Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ia si Naeman, pambobai ni bala ni raja ni halak Aram, halak na sangap do ia i lobei ni tuanni anjaha marmulia tumang, ai itumpakkon Jahowa do hamonangan bani halak Aram, marhiteihonsi. Sada puanglima na tarmurmur do ia, tapi gadamon do ia.
2 Sahali sanggah laho halak Aram manrampas, iboan sidea ma sahalak naboru na etek-etek hun tanoh Israel, gabe ibahen ma ia suruh-suruhan ni parinangon ni si Naeman.
3 Nini naboru ai ma hu bani parinangon ni tuanni ai, “Ambit i lambung ni nabi na i Samaria ai tuannami, sai na malum do bahenonni gadam ai.”
4 Dob ai roh ma si Naeman patugahkon barita ai hu bani tuanni, nini ma, “Sonon do hata ni naboru na hun tanoh Israel ai.”
5 Jadi nini raja Aram ai ma, “Antong bingkat ma ham, hutongos pe sada surat hu bani Raja Israel.” Dob ai bingkat ma ia, iboan ma sapuluh talenta pirak pakon onom ribu sekel omas ampa sapuluh baju na marharga.
6 Dob ai ipadas ma surat ai bani Raja Israel, sonon do hatani, “Anggo das ma surat on bamu, botoh ham ma, na husuruh do marayak ham si Naeman juakjuakkon, ase pamalumonmu ia hun bani gadamni.”
7 Jadi dob ibasa Raja Israel surat ai, irigati ma pakeianni anjaha nini ma, “Ai Naibata ahu, na boi pamateihon atap pagoluhkon, ase ihatahon raja ai ahu pamalumkon halak on hun bani gadamni? Halani ai botoh anjaha tonggor nasiam ma, na mangindahi paringoran do ia hun bangku.”
8 Tapi dob ibogei si Elisa, halak ni Naibata, na dob irigati raja ni Israel pakeianni, isuruh ma suruhanni hu bani raja ai mangkatahon, “Mase irigati ham pakeanmu? Mahua roh ma namin ia hu bangku, ase ibotoh na adong do sada nabi i Israel.”
9 Jadi roh ma si Naeman rap pakon hudani ampa garetani, anjaha marsaran ma ia i lobei ni labah ni si Elisa.
10 Dob ai isuruh si Elisa ma suruhanni mangkatahon hu bani, “Laho ma ham maridi pitu hali i Bah Jordan, ase suang dagingmu anjaha pansing ham.”
11 Jadi manringis ma si Naeman, misir ma ia anjaha nini ma, “Tonggor ma, huagan do luar ia manjumpahkon ahu anjaha jongjong lanjar idilo goran ni Jahowa Naibatani, anjaha iawas-awaskon tanganni bani naborit on gabe malum gadam on.
12 Ai lang dearan do Bah Abana pakon Parpar na i Damaskus ase haganup bah na i Israel? Ai lang tarbahen ahu maridi ijai ase pansing ahu?” Jadi marhusor ma ia lanjar laho ibagas ringis.
13 Roh ma juakjuakni mandohorisi anjaha nini ma, “Bapa, ambit ihatahon nabi ai ham mangkorjahon atap aha na borat, ai seng bahenonmu ai? Samintolah ma na hinatahonni ai bamu, ʻMaridi ma ham, ase pansing ham!ʼ”
14 Jadi tuad ma ia, anjaha isornobkon ma dirini pitu hali hubagas Jordan, romban hu bani hata ni halak ni Naibata ai, gabe suang ma dagingni songon daging ni dakdanak na etek-etek, anjaha pansing ma ia.
15 Dob ai mulak ma ia hu bani halak ni Naibata ai, pakon ganup juakjuakni; daskonsi ia jongjong ma ia i lobei ni, anjaha nini ma, “Tonggor ma, sonari ma hubotoh, na so adong naibata i sab tanoh on, sobali i Israel. On pe, jalo ham ma sibere-bere on hun bani juakjuakmu on.”
16 Tapi nini ma, “Songon sintongni manggoluh Jahowa, anjaha ahu jongjong marugas i lobei-Ni, seng ra ahu manjalo atap aha pe.” Ielek-elek ma ia ase ijalo ai, tapi manjua do ia.
17 Dob ai nini si Naeman ma, “Anggo lang, mahua na bere ma bani juakjuakmu on tanoh boratan dua halode, ai seng ra be jabolonmu on hulobeian on manggalangkon galangan sisayaton hu bani naibata na legan, sobali hu bani Jahowa.
18 Pitah ibagas pahara on, sai marpangulaki ma uhur ni Jahowa mangidah juakjuakmu on. Anggo masuk tuanku hu rumah ni Rimon laho marsombah ijai, anjaha ipatatangkon dirini hu bani tanganku, anjaha manrogop pakon ahu i rumah ni Rimon, sai marpangulaki ma uhur ni Jahowa mangidah juakjuakmu on ibagas pahara on.”
19 Dob ai nini si Elisa ma hu bani, “Laho ma ham ibagas damei!” Tapi dob misir ia, tar daoh otik,
20 nini si Gehasi, suruh-suruhan ni si Elisa, halak ni Naibata ai ma ibagas uhurni, “Tonggor ma, ihaholongi tuanku si Elisa do si Naeman halak Aram ai, marhitei na so jinaloni ai hun bani aha na binoanni ai. Songon sintong ni manggoluh Jahowa, huayaki ma ia, ase hujalo hun bani otik.”
21 Jadi iayaki si Gehasi ma si Naeman. Dob iidah si Naeman halak na mangayakisi ai, turun ma ia hun bani garetani manjumpahkonsi, lanjar nini ma, “Naha damei do?”
22 Nini ma mambalosi, “Damei do! Na isuruh tuanku do ahu mangkatahon bamu, ʻTonggor ma, na roh do tongkin on hu bangku dua anak garama, susian ni nabi hun Dolog Efraim; mahua bere ham ma bani sidea sada talenta pirak pakon dua lambar pakeian na marharga.ʼ”
23 Nini si Naeman ma, “Anggo dear uhurmu, na ma dua talenta.” Sai ielek-elek do ia; dob ai inahkon ma dua talenta pirak hubagas dua ranjut-ranjut pakon dua lambar pakeian na marharga, anjaha ibere ma ai boanon ni dua juakjuakni, jadi iusung sidea ma ai i lobei ni si Gehasi.
24 Jadi dob das ia hu buntu-buntu ai, ibuat ma ai hun bani sidea, anjaha inahkon ma ai hubagas sada rumah; isuruh ma halak ai mulak, jadi laho ma sidea.
25 Dob ai masuk ma si Gehasi, anjaha jongjong i lobei ni tuanni, jadi nini si Elisa ma hu bani, “Roh hunja ho Gehasi?” Nini ma mambalosi, “Roh hunja pe lang.”
26 Tapi nini ma hu bani, “Ai lang rap pakon ho do ahu ibagas tonduy sanggah tuad halak ai hun bani garetani laho manjumpahkon ho? Ari panjaloonkon duit pakon hiou ma on gakni, nini uhurmu, laho mamboli pohon jetun, pohon anggur atap biri-biri, lombu atap jabolon dalahi ampa jabolon naboru?
27 Halani ai longkot hubam pakon hu bani ginomparmu ma gadam ni si Naeman ronsi sadokah ni dokahni.” Dob ai luar ma si Gehasi hun lobei ni, domma gadamon lopak songon salju.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA