¹ Korintusk de Alap mo hlil irin zi hip, hen tingare zeno propinsina Akayak de aya-wal oso-wal hap, Yesus mo dam tasin zini Paulus onakon, hen nere mae mo osona Timotius onakon: Dawem! Eiwa, Alap mo dwam gwibin sin ki lwak, zep Kristus asa dam tasiki– zere hap de olsa dikim gol halada gwen hapye. In zebe ebe mae hap ale gulzimꞌin.
² Dawem! Nere mae mo Bian Alap ne Bian Kristus Yesus ne sa kwasang-kwasang zemka mamkam ebe mae hap ol gwizimdi. Hen nen zere nik mo taha terenak esa lowehe gwer.
³ Nen kitak Bian Yesus mo Bian Alap hap dawemsa gol gweblan, sap Zen kwasang-kwasang enna, hen dekam de enho nakon tatete gwen hap dena, zen kitak Bian Alap en onakon nebe mae hap hata gwizimnin. Sap nen an zeno walas.
⁴ Nen kim banakare karekna oltowe gwenan, Zen Zen neno mae mo enhona nep tatete ta gwizimnira. Zen mae hap kirekam nesa gweibirida gwenda: Aha zi de kareksa goltowenkam, nen de hwena zebe mae hap enhosa de tatete tazimdin hip de enlalasa anakan zer gwizimdin hip, “A kirekam mo Alap ano enhona ap tatete tablakaye– ee kime hen kirekam karekna goltowekye.”
⁵ Nen mese Kristus hun eraha-en gwek, zep nen kime karekna zeno bose hap oltowe gwenan, dekam san de Zen de hen kareksa goltowenna kiye. Nen sap dawemkame karekna Kristus hup de jal hap oltowe gwenan. Zen in zep hwena Kristus hen nebe mae hap enhosa dikim tatete tan hap de enlalana dawemkam zer gwizimnira.
⁶ Zep ee de ere mo wal bose walya ban kareksa zigoltowe gwenkam, zen mae hap: Em dikim etatete gwen hap hen engaya gwen hap. Sap Kristus kim abe mae hap enhosa de tatete tan hap de enlalana zer gwizimꞌinka, zen dekam asa hen ebe mae hap ayang ul gwizim– em dikim hen kire kareksa de goltowen nakon enlala nik etatete gwe-gwen hap.
⁷ Hwena ee home anakan emsa enlala eibiridaꞌan, “Zeno mae mo enlalana tatete naka hom.” Sap mes tangan dam gwesinin: Em de hen Kristus hup de jal hap kareksa goltowe gwenkam, Zen hen sa ebe mae hap dekam de etatete gwen hap de enlalana zer gwizimdi.
⁸ Aya-wal oso-wal, ee ama tangan edwam gweꞌan– em dikim abe mae hap dena ansa etawa gwen hap: Ëe ner hom serkam de kareksae Asia mo langnak oltowe gwek. Karekna in man serkam tangan dohon-hon gwek, hendep ee enlalana mese anakan edowe hanak, “Nen an molye lowehek.”
⁹ Ëe ama dekam eis gwibik, “Ëe an angkam jalom ek tihinake lowe heꞌan, hen zen angkam aisis gin hip asa alp tabiꞌira!” Hwena zen mae hap ki kirekam Alap asa gweibiridaka: Ëe dikim ere mae mo sosonsa blol gwibin srem hap. Zen in zep, nen diki Alap en hon nen eblol gwe-gwen, sap Zen soson tangan Zini Zen. Zeno sosonna ki– juwen nakon dikim etan ngaya tabin hip denaye.
¹⁰ Hwena dekam zep Alap jalom ek tihina in kon asa alal gulku, hen Zen sa etan kirekam asa alal gul gwera. Sap ee mese Zebon en onak anakan eyaing gwe kinik, “Zen Zen sa etan tin hip de karek nakon asa alal gul gwera.”
¹¹ Zen kirekam sa lwa gwer– em de Alapsa de abe tankam asa mas gwibirida gwenkamye. Alap kim ol gu sonenna insa dokwak gul gweꞌanka, dekam zini beya nik sa Alap hap dawemna anakan nol gweblal, “Bian, Em ema asa sam tabirida– kirekam de desa kwasang gwibiridankamye.”
¹² Ëe ere mo wal bose walya ban ere mae mo syala home olsaher gwe-gweꞌan. Sap ano mae mo enho nakon anakare enlalana hom wet so gwenda, “Ëe kareksae ol gwenan,” ahaksa, “Ëe auhu-kama enlalakame syal taꞌan.” Hwena anakare enlala en wet so gwenda, “Ëe an enho lalakkame okamanak awe syal ta gwenan– aha zisi de boton ta gwibin sremkam.” Sap Alap abe mae hap gol gwizimnira– kirekam de enho lalakkam syal ta gwen hap denaye, nonol tangan ebon mae kime lowehe gwekke.
¹³ Ano mae mo ebe mae hap de surat-suratna hen dam-dam enna– em dikim damnak baca ta gwibin hip, hen em dikim tame gul gwen hap, ba maesa de aning gun sremkam. Sap ee ama edwam gwe-gweꞌan– em de dawem enkam asa tame tabin hip.
¹⁴ Sap dawemkame asa tame labir srem gweꞌak, ki esa asa u seger la gwibir. Sul sonenkame asa tame labiꞌik, ki Bian Yesus mo lwa halzan hap de yaklanak de hatankam, em esa asa isrip-sri eibiridal, hen ee asa emsa isrip-sri eibiridal.
¹⁵ Sap ee mese desa kitak tame guk, zen in zebe sap menkam kirekam kalang gwek– Makedonia mo lang san de song gwenkam de emsa nonol amjanbir kinzin hapye. Etan lwahal zankam amaka emsa amjanbir kinzik. Dekam ano emsa de mas gwibirida zanna maka dan nek. Hen aumwa hap Yahudi mo lang san dep emaka asa er sonek.
¹⁶ (1:15)
¹⁷ Hwena ee ama kalangna insa wet gulsuk. Em ahakon dekon mes yabe asa kil lik, “Paulus zen auhu-kama enlala naban kalang gwe-gwenda, zep anakan gu-guk gwenda, ‘Ëe asa emsa amjanbir.’ Hwena kirekam bejen.”
¹⁸ Hwena boton srem Zini Alap mo nwenak ee ama emsa gubiridaꞌan: Ano ola ebe mae hap kirekam hom!
¹⁹ Ahana hen ki– boton srem Zi niye. Zen Alap mo Tanena Kristus Yesus. Ëe Silas ne Timotius neban mese zebe hap dena ebon mae onak olhata gwek. Em Kristus mo Zenaka de sosok tan nakon zebe anakan dam ulsuk gwenan, “Zen hom zere mo kalangna wet gulsuk gwenda.”
²⁰ Sap Alap mo zi hip de ol gu-gunnu, zen kitak Kristus hun de zeraha-en gwen nakon nebe mae hap jowe gwizimnin. Nen in zebe Zebon onakon Alapsa anakan boltere la gwenan, “Eiwa, Alap, ema asa sam ta gwibirida. In eiwa.”
²¹ Sap Zen Alap Zen nebon mae onak syal gwe-gwenda– dekam de nen Kristus en onak tatem ezauk gwen hapye. Zen in zep zere mo Enhona nebe mae hap hle ta sonezimki.
²² Hen kim nep hle ta sonezimki, Zen san de Alap de neno mae mo enhonak anakan ale gunnu kiye, “Zini an ere en mo dena.” Zep angkam Alap zere mo Enhona neno mae mo enhonak gwe gwenda. Zen in zebe hen anakan tame ul gwenan, “Mensa Alap ngein sin dep dena nesa gu-gubirida gweka, zen eiwa kirekam sa ki lwal.”
²³ Hwena ee de emsa boton tabin srem hap, dikire Alap asa hla tak. Ëe mae habe lwa halza srem gwek: Ki hwena eno mae mo karek-kareksa asa damnak wet gulzimzir. Hwena ee ama emsa kwasang gwibiridak, zebe lwa halza srem gwek.
²⁴ Ëe home anakan emsa enlala eibirida gwenan, “Ëe asa desa tik-tik la gwibir– ano mae mo kire enkam de taiblibin sin de ang ta gwen hap.” Hwena nen apdenake syal taꞌan– eno mae mo isrip-sri dikim hen sowehen hap. Sap nen Kristussue laibliblak, in zebe etatete gwe-gwenan.