Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jareya kabbi bi’ sengko’ epekker epagu-onggu. Sengko’ tao ja’ Allah reya se ngator odhi’na oreng se teppa’ ban se bicaksana, bariya keya mon oreng jareya andhi’ ate taresna otaba ate baji’. Tadha’ se taowa apa se bakal kadaddiyana e budhi are.
2 Pajat bendher papasthenna oreng reya padha kabbi: Oreng se jujur otabana se daraka, oreng se bagus otaba se jahat, oreng se berse otabana se najjis, oreng se ngatorragi kurban otabana se ta’ ngatorragi kurban. Oreng becce’ ta’ apojuran dhari oreng se dusa, oreng se asompa padha ban oreng se ta’ endha’ asompa.
3 Daddi reng-oreng jareya kabbi papasthenna padha. Ban jareya tamaso’ settong parkara se mangennes akantha kadaddiyan se kemma’a bai e dunnya reya. Saomorra atena manossa possa’ ban kajahadan, pekkeranna possa’ ban kabudhuwan. O-tao pas napa’ ka ajalla.
4 Tape saabidda oreng gi’ odhi’, gi’ badha pangarebban. Sabab pate’ se odhi’ asennengngan dhari macan se ta’ anyaba.
5 Paleng enja’, oreng odhi’ tao ja’ aba’na mateya, dineng oreng mate ta’ tao pa-apa. Monggu ka oreng mate tadha’ opana, la’-mala’ nyamana la ta’ ekaenga’e oreng laenna.
6 Ate taresna, baji’ ban napsona, noro’ mate kabbi ban aba’na. Aba’na la ta’ ro’-noro’ pa-apa e dhalem sakabbinna kadaddiyan e dunnya.
7 Mara, kakan bai ban pasenneng. Enom anggurra paperak. Allah ta’ kaberradan, la’-mala’ Salerana kasokan.
8 Dina mowana ba’na me’ olle cengngar.
9 Ne’madi odhi’ reya ban binena ba’na se kataresnan saabidda odhi’na ba’na tadha’ gunana se eparengngagi Allah ka ba’na e dunnya. Ne’madi sabban are maske tadha’ gunana. Sabab opana pello konengnga ba’na pera’ jareya.
10 Lakone sakabbinna tugassa ba’na paamba’ pate. Sabab dhaggi’ tadha’ pekkeran otaba lako pole. Tadha’ elmo otaba hekmat e dunnyana oreng mate. Ban ka jadhiya se bi’ ba’na kodu eentare.
11 E dunnya reya badha pole se etangale sengko’: Se mennang parlomba’an ta’ salanjangnga oreng se santa’ paberka’na, se mennang perrang ta’ salanjangnga oreng se kowat. Oreng bicaksana ta’ salanjangnga nemmo kasap. Ban oreng se penter ta’ salanjangnga olle kasogiyan. Bariya keya para ahli ta’ salanjangnga kasohor. Sabab sapa’a bai bisa ekenneng papasthen se juba’.
12 Manossa ta’ tao bila sa’adda se dhapa’a. Akantha mano’ se tajira’ ban juko’ se ekenneng jala, bariya keya manossa kateban balai e sa’at se ta’ eka-sangka.
13 Areya’ conto se paleng teppa’ baramma oreng ngargai hekmat e dunnya reya:
14 Badha kottha kene’ se pandhudhu’na sakone’. E settong are kottha jareya elorok rato raja. Kottha jareya ekeppong ban pagar alassa la para’ epagujura.
15 E kottha jareya badha oreng mesken se bicaksana. Kalaban kabicaksana’anna jareya oreng buru masalamet kottha jareya. Tape sarrena aba’na mesken, jasana ceppet ekaloppae; tadha’ oreng settonga se enga’ ka oreng jareya.
16 Daddi, bendher ca’na sengko’ ja’ hekmat reya alebbiyan dhari kakowadan. Sanajjan kantha jareya hekmadda oreng mesken ta’ eparduli oreng. Cacana tadha’ se ngedhingngagi.
17 Lebbi becce’ ngedhingngagi cacana oreng se andhi’ elmo se ekoca’agi kalaban ayem, katembang cacana pangobasa se eera’agi e dhalem kompolanna reng-oreng gendheng.
18 Hekmat lebbi aguna dhari sanjata, tape oreng kasorang se kalero bisa majuba’ oreng bagus sabannya’na.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA