo kotaya. Mingka lanri kasi-asi, linta’mi nikaluppai jasana siagang tenamo manna sitau angngu’rangi.
16 Jari, annabami panggappaku angkanaya la’biangngangi kacara’dekanga na kagassinganga. Mingka manna nakamma, kacara’dekanna tu kasi-asia tena nijampangi. Tena niparhatikangi kana-kananna.
17 Bajikangngangi sannanga ampilangngeri kana-kananna se’rea tau nia’ pangngassenganna, kala sa’ra lompona tukoasaya ri pa’rappunganna tau dongoka.
18 A’matu-matuangngangi kacara’dekanga kala sanjataya, mingka silisere’ tai balao anra’massi je’ne’ sigumbang.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA